ഡിസംബർ 15 വരെ വോട്ട് ചോരി പ്രചാരണം നീട്ടി കോൺഗ്രസ്; ഗ്യാനേഷ് കുമാറിനെതിരെ പ്രതിഷേധം ശക്തമാക്കും

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയും മോദി ഭരണകൂടത്തിനെതിരെയും പ്രതിപക്ഷം നടത്തുന്ന പ്രതിഷേധങ്ങൾ പുതിയ ഘട്ടത്തിലേക്ക് കടക്കുകയാണ്. തിരഞ്ഞെടുപ്പ് പ്രക്രിയയുടെ സുതാര്യതയെയും വോട്ടർ പട്ടികയിലെ ക്രമക്കേടുകളെയും ചൊല്ലി പ്രതിപക്ഷം ഉന്നയിക്കുന്ന ആരോപണങ്ങളുടെ തുടർച്ചയായി, മുഖ്യ തിരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ടുകൊണ്ട് പ്രതിഷേധം ശക്തമാക്കാൻ തന്നെയാണ് ഇന്ത്യാ സഖ്യത്തിന്റെ നീക്കം. ‘വോട്ട് ചോരി’ എന്ന വിഷയത്തിൽ കോൺഗ്രസ് നടത്തിവരുന്ന രാജ്യവ്യാപക പ്രചാരണം ഏകദേശം മൂന്നാഴ്ചത്തേക്ക് കൂടി നീട്ടി ഡിസംബർ 15 വരെ തുടരാനാണ് തീരുമാനിച്ചിരിക്കുന്നത്. ഗ്യാനേഷ് കുമാർ സ്ഥാനമൊഴിയാതെ പിന്നോട്ടില്ലെന്ന നിലപാടിൽ ഉറച്ചുനിൽക്കുന്ന പ്രതിപക്ഷം, വോട്ടർ പട്ടികയിൽ പേരുകൾ പരിശോധിക്കുന്നതിനും അനധികൃതമായി പേരുകൾ നീക്കം ചെയ്യുന്നത് കണ്ടെത്തുന്നതിനുമായി സാങ്കേതികവിദ്യയുടെ സഹായത്തോടെ പോളിംഗ് ബൂത്ത് തലം വരെ പ്രചാരണം വ്യാപിപ്പിക്കാനാണ് ലക്ഷ്യമിടുന്നത്.

‘വോട്ട് രക്ഷക്’ എന്ന് പേരിട്ടിരിക്കുന്ന പ്രചാരണത്തിന്റെ അടുത്ത ഘട്ടത്തിൽ സാങ്കേതികവിദ്യയെയും താഴെത്തട്ടിലുള്ള സംഘടനാ പ്രവർത്തനങ്ങളെയും ഒരുമിപ്പിക്കാനാണ് കോൺഗ്രസിന്റെ നീക്കം. വോട്ടർ പട്ടികയിലെ ക്രമക്കേടുകൾ കണ്ടെത്തുന്നതിനും സാധാരണക്കാരായ വോട്ടർമാരുടെ വോട്ടവകാശം സംരക്ഷിക്കുന്നതിനും ഇതിലൂടെ ലക്ഷ്യമിടുന്നത്. എ.ഐ.സി.സി സംഘടനാ ചുമതലയുള്ള ജനറൽ സെക്രട്ടറി കെ.സി. വേണുഗോപാലിന്റെ അധ്യക്ഷതയിൽ ചേർന്ന രണ്ട് മണിക്കൂർ നീണ്ട അവലോകന യോഗത്തിലാണ് പ്രചാരണം നീട്ടാനുള്ള തീരുമാനമെടുത്തത്. ഭരണഘടനാ ദിനമായ നവംബർ 26-ന് പ്രചാരണം അവസാനിപ്പിക്കാനായിരുന്നു കോൺഗ്രസ് നേതൃത്വം നേരത്തെ തീരുമാനിച്ചിരുന്നത്. എന്നാൽ രാജ്യവ്യാപകമായി പ്രചാരണത്തിന് ലഭിച്ച സ്വീകാര്യതയും, നവംബർ ഒന്നിന് ഡൽഹിയിലെ രാംലീല മൈതാനത്ത് നടന്ന റാലിയുടെ വിജയമെന്ന് പാർട്ടി വിശേഷിപ്പിക്കുന്ന മുന്നേറ്റവുമാണ് ഡിസംബർ 15 വരെ പ്രചാരണം നീട്ടാൻ പ്രേരിപ്പിച്ചത്. അടുത്ത ഘട്ടത്തിന്റെ ഭാഗമായി നവംബർ 26-ന് രാജ്യത്തുടനീളം ‘സംവിധാൻ രക്ഷാ മാർച്ചുകൾ’ സംഘടിപ്പിക്കാൻ കെ.സി. വേണുഗോപാൽ നേതാക്കൾക്ക് നിർദേശം നൽകിയിട്ടുണ്ട്. പ്രചാരണം താഴെത്തട്ടിലേക്ക് എത്തിക്കുന്നതിനായി ഗ്രാമീണ തലങ്ങളിൽ ചൗപ്പാലുകൾ അഥവാ ജനകീയ കൂട്ടായ്മകളും സംഘടിപ്പിക്കും.

വോട്ടർ പട്ടികയിൽ നിന്ന് പേരുകൾ നീക്കം ചെയ്യപ്പെട്ടവരുടെ വിവരങ്ങൾ പോളിംഗ് ബൂത്ത് തലത്തിൽ പരിശോധിക്കുന്നതിനായി പാർട്ടി പ്രവർത്തകർക്കായി ഒരു പ്രത്യേക വെരിഫിക്കേഷൻ ആപ്പ് വികസിപ്പിച്ചെടുത്തിട്ടുണ്ട്. ഇതിനുപുറമെ, വോട്ടർമാർക്ക് തങ്ങളുടെ പേര് പട്ടികയിലുണ്ടോ എന്ന് നേരിട്ട് പരിശോധിക്കുന്നതിനും പേര് നീക്കം ചെയ്യപ്പെട്ടിട്ടുണ്ടെങ്കിൽ പരാതി നൽകുന്നതിനുമായി ‘ഐ ആം വോട്ട് രക്ഷക്’ എന്ന വെബ്‌സൈറ്റിനും പാർട്ടി രൂപം നൽകിയിട്ടുണ്ട്. 2027-ൽ നിയമസഭാ തിരഞ്ഞെടുപ്പ് നടക്കാനിരിക്കുന്ന ഉത്തർപ്രദേശ്, ഉത്തരാഖണ്ഡ്, പഞ്ചാബ് എന്നീ നിർണായക സംസ്ഥാനങ്ങളിൽ പ്രചാരണം ശക്തമാക്കാൻ ഒരുങ്ങുന്ന സാഹചര്യത്തിൽ ഈ സാങ്കേതിക മുന്നേറ്റത്തിന് വലിയ രാഷ്ട്രീയ പ്രാധാന്യം തന്നെയുണ്ട്. വരും ദിവസങ്ങളിൽ ഡിജിറ്റൽ പ്ലാറ്റ്‌ഫോമുകളെയും താഴെത്തട്ടിലുള്ള സംഘടനാ സംവിധാനങ്ങളെയും ഒരുപോലെ ഉപയോഗപ്പെടുത്തി വോട്ടർ പട്ടികയിലെ ക്രമക്കേടുകൾക്കെതിരായ പ്രചാരണം ശക്തമാക്കാനാണ് കോൺഗ്രസിന്റെ തീരുമാനം. വരാനിരിക്കുന്ന നിയമസഭാ തിരഞ്ഞെടുപ്പുകൾക്ക് മുന്നോടിയായി ഭരണപക്ഷത്തിനെതിരെ ശക്തമായ രാഷ്ട്രീയ ആയുധമാക്കി ഈ വിഷയത്തെ മാറ്റിയെടുത്ത് പ്രതിരോധം തീർക്കാനാണ് പ്രതിപക്ഷം ലക്ഷ്യമിടുന്നത്.