ഇനി അജ്ഞാത നമ്പറുകളിൽനിന്ന് വിളിച്ചാലും ആളെ തിരിച്ചറിയാം; നവംബർ 1 മുതൽ പുതിയ സംവിധാനം

ന്യൂഡൽഹി: രാജ്യത്ത് സൈബർ തട്ടിപ്പുകളും സ്പാം കോളുകളും നിയന്ത്രിക്കുന്നതിന്റെ ഭാഗമായി ഇൻകമിങ് കോളുകളിൽ വിളിക്കുന്നയാളുടെ പേര് പ്രദർശിപ്പിക്കുന്ന പുതിയ സംവിധാനം നടപ്പാക്കാനൊരുങ്ങി കേന്ദ്ര സർക്കാർ. നവംബർ 1 മുതൽ കോളിംഗ് നെയിം പ്രസന്റേഷൻ (CNAP) സംവിധാനം രാജ്യത്തെ 4G, അതിനുമുകളിലുള്ള സാങ്കേതികവിദ്യയിലുള്ള മൊബൈൽ നെറ്റ്‌വർക്കുകളിൽ നടപ്പാക്കാൻ ടെലികമ്മ്യൂണിക്കേഷൻസ് വകുപ്പ് നിർദേശം നൽകി.

പുതിയ സംവിധാനം നിലവിൽ വരുന്നതോടെ ഫോണിലെ കോൺടാക്ട് ലിസ്റ്റിൽ നമ്പർ സേവ് ചെയ്തിട്ടില്ലെങ്കിലും വിളിക്കുന്നയാളുടെ പേര് തിരിച്ചറിയാൻ സാധിക്കും. നിലവിൽ പലപ്പോഴും അപരിചിതമായ നമ്പറുകളിൽനിന്ന് വരുന്ന കോളുകളുടെ ഉറവിടം തിരിച്ചറിയാൻ കഴിയാത്ത സാഹചര്യമുണ്ട്. പുതിയ സംവിധാനത്തിലൂടെ നമ്പറിനൊപ്പം പേരും ഫോണിന്റെ സ്ക്രീനിൽ പ്രദർശിപ്പിക്കും.

ഫോണിൽ നമ്പർ സേവ് ചെയ്തിട്ടുണ്ടെങ്കിൽ കോൺടാക്ട് ലിസ്റ്റിലുള്ള പേരായിരിക്കും സ്ക്രീനിൽ കാണിക്കുക. നമ്പർ സേവ് ചെയ്തിട്ടില്ലാത്ത ആഭ്യന്തര കോളുകളുടെ കാര്യത്തിൽ വിളിക്കുന്നയാളുടെ ടെലികോം സേവനദാതാവിന്റെ വരിക്കാരുടെ വിവരശേഖരത്തിലുള്ള പേരാണ് പ്രദർശിപ്പിക്കുക. ഇതിനായി ഉപയോക്താക്കൾ പ്രത്യേകം അപേക്ഷ നൽകേണ്ടതില്ലെന്നാണ് നിർദേശം.

വിദേശത്തുനിന്നുള്ള കോളുകളിൽ, നമ്പർ കോൺടാക്ട് ലിസ്റ്റിൽ സേവ് ചെയ്തിട്ടില്ലെങ്കിൽ, 'ഇന്റർനാഷണൽ കോൾ' എന്ന സന്ദേശമാണ് കാണിക്കുക. അതേസമയം, കോളറുടെ തിരിച്ചറിയൽ വിവരങ്ങൾ മറച്ചുവയ്ക്കുന്നതിനുള്ള CLIR സൗകര്യം ഉപയോഗിക്കുന്നവരുടെ പേരുകൾ പ്രദർശിപ്പിക്കില്ലെന്നും നിർദേശത്തിൽ വ്യക്തമാക്കുന്നു.

ബിസിനസ് ആവശ്യങ്ങൾക്കായി ഉപയോഗിക്കുന്ന മൊബൈൽ കണക്ഷനുകളിൽ സ്ഥാപനത്തിന്റെ ഔദ്യോഗിക പേര് പ്രദർശിപ്പിക്കാനും വ്യവസ്ഥയുണ്ട്. ജിഎസ്ടി പോർട്ടലിൽ രജിസ്റ്റർ ചെയ്ത വ്യാപാരനാമം ഉൾപ്പെടെയുള്ള അംഗീകൃത പേരുകൾ ആവശ്യമായ രേഖകൾ പരിശോധിച്ച് ടെലികോം സേവനദാതാവിന് അംഗീകരിക്കാം. ഇതിലൂടെ ഉപഭോക്താക്കളെ ബന്ധപ്പെടുന്ന സ്ഥാപനങ്ങളെയും വ്യാപാരികളെയും തിരിച്ചറിയുന്നത് കൂടുതൽ എളുപ്പമാകുമെന്നാണ് പ്രതീക്ഷ.

ടെലികോം സേവനദാതാക്കൾ 4G, അതിനുമുകളിലുള്ള നെറ്റ്‌വർക്കുകളിൽ CNAP നടപ്പാക്കുന്നതിനുള്ള പരീക്ഷണങ്ങൾ നടത്തിയിട്ടുണ്ട്. എന്നാൽ 2G, 3G നെറ്റ്‌വർക്കുകളിലും ലാൻഡ്‌ലൈൻ സേവനങ്ങളിലും ഈ സംവിധാനം നടപ്പാക്കുന്ന കാര്യം പിന്നീട് പ്രത്യേകം പരിശോധിക്കുമെന്നാണ് ടെലികമ്മ്യൂണിക്കേഷൻസ് വകുപ്പിന്റെ നിർദേശം.

കോളർ തിരിച്ചറിയൽ കൂടുതൽ സുതാര്യമാക്കുകയും വ്യാജ കോളുകൾ, ഫോൺ മുഖേനയുള്ള തട്ടിപ്പുകൾ, അനാവശ്യ വാണിജ്യ കോളുകൾ എന്നിവ നേരിടാൻ ഉപയോക്താക്കളെ സഹായിക്കുകയും ചെയ്യുകയാണ് പുതിയ സംവിധാനത്തിന്റെ ലക്ഷ്യം.