‘ജെൻസി’ അംഗീകാരം മോദിക്ക് മാത്രം! പ്രധാനമന്ത്രിയുടെ ചിത്രം പങ്കിട്ട് അഭിജിത് ദിപ്കെയുടെ പരിഹാസം

ന്യൂഡൽഹി: ഡൽഹി ഹൈക്കോടതിയിൽനിന്ന് വിമർശനങ്ങൾ നേരിട്ടതിന് പിന്നാലെ പ്രധാനമന്ത്രി നരേന്ദ്ര മോദിയുടെ ചിത്രം പങ്കിട്ട് പരിഹാസവുമായി സിജെപി സ്ഥാപക നേതാവ് അഭിജിത് ദിപ്കെ. ‘ജെൻസിയായി അംഗീകരിക്കപ്പെട്ട ഏക വ്യക്തി’ എന്ന കുറിപ്പോടെയാണ് ദിപ്കെ മോദിയുടെ ചിത്രം എക്സിൽ പങ്കുവെച്ചത്.

സിജെപി സഹ കൺവീനർമാരായ സൗരവ് ദാസിന്റെയും അശുതോഷ് റാങ്കെയുടെയും ഹർജി പരിഗണിക്കവെയാണ് ഡൽഹി ഹൈക്കോടതി സംഘടനയെക്കുറിച്ചും അതിന്റെ ലക്ഷ്യങ്ങളെക്കുറിച്ചും ചോദ്യങ്ങൾ ഉന്നയിച്ചത്. ‘നിങ്ങൾ ആരാണ്? എന്താണ് സംഘടന? എന്താണ് ഉദ്ദേശം?’ എന്നിങ്ങനെയായിരുന്നു കോടതിയുടെ ചോദ്യങ്ങൾ.

ഹർജിക്കാരുടെ അഭിഭാഷകരോട് ഇരുവരുടെയും പ്രായവും കോടതി ചോദിച്ചു. പ്രായം വ്യക്തമാക്കിയതിനു പിന്നാലെ ‘നിങ്ങൾ ജെൻസി അല്ലല്ലോ’ എന്നായിരുന്നു കോടതിയുടെ പരാമർശം. ജുഡീഷ്യൽ കസ്റ്റഡിയിലുള്ള സിജെപി നേതാക്കളുടെ പ്രവർത്തനങ്ങളെക്കുറിച്ചും കോടതി ചില പരാമർശങ്ങൾ നടത്തിയിരുന്നു.

ഇതിന് പിന്നാലെയാണ് പ്രധാനമന്ത്രി നരേന്ദ്ര മോദിയുടെ ചിത്രം പങ്കുവെച്ച് അഭിജിത് ദിപ്കെ പ്രതികരിച്ചത്. ‘ജെൻസിയായി അംഗീകരിക്കപ്പെട്ട ഏക വ്യക്തി’ എന്ന കുറിപ്പിലൂടെ കോടതിയുടെ പരാമർശങ്ങളെ പരിഹാസരൂപത്തിൽ നേരിടുകയായിരുന്നു അദ്ദേഹം.