2014 മുതൽ ഇന്ത്യയിൽ ജനാധിപത്യമില്ല; ബിജെപി ഭരണത്തിൽ ജനാധിപത്യ സംവിധാനം തകർത്തെന്ന് രാഹുൽ ഗാന്ധി
തിരഞ്ഞെടുപ്പ് സംവിധാനങ്ങളിലും ഭരണഘടനാ സ്ഥാപനങ്ങളിലും ഇടപെടൽ; ഹൈദരാബാദ് ഭാരത് ഉച്ചകോടിയിൽ കേന്ദ്രസർക്കാരിനെതിരെ രൂക്ഷ വിമർശനം
ഹൈദരാബാദ്: 2014ൽ ബിജെപി അധികാരത്തിലെത്തിയതോടെ ഇന്ത്യയിലെ ജനാധിപത്യ സംവിധാനം തകർന്നുവെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി. ഇന്ന് ഇന്ത്യ യഥാർഥത്തിൽ ജനാധിപത്യ രാജ്യമല്ലെന്നും രാഷ്ട്രീയ സംവിധാനങ്ങളിലും ഭരണഘടനാ സ്ഥാപനങ്ങളിലും വലിയ തോതിലുള്ള ഇടപെടലുകൾ നടക്കുന്നുണ്ടെന്നും അദ്ദേഹം ആരോപിച്ചു. ഹൈദരാബാദിൽ നടന്ന ഭാരത് സമ്മിറ്റ് 2026ൽ സംസാരിക്കുകയായിരുന്നു രാഹുൽ ഗാന്ധി.
2014ലെ ലോക്സഭാ തിരഞ്ഞെടുപ്പിന് ശേഷം ഇന്ത്യൻ രാഷ്ട്രീയത്തിൽ സംഭവിച്ച മാറ്റങ്ങൾ തിരിച്ചറിയാൻ പ്രതിപക്ഷത്തിന് ഏറെ സമയമെടുത്തുവെന്ന് അദ്ദേഹം പറഞ്ഞു. പരമ്പരാഗതമായ തിരഞ്ഞെടുപ്പ് മത്സരരീതികൾ മാറുകയും വലിയ തോതിലുള്ള പണം രാഷ്ട്രീയ സംവിധാനത്തിലേക്ക് ഒഴുകിയെത്തുകയും ചെയ്തു. ഇതോടെ തിരഞ്ഞെടുപ്പ് രാഷ്ട്രീയത്തിന്റെ സ്വഭാവം തന്നെ മാറിയെന്നും അദ്ദേഹം ചൂണ്ടിക്കാട്ടി.

തിരഞ്ഞെടുപ്പ് പ്രക്രിയയുടെ വിശ്വാസ്യതയെയും രാഹുൽ ഗാന്ധി ചോദ്യം ചെയ്തു. തിരഞ്ഞെടുപ്പ് കമ്മീഷന്റെ വോട്ടർപട്ടികയിലെ പ്രത്യേക തീവ്ര പുതുക്കൽ നടപടിയായ എസ്.ഐ.ആർ വഴി 14 കോടി വോട്ടർമാരെ ഇല്ലാത്തവരായോ അയോഗ്യരായോ മാറ്റിയെന്ന് അദ്ദേഹം അവകാശപ്പെട്ടു. 2024ലെ ലോക്സഭാ തിരഞ്ഞെടുപ്പിൽ വോട്ട് ചെയ്തവരിൽ ചിലരെ പിന്നീട് വോട്ടർപട്ടികയിൽ നിന്ന് നീക്കം ചെയ്തതായും ആരോപിച്ചു.

മഹാരാഷ്ട്ര നിയമസഭാ തിരഞ്ഞെടുപ്പിനെ ഉദാഹരണമായി ചൂണ്ടിക്കാട്ടിയ അദ്ദേഹം, ലോക്സഭാ തിരഞ്ഞെടുപ്പിനും നിയമസഭാ തിരഞ്ഞെടുപ്പിനും ഇടയിൽ വെറും മൂന്ന് മാസത്തിനുള്ളിൽ 70 ലക്ഷം പുതിയ വോട്ടർമാരെ പട്ടികയിൽ ഉൾപ്പെടുത്തിയെന്നും ഇവരെല്ലാം ബിജെപിക്കാണ് വോട്ട് ചെയ്തതെന്നും ആരോപിച്ചു. സമാനമായ ക്രമക്കേടുകൾ മറ്റ് സംസ്ഥാനങ്ങളിലും ഉണ്ടായിട്ടുണ്ടെന്നാണ് അദ്ദേഹത്തിന്റെ അവകാശവാദം.
രാഷ്ട്രീയ അധികാരവും വൻകിട വ്യവസായ താൽപര്യങ്ങളും തമ്മിലുള്ള ബന്ധത്തെയും രാഹുൽ ഗാന്ധി വിമർശിച്ചു. പ്രധാനമന്ത്രി നരേന്ദ്ര മോദിയും വ്യവസായി ഗൗതം അദാനിയും തമ്മിലുള്ള ബന്ധം ചൂണ്ടിക്കാട്ടിയ അദ്ദേഹം, ബിജെപിയുടെ സാമ്പത്തിക സ്വാധീനം കഴിഞ്ഞ ഒരു ദശാബ്ദത്തിനിടെ പതിനൊന്ന് മടങ്ങ് വർധിച്ചതായും അവകാശപ്പെട്ടു.

രാഷ്ട്രീയത്തിൽ ചിലർ എല്ലാം അറിയാമെന്ന ഭാവത്തിൽ മറ്റുള്ളവരെ കേൾക്കാനോ തെറ്റുകൾ അംഗീകരിക്കാനോ തയ്യാറാകുന്നില്ലെന്നും ഇത്തരക്കാരെയാണ് ഫാസിസ്റ്റുകളെന്ന് വിളിക്കുന്നതെന്നും രാഹുൽ ഗാന്ധി പറഞ്ഞു. മറ്റുള്ളവരെ കേൾക്കുന്നതിനുപകരം ഉച്ചത്തിൽ സംസാരിക്കുകയും നിലവിളിക്കുകയും ചെയ്യുന്നതാണ് അവരുടെ രീതിയെന്നും അദ്ദേഹം വിമർശിച്ചു.
ഭാരത് സമ്മിറ്റിൽ പങ്കെടുക്കാനെത്തേണ്ടിയിരുന്ന വിദേശ പ്രതിനിധികൾക്ക് വിസ നിഷേധിച്ചതും വിസ റദ്ദാക്കിയതും കേന്ദ്രസർക്കാരിന്റെ നടപടിയാണെന്ന് ആരോപിച്ച രാഹുൽ ഗാന്ധി, സമ്മേളനത്തിൽ പങ്കെടുക്കാൻ കഴിയാതിരുന്നവരോട് ക്ഷമാപണം നടത്തുകയും ചെയ്തു.
തെലങ്കാന സർക്കാർ സംഘടിപ്പിച്ച രണ്ട് ദിവസത്തെ ഭാരത് സമ്മിറ്റിൽ വിവിധ രാജ്യങ്ങളിൽ നിന്നുള്ള രാഷ്ട്രീയ നേതാക്കളും നയരൂപകർത്താക്കളും ചിന്തകരും പങ്കെടുത്തു.
What's Your Reaction?
Like
0
Dislike
0
Love
0
Funny
0
Wow
0
Sad
0
Angry
0
Comments (0)