ട്രാൻസ്ഫോർമറിലെ ഫ്യൂസ് ഊരി വൈദ്യുതി മുടക്കിയ സംഭവം; പ്രതി പുതുച്ചേരിയിൽ പിടിയിൽ

പറവൂർ: കൈതാരം നോർത്ത് ട്രാൻസ്ഫോർമറിൽ നിന്ന് ഫ്യൂസ് ഊരി വൈദ്യുതി വിതരണം തടസ്സപ്പെടുത്തിയ കേസിൽ പ്രതിയെ പറവൂർ പൊലീസ് പുതുച്ചേരിയിൽ നിന്ന് പിടികൂടി. കൈതാരം കളത്തിപ്പറമ്പിൽ (കാടയിൽ) കെ.എം. വിഷ്ണു (34) ആണ് അറസ്റ്റിലായത്.

കഴിഞ്ഞ മാസമാണ് കൈതാരം നോർത്ത് ട്രാൻസ്ഫോർമറിൽ നിന്ന് വിഷ്ണു ഫ്യൂസ് ഊരിമാറ്റിയത്. നിശ്ചിത സമയത്തെ പവർകട്ട് മൂലമുള്ള വൈദ്യുതി മുടക്കം സംബന്ധിച്ച് പരാതികൾ നിലനിൽക്കുന്നതിനിടെയായിരുന്നു സംഭവം. ഫ്യൂസ് ഊരിയതോടെ പ്രദേശത്ത് മണിക്കൂറുകളോളം വൈദ്യുതി വിതരണം തടസ്സപ്പെട്ടു. സംഭവം വലിയ വിവാദത്തിനും വഴിവെച്ചിരുന്നു.

കെഎസ്ഇബി ഏഴിക്കര സെക്ഷൻ അധികൃതർ നൽകിയ പരാതിയുടെ അടിസ്ഥാനത്തിലാണ് പൊലീസ് കേസെടുത്തത്. സിസിടിവി ദൃശ്യങ്ങൾ പരിശോധിച്ചാണ് ഫ്യൂസ് ഊരിയ ആളെ തിരിച്ചറിഞ്ഞത്. സംഭവത്തിന് ഒരു വീട്ടമ്മയും ദൃക്സാക്ഷിയായിരുന്നു.

പ്രതി സിപിഎം പ്രവർത്തകനാണെന്ന് കോൺഗ്രസ് ആരോപിച്ചിരുന്നു. എന്നാൽ, ആദ്യ എഫ്ഐആറിൽ പ്രതിയുടെ പേര് ഉൾപ്പെടുത്തിയിരുന്നില്ല. ഇതിനിടെ വിഷ്ണു കേരളം വിട്ടിരുന്നു. തുടർന്നാണ് ഇയാളെ പുതുച്ചേരിയിൽ നിന്ന് പിടികൂടിയത്.

ഏഴിക്കര സെക്ഷന്റെ പരിധിയിലുള്ള ചാകാത്തറ, ആവൂട്ടി പ്രദേശങ്ങളിലും സമാനമായ രീതിയിൽ ട്രാൻസ്ഫോർമറുകളിലെ ഫ്യൂസുകൾ ഊരിമാറ്റിയ സംഭവങ്ങൾ റിപ്പോർട്ട് ചെയ്തിരുന്നു. ഈ സംഭവങ്ങൾ തമ്മിൽ ബന്ധമുണ്ടോയെന്ന കാര്യത്തിൽ വ്യക്തതയില്ല.