കോഴിക്കോട്ട് കായികമാമാങ്കത്തിന് വർണാഭമായ തുടക്കം; പോരാട്ടം 117.5 പവന്റെ സ്വർണക്കപ്പിനായി

കോഴിക്കോട്: 68-ാമത് കേരള സംസ്ഥാന സ്കൂൾ കായികമേളയ്ക്ക് കോഴിക്കോട്ട് വർണാഭമായ തുടക്കം. ഒളിമ്പിക്സ് മാതൃകയിൽ സംഘടിപ്പിക്കുന്ന മൂന്നാമത് കായികമേള നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (എൻ.ഐ.ടി) സിന്തറ്റിക് ട്രാക്കിൽ മുഖ്യമന്ത്രി വി.ഡി. സതീശൻ ഉദ്ഘാടനം ചെയ്തു. 14 ജില്ലകളിൽ നിന്നുള്ളവരും ഗൾഫ് മേഖലയിൽ നിന്നുള്ളവരുമടക്കം പതിനായിരത്തോളം കായികപ്രതിഭകൾ മാറ്റുരയ്ക്കുന്ന മേളയിൽ ഇത്തവണത്തെ പ്രധാന ആകർഷണം 117.5 പവന്റെ സ്വർണക്കപ്പിനായുള്ള ജില്ലകളുടെ പോരാട്ടമാണ്.

ഇന്ത്യൻ ഒളിമ്പിക് അസോസിയേഷൻ പ്രസിഡന്റും മേളയുടെ ബ്രാൻഡ് അംബാസഡറുമായ ഒളിമ്പ്യൻ ഡോ. പി.ടി. ഉഷ എം.പിയിൽ നിന്ന് മുഖ്യമന്ത്രി ദീപശിഖ ഏറ്റുവാങ്ങി തെളിയിച്ചതോടെയാണ് കായികമേളയ്ക്ക് ഔദ്യോഗിക തുടക്കമായത്. പൊതുവിദ്യാഭ്യാസ-ന്യൂനപക്ഷ ക്ഷേമ വകുപ്പ് മന്ത്രി അഡ്വ. എൻ. ഷംസുദ്ദീൻ ചടങ്ങിൽ അധ്യക്ഷത വഹിച്ചു.

നാലായിരത്തോളം കായികതാരങ്ങൾ അണിനിരന്ന മാർച്ച് പാസ്റ്റോടെയാണ് ഉദ്ഘാടന ചടങ്ങുകൾ ആരംഭിച്ചത്. വിവിധ സ്കൂളുകളിലെ വിദ്യാർഥികൾക്കൊപ്പം എസ്.പി.സി, എൻ.സി.സി കേഡറ്റുകൾ, സ്കൗട്ട്സ് ആൻഡ് ഗൈഡ്സ് അംഗങ്ങൾ, ഇൻക്ലൂസീവ് സ്പോർട്സ് താരങ്ങൾ എന്നിവരും മാർച്ച് പാസ്റ്റിൽ പങ്കെടുത്തു. മന്ത്രി എൻ. ഷംസുദ്ദീൻ സല്യൂട്ട് സ്വീകരിച്ചു. മൂവായിരത്തോളം വിദ്യാർഥികൾ അവതരിപ്പിച്ച സാംസ്കാരിക പരിപാടികൾ ഉദ്ഘാടന ചടങ്ങിന് നിറപ്പകിട്ടേകി. ലഹരിവിരുദ്ധ പ്രതിജ്ഞയും ചടങ്ങിൽ ചൊല്ലി.

സ്വർണക്കപ്പിനായി ജില്ലകൾ തമ്മിൽ കടുത്ത പോരാട്ടം

സബ് ജൂനിയർ, ജൂനിയർ, സീനിയർ വിഭാഗങ്ങളിലായി ഏകദേശം 2,800 താരങ്ങൾ പങ്കെടുക്കുന്ന അത്ലറ്റിക്സ് മത്സരങ്ങളാണ് മേളയിലെ പ്രധാന ആകർഷണം. വേഗതയുടെയും കരുത്തിന്റെയും മികവിൽ പുതിയ റെക്കോർഡുകൾ പിറക്കുമെന്ന പ്രതീക്ഷയിലാണ് കായികപ്രേമികൾ. വിവിധ കായിക ഇനങ്ങളിലായി പതിനായിരത്തോളം പ്രതിഭകൾ അണിനിരക്കുന്ന മേളയിൽ ഏറ്റവും കൂടുതൽ പോയിന്റ് നേടുന്ന ജില്ലയ്ക്ക് മുഖ്യമന്ത്രിയുടെ 117.5 പവന്റെ സ്വർണക്കപ്പ് സമ്മാനമായി ലഭിക്കും.

10 വേദികളിൽ മത്സരങ്ങൾ

എൻ.ഐ.ടി സിന്തറ്റിക് ട്രാക്കാണ് പ്രധാന വേദി. ഇതിനു പുറമേ കോടിയത്തൂർ പി.ടി.എം.എച്ച്.എസ്.എസ്, പെരുവയൽ സെന്റ് സേവ്യേഴ്സ് യു.പി സ്കൂൾ, ചാത്തമംഗലം എം.ഇ.എസ് രാജ റെസിഡൻഷ്യൽ സ്കൂൾ, ദയാപുരം റെസിഡൻഷ്യൽ സ്കൂൾ, കുന്നമംഗലം ഹയർ സെക്കൻഡറി സ്കൂൾ, ആർ.ഇ.സി ജി.വി.എച്ച്.എസ്.എസ് ചാത്തമംഗലം, സിൽവർ ഹിൽസ് പബ്ലിക് സ്കൂൾ പാറോപ്പടി, പ്രസന്റേഷൻ എച്ച്.എസ്.എസ് ചേവായൂർ, ദേവഗിരി സെന്റ് ജോസഫ്സ് കോളേജ് ഇൻഡോർ സ്റ്റേഡിയം എന്നിവിടങ്ങളിലും മത്സരങ്ങൾ നടക്കും.

ഒക്ടോബർ 26ന് എൻ.ഐ.ടി സിന്തറ്റിക് ട്രാക്കിൽ ഇൻക്ലൂസീവ് അത്ലറ്റിക്സോടെയാണ് മത്സരങ്ങൾക്ക് തുടക്കമാകുന്നത്. ഒക്ടോബർ 27 മുതൽ 31 വരെയാണ് പ്രധാന അത്ലറ്റിക്സ് മത്സരങ്ങൾ.

വുഷു, സോഫ്റ്റ്ബോൾ, ബേസ്ബോൾ, കരാട്ടെ, ബോൾ ബാഡ്മിന്റൺ, നെറ്റ്ബോൾ, ത്രോബോൾ, വടംവലി, യോഗ, ബാസ്കറ്റ്ബോൾ, ക്രോസ് കൺട്രി തുടങ്ങിയ ഇനങ്ങൾക്കൊപ്പം ഇൻക്ലൂസീവ് ക്രിക്കറ്റ്, ബോക്സ്ബോൾ, ഹാൻഡ്ബോൾ, ബാഡ്മിന്റൺ, ഫുട്ബോൾ മത്സരങ്ങളും വിവിധ വേദികളിലായി നടക്കും.

ചടങ്ങിൽ മന്ത്രിമാരായ ടി. സിദ്ദിഖ്, ഒ.ജെ. ജനീഷ്, എം.കെ. രാഘവൻ എം.പി, കോഴിക്കോട് മേയർ ഒ. സദാശിവൻ, എം.എൽ.എമാരായ എം.എ. റസാഖ് മാസ്റ്റർ, പാറക്കൽ അബ്ദുള്ള, കെ. ജയന്ത്, കെ. പ്രവീൺകുമാർ, കെ.കെ. രമ, സി.കെ. കാസിം, ഫൈസൽ ബാബു, പി.കെ. ഫിറോസ്, വി.ടി. സൂരജ്, ഫാത്തിമ തഹ്ലിയ, വിദ്യാ ബാലകൃഷ്ണൻ, ടി.പി. അഷ്റഫ് അലി തുടങ്ങിയവർ പങ്കെടുത്തു.

ജില്ലാ പഞ്ചായത്ത് പ്രസിഡന്റ് മില്ലി മോഹൻ, പൊതുവിദ്യാഭ്യാസ വകുപ്പ് സ്പെഷ്യൽ സെക്രട്ടറി സജിത്ത് ബാബു, ഡയറക്ടർ അരുൺ കെ. വിജയൻ, അഡീഷണൽ ഡയറക്ടർ സി.എ. സന്തോഷ്, കൈറ്റ് സി.ഇ.ഒ അൻവർ സാദത്ത്, സിറ്റി പോലീസ് കമ്മിഷണർ എ.പി. ഷൗക്കത്തലി, വിദ്യാഭ്യാസ ഉപഡയറക്ടർ സി.എസ്. അമൃത, എസ്.എസ്.കെ ജില്ലാ പ്രോജക്ട് കോ-ഓർഡിനേറ്റർ നിസാർ ചേലരി, ഒളിമ്പ്യൻ പി.ആർ. ശ്രീജേഷ് എന്നിവരും ജനപ്രതിനിധികളും ഉദ്യോഗസ്ഥരും രാഷ്ട്രീയ പാർട്ടി പ്രതിനിധികളും ചടങ്ങിൽ സന്നിഹിതരായി.