കൊടുംചൂടിനൊപ്പം പവർകട്ടും; വൈദ്യുതി പ്രതിസന്ധിയിൽ വലഞ്ഞ് ജനങ്ങൾ

തിരുവനന്തപുരം: കൊടുംചൂടിൽ വിയർപ്പൊഴുക്കുന്ന ജനങ്ങൾക്ക് ആശ്വാസം നൽകേണ്ട വൈദ്യുതി സംവിധാനവും പ്രതിസന്ധിയിലായതോടെ സംസ്ഥാനത്ത് ദുരിതം ഇരട്ടിയായി. വൈദ്യുതി ക്ഷാമം രൂക്ഷമായ സാഹചര്യത്തിൽ പവർകട്ട് നിയന്ത്രണങ്ങൾ കൂടുതൽ ശക്തമാക്കിയിരിക്കുകയാണ്. വിവിധ പ്രദേശങ്ങളിൽ അരമണിക്കൂറിലധികം വൈദ്യുതി മുടങ്ങുന്നത് ജനജീവിതത്തെ സാരമായി ബാധിക്കുന്നുണ്ട്.

പവർ എക്സ്ചേഞ്ചിൽ നിന്ന് ആവശ്യമായ അളവിൽ വൈദ്യുതി ലഭ്യമാകാത്തതും ദേശീയ ഗ്രിഡിലെ ഫ്രീക്വൻസി കുറയുന്നതുമാണ് പ്രതിസന്ധിക്ക് പ്രധാന കാരണം. വൈദ്യുതി ആവശ്യകതയും ലഭ്യതയും തമ്മിലുള്ള അന്തരം വർധിച്ചതോടെ നിയന്ത്രണങ്ങൾ കൂടുതൽ കടുപ്പിക്കേണ്ട സാഹചര്യമാണ് നിലവിലുള്ളത്.അതിനിടെ, സംസ്ഥാനത്ത് ഉയർന്ന ചൂട് തുടരുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. ബുധനാഴ്ച വരെ ഒറ്റപ്പെട്ട പ്രദേശങ്ങളിൽ താപനില സാധാരണയേക്കാൾ 3 മുതൽ 4 ഡിഗ്രി സെൽഷ്യസ് വരെ ഉയരാൻ സാധ്യതയുണ്ട്. കടുത്ത ചൂട് സൂര്യാഘാതം, സൂര്യാതപം, നിർജലീകരണം തുടങ്ങിയ ആരോഗ്യപ്രശ്നങ്ങൾക്ക് കാരണമാകാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് മുന്നറിയിപ്പുണ്ട്.

അതേസമയം, ചൂടിന് നേരിയ ആശ്വാസമായി മറ്റന്നാൾ മുതൽ സംസ്ഥാനത്തിന്റെ ചില ഭാഗങ്ങളിൽ മഴയ്ക്ക് സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചിട്ടുണ്ട്. മഴയെത്തുന്നതോടെ നിലവിലെ ചൂടിന് ശമനമുണ്ടാകുമെന്ന പ്രതീക്ഷയിലാണ് ജനങ്ങൾ.