ആദമിന്റെ സ്വപ്നം പൂവണിയും; സ്നേഹവീടിന് തറക്കല്ലിട്ടു

കാസർഗോഡ്  ചെർക്കള: ഓട്ടിസം ബാധിച്ച മകളുമായി വർഷങ്ങളായി വാടകവീടുകളിൽ കഴിയുന്ന പൈക്ക ബാലടുക്കയിലെ ഹോട്ടൽ ജീവനക്കാരനായ ആദമിന്റെയും കുടുംബത്തിന്റെയും സ്വന്തം വീടെന്ന സ്വപ്നം യാഥാർഥ്യമാകുന്നു. സാമ്പത്തികമായി പിന്നാക്കം നിൽക്കുന്ന കുടുംബത്തിന്റെ നിസ്സഹായാവസ്ഥ മനസ്സിലാക്കിയ നാട്ടുകാരുടെ സഹായത്തോടെയാണ് കോൺഗ്രസ് പ്രവർത്തകർ വീടുനിർമാണത്തിന് മുന്നിട്ടിറങ്ങിയത്.

ഡി.സി.സി ജനറൽ സെക്രട്ടറി സി.വി. ജെയിംസിന്റെ നേതൃത്വത്തിൽ ‘ഉമ്മൻ ചാണ്ടി സ്നേഹവീട്’ എന്ന പേരിലാണ് കുടുംബത്തിനായി വീട് നിർമിക്കുന്നത്. വീടിന്റെ തറക്കല്ലിടൽ രാജ്‌മോഹൻ ഉണ്ണിത്താൻ എം.പി. നിർവഹിച്ചു.

ചടങ്ങിൽ ഡി.സി.സി ജനറൽ സെക്രട്ടറി സി.വി. ജെയിംസ് അധ്യക്ഷത വഹിച്ചു. ചെങ്കള ഗ്രാമപഞ്ചായത്ത് പ്രസിഡന്റ് വസന്തൻ അജക്കോട്, ഇ. ശാന്തകുമാരി, ഇബ്രാഹിം കൊയർകൊച്ചി, സലീം എടനീർ, സുരേഷ് കുമാർ പാടി, ഖാൻ പൈക്ക, എം. പുരുഷോത്തമൻ നായർ, ഷാഫി ചൂരിപ്പള്ളം, ബി. രാധാകൃഷ്ണ നായക്ക് തുടങ്ങിയവർ സംസാരിച്ചു.

സ്വന്തം വീടെന്ന ആദമിന്റെ സ്വപ്നത്തിന് നാട്ടുകാരുടെയും കോൺഗ്രസ് പ്രവർത്തകരുടെയും കൈത്താങ്ങായി ‘സ്നേഹവീട്’ ഒരുങ്ങുകയാണ്.