ഇടുക്കിയിൽ മകനെ കുത്തിക്കൊലപ്പെടുത്തി അച്ഛൻ ആത്മഹത്യയ്ക്ക് ശ്രമിച്ചു

ഇടുക്കി: ആനക്കുളം സ്വദേശിയായ 27കാരൻ ജസ്റ്റിൻ ജോയിയെ പിതാവ് ജോയി കുത്തിക്കൊലപ്പെടുത്തി. കൊലപാതകത്തിന് പിന്നാലെ ജോയി വിഷം കഴിച്ച് ആത്മഹത്യയ്ക്ക് ശ്രമിച്ചു. ഗുരുതരാവസ്ഥയിൽ ജോയിയെ അടിമാലി താലൂക്ക് ആശുപത്രിയിൽ പ്രവേശിപ്പിച്ച് ചികിത്സ നൽകി വരികയാണ്.

ജസ്റ്റിന്റെ ലഹരി ഉപയോഗവും ഇതിനെ തുടർന്നുണ്ടായിരുന്ന കുടുംബപ്രശ്നങ്ങളുമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക നിഗമനം. ജസ്റ്റിൻ മദ്യം ഉൾപ്പെടെയുള്ള ലഹരിവസ്തുക്കൾ ഉപയോഗിച്ച ശേഷം വീട്ടിലെത്തി പ്രശ്നങ്ങൾ സൃഷ്ടിച്ചിരുന്നതായി പ്രദേശവാസികൾ പൊലീസിനോട് പറഞ്ഞു.

കൊലപാതകത്തിന് ശേഷം വിഷം കഴിച്ച വിവരം ജോയി പ്രദേശവാസികളോട് പറഞ്ഞതായാണ് വിവരം. തുടർന്ന് നാട്ടുകാരും പൊലീസും ചേർന്നാണ് ഇയാളെ ആശുപത്രിയിലെത്തിച്ചത്. പ്രാഥമിക ചികിത്സയ്ക്ക് ശേഷം ജോയിയുടെ ആരോഗ്യനില സംബന്ധിച്ച് കൂടുതൽ വ്യക്തത ലഭിക്കുമെന്നാണ് പ്രതീക്ഷ.

മാങ്കുളം എയ്ഡ് പോസ്റ്റിലെ പൊലീസാണ് ആദ്യം സംഭവസ്ഥലത്തെത്തിയത്. മൂന്നാർ സി.ഐയുടെ നേതൃത്വത്തിലുള്ള പൊലീസ് സംഘം സ്ഥലത്തെത്തി അന്വേഷണം ആരംഭിച്ചു. ഇൻക്വസ്റ്റ് നടപടികൾ പൂർത്തിയാക്കിയ ശേഷം ജസ്റ്റിന്റെ മൃതദേഹം പോസ്റ്റ്മോർട്ടത്തിനായി ഇടുക്കി മെഡിക്കൽ കോളേജിലേക്ക് മാറ്റും.

സംഭവസമയത്ത് ജസ്റ്റിനും പിതാവ് ജോയിയും മാത്രമാണ് വീട്ടിലുണ്ടായിരുന്നതെന്നാണ് പ്രദേശവാസികളുടെ മൊഴി. ജോയിയെ ചോദ്യം ചെയ്താൽ മാത്രമേ കൊലപാതകത്തിന്റെ കൂടുതൽ വിശദാംശങ്ങൾ വ്യക്തമാകൂ. അന്വേഷണം പുരോഗമിക്കുകയാണ്.