‘ഒരിക്കൽ ശരിയെന്ന് തോന്നിയതെല്ലാം എക്കാലവും ശരിയാകണമെന്നില്ല’; സിപിഎമ്മുമായുള്ള അകൽച്ചയുടെ സൂചനകളുമായി പി.പി. ദിവ്യ

കണ്ണൂർ: സിപിഎമ്മുമായുള്ള അകൽച്ചയുടെ സൂചനകൾ നൽകുന്ന ഫെയ്സ്ബുക്ക് കുറിപ്പുമായി കണ്ണൂർ ജില്ലാ പഞ്ചായത്ത് മുൻ പ്രസിഡന്റും സിപിഎം നേതാവുമായിരുന്ന പി.പി. ദിവ്യ. ‘ഒരിക്കൽ ശരിയെന്ന് തോന്നിയതെല്ലാം എക്കാലവും ശരിയായിരിക്കണമെന്നില്ല’ എന്ന സന്ദേശത്തോടെയാണ് ദിവ്യയുടെ കുറിപ്പ്. രാഷ്ട്രീയ ജീവിതത്തിലെ അനുഭവങ്ങളും നിലപാടുകളും പങ്കുവയ്ക്കുന്ന തുടർ കുറിപ്പുകളുടെ മുന്നോടിയായാണ് പുതിയ പോസ്റ്റ് വിലയിരുത്തപ്പെടുന്നത്.

ഒരു കരയിൽനിന്ന് മറുകരയിലെത്താൻ സഹായിച്ച ചങ്ങാടം ജീവിതകാലം മുഴുവൻ ചുമന്നുനടക്കേണ്ടതില്ലെന്ന ബുദ്ധന്റെ കഥയാണ് ദിവ്യ തന്റെ കുറിപ്പിൽ വിവരിക്കുന്നത്. നമ്മെ ഒരു ഘട്ടത്തിൽ സഹായിച്ച കാര്യങ്ങൾ പിന്നീട് മുന്നോട്ടുള്ള യാത്രയ്ക്ക് തടസ്സമായേക്കാമെന്നും അവ ഉപേക്ഷിക്കുന്നത് നന്ദികേടല്ല, ജീവിതം പഠിപ്പിച്ച പാഠം തിരിച്ചറിയലാണെന്നും അവർ കുറിക്കുന്നു.

“ഒരിക്കൽ നമ്മെ ചേർത്തുപിടിച്ച ചില ബന്ധങ്ങൾ ഇന്ന് നമ്മെ വേദനിപ്പിക്കുന്നുണ്ടാകാം. ഒരുകാലത്ത് തുണയായിരുന്ന ചില ശീലങ്ങൾ ഇന്ന് നമ്മുടെ മുന്നോട്ടുള്ള യാത്രയ്ക്ക് തടസ്സമാകുന്നുണ്ടാകാം” എന്ന വാക്കുകളും കുറിപ്പിലുണ്ട്. സത്യത്തിന്റെയും നീതിയുടെയും വില തിരിച്ചറിയാനും ബന്ധങ്ങളുടെ ആഴം മനസ്സിലാക്കാനും ജീവിതാനുഭവങ്ങൾ സഹായിച്ചുവെന്നും ദിവ്യ പറയുന്നു.

പാർട്ടിയുമായുള്ള ബന്ധത്തെക്കുറിച്ചുള്ള ചർച്ചകൾക്ക് വഴിവെച്ച് കുറിപ്പ്

കണ്ണൂർ എഡിഎം ആയിരുന്ന കെ. നവീൻ ബാബുവിന്റെ ആത്മഹത്യയുമായി ബന്ധപ്പെട്ട വിവാദങ്ങൾക്കു പിന്നാലെയാണ് ദിവ്യ ജില്ലാ പഞ്ചായത്ത് പ്രസിഡന്റ് സ്ഥാനത്തുനിന്ന് രാജിവെച്ചത്. സംഭവത്തിൽ പാർട്ടിക്കുള്ളിലും ദിവ്യക്കെതിരെ വിമർശനങ്ങളുയർന്നിരുന്നു. തുടർന്ന് സിപിഎമ്മിൽ ദിവ്യയുടെ സംഘടനാ പദവിയിൽ തരംതാഴ്ത്തലുണ്ടായി.

അടുത്തിടെ നടന്ന സിപിഎമ്മിന്റെ കണ്ണൂർ വിശാല ജില്ലാ കമ്മിറ്റി യോഗത്തിലും ദിവ്യയ്ക്ക് അർഹമായ പരിഗണന ലഭിച്ചില്ലെന്ന തരത്തിലുള്ള റിപ്പോർട്ടുകൾ പുറത്തുവന്നിരുന്നു. ഈ സാഹചര്യത്തിൽ, ബന്ധങ്ങൾ ഉപേക്ഷിക്കുന്നതിനെക്കുറിച്ചും പഴയ നിലപാടുകൾ തിരുത്തുന്നതിനെക്കുറിച്ചും പരോക്ഷമായി പറയുന്ന പുതിയ കുറിപ്പ് രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്.

‘നീതി വൈകിയേക്കാം, പക്ഷേ സത്യത്തിന്റെ ശബ്ദം മങ്ങില്ല’

തന്റെ ജീവിതാനുഭവങ്ങളും മനുഷ്യബന്ധങ്ങളും നീതിയെക്കുറിച്ചുള്ള ചിന്തകളും തുടർ കുറിപ്പുകളിലൂടെ പങ്കുവയ്ക്കാനാണ് ഉദ്ദേശിക്കുന്നതെന്നും ദിവ്യ വ്യക്തമാക്കുന്നു.

“ഓരോ കഥയ്ക്കു പിന്നിലും ഒരു ജീവിതമുണ്ട്... ഓരോ ജീവിതത്തിനുള്ളിലും പറയാതെപോയ ഒരു സത്യവുമുണ്ട്” എന്ന സന്ദേശത്തോടെയാണ് കുറിപ്പ് മുന്നോട്ടുപോകുന്നത്.

“Justice may be delayed, but the voice of truth will never fade” — നീതി വൈകിയേക്കാം, പക്ഷേ സത്യത്തിന്റെ ശബ്ദം ഒരിക്കലും മങ്ങില്ല — എന്ന വാചകവും കുറിപ്പിന്റെ അവസാന ഭാഗത്തുണ്ട്.

കുറിപ്പിലെ പരാമർശങ്ങൾ തന്റെ രാഷ്ട്രീയ ജീവിതത്തിലെ അനുഭവങ്ങളുമായി ബന്ധപ്പെട്ടതാണോ എന്ന കാര്യത്തിൽ ദിവ്യ കൂടുതൽ വിശദീകരണം നൽകിയിട്ടില്ല. എന്നിരുന്നാലും, സിപിഎമ്മുമായുള്ള ബന്ധം സംബന്ധിച്ച ചർച്ചകൾക്കിടയിൽ പുറത്തുവന്ന ഈ കുറിപ്പ് രാഷ്ട്രീയ ശ്രദ്ധ നേടുകയാണ്.