വൈക്കത്ത് അഴിമതിയുടെ ഉസ്താദ്; സി.ഐ. ഷമീർ ഖാന് സസ്പെൻഷൻ

വേലി തന്നെ വിളവ് തിന്നുന്ന ക്രൂരമായ കാഴ്ചയാണ് വൈക്കം സി.ഐ. ഷമീർ ഖാനിലൂടെ കേരളം വീണ്ടും കണ്ടത്. ക്രമസമാധാനം സംരക്ഷിക്കേണ്ട യൂണിഫോം ധരിച്ച ഒരു ഉദ്യോഗസ്ഥൻ തന്നെ രാജ്യത്തിന്റെ നിയമങ്ങളെല്ലാം കാറ്റിൽപ്പറത്തി ഏറ്റവും ആസൂത്രിതമായ രീതിയിൽ അഴിമതിയുടെ ഉസ്താദായി മാറുന്ന ഞെട്ടിക്കുന്ന വിവരങ്ങളാണ് പുറത്തുവന്നിരിക്കുന്നത്. സ്റ്റേഷനിൽ എത്തുന്ന സാധാരണക്കാരുടെയും ടിപ്പർ ലോറി ഉടമകളുടെയും മണ്ണ് കടത്ത് സംഘങ്ങളുടെയും കണ്ണീരിൽ കുതിർന്ന പണം തട്ടിയെടുക്കാൻ ഇയാൾ കണ്ടെത്തിയ വഴി ആരെയും ഒന്നു ഞെട്ടിക്കും. അസം സ്വദേശിയായ ജോഗത് ജൊഗോയി എന്ന പാവം തൊഴിലാളിയുടെ പേരിൽ രേഖകൾ സംഘടിപ്പിച്ച് ബാങ്ക് അക്കൗണ്ടും വൈക്കം സ്വദേശിയായ അരുണിന്റെ ആധാർ വിവരങ്ങളും ഫോൺ നമ്പറും ഉപയോഗിച്ച് എ.ടി.എം. കാർഡും ഗൂഗിൾ പേ സംവിധാനവും ഉണ്ടാക്കി. അങ്ങനെ മറ്റുള്ളവരുടെ പേരിൽ കരുക്കൾ നീക്കി വെറും നാളുകൾക്കുള്ളിൽ ലക്ഷങ്ങൾ സ്വന്തമാക്കുക വഴി താൻ എത്രകണ്ട് കുറ്റവാളിയാണെന്ന് ഈ ഉദ്യോഗസ്ഥൻ തെളിയിക്കുകയായിരുന്നു.

ആരും സംശയിക്കാത്ത തരത്തിൽ മാസ്കും ഹെൽമെറ്റും ധരിച്ച് ബൈക്കിൽ വന്ന് എ.ടി.എമ്മിൽ നിന്ന് പണം പിൻവലിക്കുന്ന ഒരു സിനിമാക്കഥയെ വെല്ലുന്ന ക്രിമിനൽ ബുദ്ധിയാണ് ഇയാൾ പുറത്തെടുത്തത്. കഴിഞ്ഞ സെപ്റ്റംബർ ആദ്യം വൈക്കം സി.ഐ. ആയി ചുമതലയേറ്റതുമുതൽ ആരംഭിച്ച ഈ തട്ടിപ്പിലൂടെ വെറും 45 ദിവസത്തിനുള്ളിൽ 2.28 ലക്ഷം രൂപയാണ് ഇത്തരത്തിൽ അക്കൗണ്ടിലേക്ക് എത്തിയത്. കേരളത്തിൽ സർക്കാരും ആഭ്യന്തര വകുപ്പും ലഹരി മാഫിയകൾക്കെതിരെയും ക്രമക്കേടുകൾക്കെതിരെയും ശക്തമായ നടപടികൾ സ്വീകരിച്ച് മുന്നോട്ടുപോകുമ്പോഴാണ് സ്വന്തം സേനയ്ക്കുള്ളിൽ ഇത്തരത്തിലുള്ള കറുത്ത ആടുകൾ അഴിമതിയുടെ ആഴം കൂട്ടുന്നത്. അധികാരത്തിന്റെ തണലിൽ എന്തും ചെയ്യാം എന്ന അഹങ്കാരവും പിടിക്കപ്പെടില്ലെന്ന അടിയുറച്ച ആത്മവിശ്വാസവുമാണ് ഇത്തരം ഉദ്യോഗസ്ഥരെ നയിക്കുന്നത്. ഒടുവിൽ ജില്ലാ പൊലീസ് മേധാവി സാബു മാത്യുവിന്റെ റിപ്പോർട്ടിന്റെയും സ്പെഷ്യൽ ബ്രാഞ്ച്, ഇന്റലിജൻസ് വിഭാഗങ്ങൾ എന്നിവയുടെ മുന്നറിയിപ്പിന്റെയും അടിസ്ഥാനത്തിൽ വിജിലൻസിന്റെ മിന്നൽ പരിശോധനയിലൂടെ ആ പ്ലാനുകളെല്ലാം തകരുകയും, കൈക്കൂലി വാങ്ങിയ എ.ടി.എം. കാർഡും രേഖകളും ഫോണും സഹിതം ഇയാൾ കുടുങ്ങുകയും ചെയ്തത് ഈ നാടിന്റെ നീതിബോധത്തിന് അല്പമെങ്കിലും ആശ്വാസം നൽകുന്നതാണ്.

ചെമ്മീൻ ചാടിയാൽ മുട്ടോളം പിന്നെയും ചാടിയാൽ ചട്ടിയോളം എന്ന് പറയുന്നതുപോലെ, അഴിമതിയുടെ അഴുക്കുചാലിൽ മുങ്ങിത്താണ ഈ പോലീസുകാരന് ഒടുവിൽ വിജിലൻസ് റിപ്പോർട്ടിന്റെ അടിസ്ഥാനത്തിൽ ഡി.ജി.പിയുടെ സസ്പെൻഷൻ പൂട്ടുവീണിരിക്കുകയാണ്. യൂണിഫോമിന്റെ പവിത്രതയെ കാറ്റിൽപ്പറത്തി സാധാരണക്കാരുടെ ജീവിതം വെച്ച് ചൂതാട്ടം നടത്തിയവർക്ക് കടുത്ത ശിക്ഷ തന്നെ ലഭിക്കേണ്ടതുണ്ട്. നിയമം നടപ്പാക്കേണ്ടവർ തന്നെ നിയമവിരുദ്ധമായി പണം വാരിക്കൂട്ടുമ്പോൾ അത് ബാക്കി നിൽക്കുന്ന നല്ലവരായ പോലീസുകാരുടെ കൂടി മുഖത്തേറ്റ അടിയാണ്. ഏതായാലും അപൂർവങ്ങളിൽ അപൂർവമായി മാത്രം കാണുന്ന ഇത്തരം തട്ടിപ്പുകൾ പൊതുസമൂഹത്തിന് നൽകുന്ന സന്ദേശം വളരെ വലുതാണ്. എത്ര വലിയ ബുദ്ധിപൂർവമായ നീക്കങ്ങൾ നടത്തിയാലും നിയമത്തിന്റെ മുന്നിൽ നിന്നും വിജിലൻസിന്റെ കണ്ണുകളിൽ നിന്നും രക്ഷപ്പെടാൻ ആർക്കും ആകില്ലെന്ന് ഷമീർ ഖാന്റെ ഈ സസ്പെൻഷൻ ശക്തമായ ഒരു ഓർമ്മപ്പെടുത്തലായി മാറുകയാണ്.