പാറശാലയിൽ ട്രെയിൻ എൻജിൻ പാളം തെറ്റി; ആളപായമില്ല

തിരുവനന്തപുരം: തിരുവനന്തപുരത്തും പരിസര പ്രദേശങ്ങളിലും കനത്ത മഴ തുടരുന്നതിനിടെ പാറശാലയിൽ റെയിൽവേ ട്രാക്കിലേക്ക് മണ്ണ് വീണ് സൂപ്പർഫാസ്റ്റ് എക്സ്പ്രസിന്റെ എൻജിൻ പാളം തെറ്റി. അപകടത്തെത്തുടർന്ന് അഞ്ചോളം ട്രെയിനുകളുടെ ഗതാഗതം തടസ്സപ്പെട്ടു. ഗതാഗതം പുനഃസ്ഥാപിക്കാൻ കുറഞ്ഞത് ഏഴ് മണിക്കൂറെങ്കിലും വേണ്ടിവരുമെന്നാണ് റെയിൽവേ അറിയിക്കുന്നത്.

പുലർച്ചെ രണ്ടുമണിയോടെയാണ് ബിലാസ്പൂരിൽനിന്ന് തിരുനെൽവേലിയിലേക്ക് സർവീസ് നടത്തുന്ന സൂപ്പർഫാസ്റ്റ് എക്സ്പ്രസിന്റെ എൻജിൻ പാളം തെറ്റിയത്. ട്രാക്കിലേക്ക് മണ്ണ് വീണതാണ് അപകടത്തിന് കാരണമായത്.

സംഭവത്തിൽ ആളപായമില്ല. എന്നാൽ ട്രെയിൻ ഗതാഗതം തടസ്സപ്പെട്ടതോടെ യാത്രക്കാരെ ബാധിച്ചു. ട്രാക്കിലെ തടസ്സങ്ങൾ നീക്കി ഗതാഗതം പുനഃസ്ഥാപിക്കാനുള്ള ശ്രമങ്ങൾ റെയിൽവേ അധികൃതരുടെ നേതൃത്വത്തിൽ തുടരുകയാണ്. അറ്റകുറ്റപ്പണികളും പുനഃസ്ഥാപന നടപടികളും പൂർത്തിയാക്കിയ ശേഷമേ ട്രെയിൻ സർവീസുകൾ സാധാരണ നിലയിലാകൂ.