കേരഫെഡ്–മിൽമ കയറ്റുമതി കരാർ: ടെൻഡർ നടപടികൾ പാലിച്ചില്ലെന്ന് വിജിലൻസ് റിപ്പോർട്ട്

മൂവാറ്റുപുഴ: കേരഫെഡിന്റെയും മിൽമയുടെയും ഉൽപന്നങ്ങൾ വിദേശ വിപണിയിൽ വിൽക്കുന്നതിനും കയറ്റുമതി ചെയ്യുന്നതിനുമായി സ്വകാര്യ സ്ഥാപനമായ മിഡ്‌നൈറ്റ് സൺ ഗ്ലോബലിന് കരാർ നൽകിയതിൽ കൃത്യമായ ടെൻഡർ നടപടികൾ പാലിച്ചില്ലെന്ന് വിജിലൻസിന്റെ പ്രാഥമിക റിപ്പോർട്ട്. മുൻമന്ത്രി കെ.ബി. ഗണേഷ് കുമാറിന്റെ ഭാര്യ ബിന്ദു മേനോനുമായി ബന്ധപ്പെട്ട സ്ഥാപനമാണ് മിഡ്‌നൈറ്റ് സൺ ഗ്ലോബൽ.

ചെഷയർ ടാർസൻ നൽകിയ പരാതിയെത്തുടർന്ന് കോടതി ആവശ്യപ്പെട്ടതനുസരിച്ചാണ് വിജിലൻസ് റിപ്പോർട്ട് സമർപ്പിച്ചത്. കരാർ നൽകുന്നതുമായി ബന്ധപ്പെട്ട നടപടിക്രമങ്ങളിലെ പോരായ്മകൾ റിപ്പോർട്ടിൽ ചൂണ്ടിക്കാട്ടിയിട്ടുണ്ട്. കേസിൽ പൂർണമായ റിപ്പോർട്ട് സമർപ്പിക്കാൻ വിജിലൻസ് ഉദ്യോഗസ്ഥരോട് കോടതി നിർദേശിച്ചു.

കേരഫെഡിന്റെ വെളിച്ചെണ്ണ ദുബായിലും മിൽമയുടെ ഉൽപന്നങ്ങൾ ന്യൂസിലൻഡ്, ഓസ്‌ട്രേലിയ എന്നീ രാജ്യങ്ങളിലും വിപണനം ചെയ്യുന്നതിനുള്ള കരാറുകളാണ് വിവാദത്തിലായത്.

മത്സരാധിഷ്ഠിത ടെൻഡർ നടപടികളോ പരസ്യമായ താൽപര്യപത്രമോ ഇല്ലാതെ കരാർ നൽകിയതിനെച്ചൊല്ലി നേരത്തേ തന്നെ വിമർശനങ്ങൾ ഉയർന്നിരുന്നു. കേരഫെഡിൽനിന്ന് വെളിച്ചെണ്ണ വാങ്ങി ദുബായിലെ സ്ഥാപനത്തിന് കൈമാറുന്നതുൾപ്പെടെയുള്ള ഇടപാടുകളാണ് കരാറിന്റെ ഭാഗമായിരുന്നത്.

വിജിലൻസിന്റെ പ്രാഥമിക റിപ്പോർട്ടിലെ കണ്ടെത്തലുകളുടെ അടിസ്ഥാനത്തിൽ കൂടുതൽ പരിശോധനകൾക്കായാണ് കോടതി പൂർണ റിപ്പോർട്ട് ആവശ്യപ്പെട്ടിരിക്കുന്നത്. കേസ് ഈ മാസം 18ന് വീണ്ടും പരിഗണിക്കും