കണ്ണൂരിൽ അമ്മയും മകനും വീട്ടിനുള്ളിൽ കുത്തേറ്റ് മരിച്ച നിലയിൽ; ദുരൂഹതയുണർത്തി ഇരട്ടമരണം

കണ്ണൂർ: മട്ടന്നൂരിൽ അമ്മയെയും മകനെയും വീട്ടിനുള്ളിൽ കുത്തേറ്റും വെട്ടേറ്റും മരിച്ച നിലയിൽ കണ്ടെത്തി. മട്ടന്നൂർ സ്വദേശികളായ നന്ദനം ജ്യോതി (56), മകൻ നവീൻ കൃഷ്ണ (21) എന്നിവരാണ് മരിച്ചത്. സംഭവത്തിൽ പൊലീസ് അന്വേഷണം ആരംഭിച്ചു.

വീടിന്റെ മുകളിലത്തെ നിലയിലെ മുറിയിലാണ് ഇരുവരെയും രക്തത്തിൽ കുളിച്ച നിലയിൽ കണ്ടെത്തിയത്. ദേഹമാസകലം കുത്തേറ്റും വെട്ടേറ്റും ഗുരുതരമായി പരിക്കേറ്റ ഇരുവരെയും ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ജ്യോതിയുടെ ഭർത്താവും വിരമിച്ച കെഎസ്ഇബി ഉദ്യോഗസ്ഥനുമായ ജയകൃഷ്ണൻ ചൊവ്വാഴ്ച രാവിലെ ക്ഷേത്രത്തിൽ പോയിരുന്നു. തിരികെ വീട്ടിലെത്തിയപ്പോഴാണ് ഭാര്യയെയും മകനെയും ഗുരുതരമായി പരിക്കേറ്റ നിലയിൽ കണ്ടെത്തിയത്.

അമ്മയും മകനും തമ്മിലുണ്ടായ തർക്കമാണ് സംഭവത്തിന് പിന്നിലെന്നാണ് പൊലീസിന്റെ പ്രാഥമിക നിഗമനം. എന്നാൽ മരണത്തിലേക്ക് നയിച്ച യഥാർഥ സാഹചര്യം വ്യക്തമല്ല. പുറത്തുനിന്ന് ആരെങ്കിലും വീട്ടിൽ പ്രവേശിച്ചതിന്റെ സൂചനകളൊന്നും ഇതുവരെ ലഭിച്ചിട്ടില്ല.

തില്ലങ്കേരി സി.എച്ച്. മുഹമ്മദ് കോയ സ്മാരക സ്കൂളിലെ മുൻ പ്രധാനാധ്യാപികയായിരുന്നു ജ്യോതി. മകൻ നവീൻ കൃഷ്ണ പി.എസ്.സി പരീക്ഷയ്ക്കുള്ള പരിശീലനം നടത്തിവരികയായിരുന്നു.

സംഭവത്തിൽ കൂടുതൽ വ്യക്തത വരുത്താൻ പൊലീസ് അന്വേഷണം തുടരുകയാണ്.