എസ്എംഎ മരുന്ന് വിവാദം: മുൻ ആരോഗ്യ മന്ത്രിമാർക്ക് മറുപടിയുമായി എസ്.എ.ടി ആശുപത്രി

തിരുവനന്തപുരം: സ്പൈനൽ മസ്കുലർ അട്രോഫി (എസ്എംഎ) ചികിത്സയ്ക്കായി ഇന്ത്യൻ നിർമിത മരുന്ന് വിതരണം ചെയ്യുന്നതുമായി ബന്ധപ്പെട്ട വിവാദത്തിൽ മുൻ ആരോഗ്യ മന്ത്രിമാരുടെ വിമർശനങ്ങൾക്ക് മറുപടിയുമായി തിരുവനന്തപുരം എസ്.എ.ടി ആശുപത്രി. മരുന്നിനെക്കുറിച്ച് തെറ്റായ പ്രചാരണം നടത്തി രോഗികളെയും കുടുംബങ്ങളെയും ആശങ്കയിലാക്കരുതെന്നും കുറഞ്ഞ ചെലവിൽ ചികിത്സ ലഭ്യമാക്കാനുള്ള ശ്രമങ്ങളെ തുരങ്കംവെക്കരുതെന്നും ആശുപത്രി സൂപ്രണ്ട് വ്യക്തമാക്കി.

ഇന്ത്യൻ നിർമിത മരുന്ന് ഉപയോഗിക്കാനുള്ള തീരുമാനം വിദഗ്ധ സമിതിയുടെ നിർദേശപ്രകാരമാണെന്നും ഇതുമായി ബന്ധപ്പെട്ട നടപടികൾ മുൻ സർക്കാരിന്റെ കാലത്തുതന്നെ ആരംഭിച്ചതാണെന്നും സൂപ്രണ്ട് വിശദീകരിച്ചു. രാജ്യത്ത് ആവശ്യമായ എല്ലാ അംഗീകാരങ്ങളും പുതിയ മരുന്നിനുണ്ടെന്നും മരുന്നിന്റെ ഗുണനിലവാരത്തെക്കുറിച്ച് അനാവശ്യ ആശങ്കകൾ സൃഷ്ടിക്കേണ്ടതില്ലെന്നും അദ്ദേഹം പറഞ്ഞു.

കഴിഞ്ഞ ദിവസമാണ് എസ്എംഎ ക്ലിനിക്കുകൾ വഴി ആരോഗ്യവകുപ്പ് ഇന്ത്യൻ നിർമിതമായ പുതിയ മരുന്ന് വിതരണം ചെയ്തുതുടങ്ങിയത്. മരുന്നിന്റെ കവറിൽ 'ഡോക്ടേഴ്സ് സാമ്പിൾ' എന്ന് രേഖപ്പെടുത്തിയിരുന്നത് കുട്ടികളുടെ രക്ഷിതാക്കളിൽ ആശങ്കയുണ്ടാക്കിയിരുന്നു. പുതിയ മരുന്നിന്റെ വിശദാംശങ്ങൾ ആരോഗ്യവകുപ്പ് കൃത്യമായി ലഭ്യമാക്കിയില്ലെന്നും രക്ഷിതാക്കൾ പരാതിപ്പെട്ടു.

ഇതിനു പിന്നാലെയാണ് വിഷയത്തിൽ രാഷ്ട്രീയ വിവാദം ശക്തമായത്. പരീക്ഷണ ലേബലുള്ള മരുന്ന് കുട്ടികൾക്ക് നൽകിയെന്നത് ഗൗരവമുള്ള വിഷയമാണെന്നും പിഞ്ചുകുഞ്ഞുങ്ങളുടെ ജീവൻവച്ച് ചൂതാടുകയാണെന്നും പ്രതിപക്ഷ നേതാവ് പിണറായി വിജയൻ പ്രതികരിച്ചിരുന്നു. സംഭവത്തിൽ അന്വേഷണം വേണമെന്നും അദ്ദേഹം ആവശ്യപ്പെട്ടു.

എന്നാൽ, 'ഡോക്ടേഴ്സ് സാമ്പിൾ' എന്ന് രേഖപ്പെടുത്തിയ മരുന്നും യഥാർഥ മരുന്നും തമ്മിൽ വ്യത്യാസമില്ലെന്നാണ് എസ്.എ.ടി ആശുപത്രി സൂപ്രണ്ടിന്റെ വിശദീകരണം. മരുന്നിന്റെ കുറഞ്ഞ വില കൂടുതൽ കുട്ടികൾക്ക് ചികിത്സ ലഭ്യമാക്കാൻ സഹായിക്കുമെന്നും അദ്ദേഹം ചൂണ്ടിക്കാട്ടി.

എസ്എംഎ പോലുള്ള അപൂർവ ജനിതക രോഗങ്ങൾ ബാധിച്ച കുട്ടികളുടെ ചികിത്സയ്ക്ക് വലിയ സാമ്പത്തിക ചെലവ് ആവശ്യമായി വരുന്ന സാഹചര്യത്തിൽ, കുറഞ്ഞ വിലയിൽ മരുന്ന് ലഭ്യമാക്കുന്ന പദ്ധതി ജനങ്ങൾക്ക് ആശ്വാസമാകുന്നു എന്നും വിമർശനത്തിന് മറുപടിയായി ആശുപത്രി സൂപ്രണ്ട് ചൂണ്ടിക്കാട്ടി.