രാഹുൽ ഗാന്ധിക്കെതിരായ ആക്രമണത്തിൽ പ്രതിഷേധം; കാഞ്ഞങ്ങാട്ട് റോഡ് ഉപരോധിച്ച് ഡി.സി.സി
ജില്ലാ കോൺഗ്രസ് കമ്മിറ്റി നേതൃത്വത്തിൽ പ്രതിഷേധം; പി. കെ. ഫൈസൽ ഉദ്ഘാടനം ചെയ്തു, ബി. പി. പ്രദീപ് കുമാർ അധ്യക്ഷത വഹിച്ചു
Desk Mediagraamam 
രാഹുൽ ഗാന്ധിക്കെതിരായ ആക്രമണത്തിൽ പ്രതിഷേധം; കാഞ്ഞങ്ങാട്ട് റോഡ് ഉപരോധിച്ച് ജില്ലാ കോൺഗ്രസ് കമ്മിറ്റി
ലോക്സഭ പ്രതിപക്ഷ നേതാവ് രാഹുൽ ഗാന്ധിക്കെതിരായ ആക്രമണത്തിൽ പ്രതിഷേധിച്ച് രാജ്യവ്യാപകമായി കോൺഗ്രസ് സംഘടിപ്പിക്കുന്ന പ്രതിഷേധങ്ങളുടെ ഭാഗമായി കാസർകോട് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ കാഞ്ഞങ്ങാട്ട് റോഡ് ഉപരോധ സമരം സംഘടിപ്പിച്ചു.
ഡി.സി.സി വൈസ് പ്രസിഡന്റ് ബി. പി. പ്രദീപ് കുമാർ അധ്യക്ഷത വഹിച്ചു. ഡി.സി.സി ജനറൽ സെക്രട്ടറി അഡ്വ. പി. വി. സുരേഷ് സ്വാഗതം പറഞ്ഞു. ജില്ലാ കോൺഗ്രസ് കമ്മിറ്റി പ്രസിഡന്റ് പി. കെ. ഫൈസൽ സമരം ഉദ്ഘാടനം ചെയ്തു.
ജനാധിപത്യത്തിന്റെ ശബ്ദമായ പ്രതിപക്ഷ നേതാവിനെ ആക്രമിക്കുകയും പ്രതിഷേധങ്ങളെ ബലപ്രയോഗത്തിലൂടെ അടിച്ചമർത്താൻ ശ്രമിക്കുകയും ചെയ്യുന്നത് ഭരണഘടനാ മൂല്യങ്ങൾക്കും ജനാധിപത്യത്തിനുമെതിരായ കടന്നാക്രമണമാണെന്ന് ഉദ്ഘാടന പ്രസംഗത്തിൽ പി. കെ. ഫൈസൽ പറഞ്ഞു. ജനാധിപത്യ അവകാശങ്ങൾ സംരക്ഷിക്കുന്നതിനായുള്ള പോരാട്ടം ശക്തമായി തുടരുമെന്നും അദ്ദേഹം വ്യക്തമാക്കി.
പ്രതിഷേധത്തിൽ കോൺഗ്രസ് നേതാക്കളും യു.ഡി.എഫ് ഘടകകക്ഷി പ്രതിനിധികളും മഹിളാ കോൺഗ്രസ്, യൂത്ത് കോൺഗ്രസ്, കെ.എസ്.യു, സേവാദൾ ഉൾപ്പെടെയുള്ള പോഷകസംഘടനകളുടെ പ്രവർത്തകരും പങ്കെടുത്തു. റോഡ് ഉപരോധത്തെ തുടർന്ന് ദേശീയപാതയിൽ കുറച്ചുസമയം ഗതാഗതം തടസ്സപ്പെട്ടെങ്കിലും പിന്നീട് പൊലീസ് ഇടപെട്ട് ഗതാഗതം പുനഃസ്ഥാപിച്ചു.
