ബഹ്‌റൈനിൽ ‘പൊന്നോണം 2026’ ഉദ്ഘാടനം ചെയ്ത് കൊടിക്കുന്നിൽ സുരേഷ് എംപി; പ്രവാസി മലയാളികളുടെ സംഭാവനകൾ വിലമതിക്കാനാവാത്തത്

ബഹ്‌റൈൻ: മലയാളത്തിന്റെ മാധുര്യവും കേരളത്തിന്റെ സാംസ്കാരിക പൈതൃകവും വിളിച്ചോതി ഒഐസിസി ബഹ്‌റൈൻ സംഘടിപ്പിച്ച ‘പൊന്നോണം 2026’ കൊടിക്കുന്നിൽ സുരേഷ് എംപി ഉദ്ഘാടനം ചെയ്തു. കേരളത്തിൽനിന്ന് ആയിരക്കണക്കിന് കിലോമീറ്ററുകൾ അകലെ കഴിയുമ്പോഴും മലയാളത്തിന്റെ തനിമയും കേരളത്തിന്റെ പാരമ്പര്യവും ഹൃദയത്തോട് ചേർത്തുപിടിക്കുന്ന പ്രവാസി മലയാളികളുടെ സ്നേഹവും ഐക്യവും ഓണാഘോഷത്തിൽ പ്രകടമായതായി അദ്ദേഹം പറഞ്ഞു.

സമത്വത്തിന്റെയും സാഹോദര്യത്തിന്റെയും മാനവികതയുടെയും സന്ദേശമാണ് ഓണം ലോകത്തിന് നൽകുന്നത്. കേരളത്തിന്റെ സമ്പദ്‌വ്യവസ്ഥയ്ക്കും സാമൂഹിക പുരോഗതിക്കും പ്രവാസി മലയാളികൾ നൽകുന്ന സംഭാവനകൾ വിലമതിക്കാനാവാത്തതാണ്. അവരുടെ അധ്വാനത്തിനും ത്യാഗങ്ങൾക്കും അർഹമായ അംഗീകാരം നൽകുന്നതിനൊപ്പം ക്ഷേമം, സുരക്ഷ, തൊഴിൽ അവകാശങ്ങൾ, മടങ്ങിയെത്തുന്നവരുടെ പുനരധിവാസം എന്നിവ ഉറപ്പാക്കേണ്ടത് നമ്മുടെ ഉത്തരവാദിത്വമാണെന്നും അദ്ദേഹം വ്യക്തമാക്കി.

പ്രവാസലോകത്ത് സാമൂഹിക സേവനത്തിന്റെയും സാംസ്കാരിക ഐക്യത്തിന്റെയും പരസ്പര സഹായത്തിന്റെയും വേദിയായി പ്രവർത്തിക്കുന്ന ഒഐസിസി ബഹ്‌റൈന്റെ പ്രവർത്തനങ്ങളെ കൊടിക്കുന്നിൽ സുരേഷ് അഭിനന്ദിച്ചു. പ്രവാസികൾക്കിടയിൽ ഐക്യവും സൗഹൃദവും ശക്തിപ്പെടുത്തുന്നതിനൊപ്പം കേരളത്തിന്റെ മതേതര മൂല്യങ്ങളും ജനാധിപത്യബോധവും പുതിയ തലമുറയിലേക്ക് പകർന്നുനൽകാനും ഇത്തരം കൂട്ടായ്മകൾക്ക് കഴിയണമെന്നും അദ്ദേഹം പറഞ്ഞു.

മലയാളി എവിടെയായിരുന്നാലും അവന്റെ ഹൃദയത്തിൽ ഒരു കേരളമുണ്ടെന്നും ആ കേരളത്തെ സ്നേഹത്തിന്റെയും ഐക്യത്തിന്റെയും സമത്വത്തിന്റെയും മാനവികതയുടെയും നാടായി നിലനിർത്താൻ എല്ലാവരും ഒരുമിച്ച് മുന്നേറണമെന്നും അദ്ദേഹം ആഹ്വാനം ചെയ്തു.

‘പൊന്നോണം 2026’ സംഘടിപ്പിച്ച ഒഐസിസി ബഹ്‌റൈന്റെ ഭാരവാഹികൾക്കും പ്രവർത്തകർക്കും കുടുംബാംഗങ്ങൾക്കും കൊടിക്കുന്നിൽ സുരേഷ് എംപി അഭിനന്ദനങ്ങളും ഓണാശംസകളും നേർന്നു.