അജിത്കുമാറിനെ മടയിൽ കയറിയടിച്ച് ഷൗക്കത്തലി ; കയ്യടിച്ച് മുഖ്യൻ
നവകേരള യാത്രയ്ക്കിടയിലെ ഗൺമാൻമാരുടെ മർദ്ദനക്കേസിൽ അന്വേഷണ നടപടികൾ ശക്തമാകുന്നു. എ.ഡി.ജി.പി. എം.ആർ. അജിത് കുമാറിനെതിരായ ആരോപണങ്ങളും തുടർ നടപടികളും രാഷ്ട്രീയ ചർച്ചകൾക്ക് വഴിവെക്കുന്നു.
അർഷ കെ.എസ് 
നവകേരള യാത്രയിലെ ആ ക്രൂരമായ 'രക്ഷാപ്രവർത്തനം' കേരളം മറന്നിട്ടില്ല! തെരുവിൽ ചോരചിന്തിയ പ്രതിഷേധക്കാരെ തല്ലിച്ചതച്ച മുൻ മുഖ്യമന്ത്രിയുടെ ഗൺമാൻമാരെ സംരക്ഷിക്കാൻ ഭരണകൂടവും പോലീസിലെ ഉന്നതരും കാണിച്ച അതിരുകടന്ന നെറികേടിനാണ് ഇപ്പോൾ അതിശക്തമായ തിരിച്ചടി കിട്ടിയിരിക്കുന്നത്. അന്ന് നടന്ന നഗ്നമായ നീതികേടിനെയും ക്രിമിനൽ മർദ്ദനങ്ങളെയും അതിസമർത്ഥമായി അട്ടിമറിക്കാൻ നോക്കിയവർ തന്നെ ഇപ്പോൾ സ്വന്തം വലയിൽ കുരുങ്ങി നാണംകെട്ട് നിൽക്കുകയാണ്. സ്വന്തം പദവിയും അധികാരവും ഉപയോഗിച്ച് കേസ് അട്ടിമറിക്കാൻ നേതൃത്വം നൽകിയ എ.ഡി.ജി.പി. എം.ആർ. അജിത് കുമാറിനെതിരെ വകുപ്പുതല നടപടിയും തുടരന്വേഷണവും പ്രഖ്യാപിക്കാൻ ആഭ്യന്തരവകുപ്പ് ഇന്ന് നിർബന്ധിതരായിരിക്കുകയാണ്.കേസ് ഡയറി തിരുത്താനും അന്വേഷണ ഉദ്യോഗസ്ഥരെ ഭീഷണിപ്പെടുത്തി മുൻ മുഖ്യമന്ത്രിയുടെ ആൾക്കാരെ രക്ഷിച്ചെടുക്കാനും എ.ഡി.ജി.പി.യുടെ ഓഫീസ് കേന്ദ്രീകരിച്ച് നടന്നത് കേവലം ക്രമക്കേടല്ല, മറിച്ച് ഗുരുതരമായ ക്രിമിനൽ ഗൂഢാലോചനയാണ്. തങ്ങൾക്ക് എതിരായ റിപ്പോർട്ട് തിരുത്താൻ വിസമ്മതിച്ച ഉദ്യോഗസ്ഥരെ ഭീഷണിപ്പെടുത്തി റഫർ റിപ്പോർട്ട് തയ്യാറാക്കാൻ സമ്മർദ്ദം ചെലുത്തിയെന്ന വസ്തുത വെളിച്ചത്തു വന്നതോടെ പോലീസിന്റെ മുഖംമൂടിയാണ് പൂർണ്ണമായും അഴിഞ്ഞുവീണത്. സ്വന്തം ഓഫീസിലെ ഗ്രേഡ് എസ്.ഐ.മാരെപ്പോലും ഉപയോഗിച്ച് കേസ് രേഖകളിൽ കൃത്രിമം കാണിക്കാൻ തുനിഞ്ഞിറങ്ങിയ എ.ഡി.ജി.പി. അജിത് കുമാറിന്റെ നടപടി സംസ്ഥാന പോലീസ് സേനയ്ക്ക് തന്നെ വലിയ നാണക്കേടാണ് ഉണ്ടാക്കിയത്.പക്ഷേ, അധികാരം തലയ്ക്കുപിടിച്ച ഉന്നതരുടെ ആ തട്ടിപ്പും ഭീഷണിയും അധികകാലം നീണ്ടുനിന്നില്ല! ഈ അട്ടിമറി നാടകങ്ങളെയെല്ലാം തല്ലിത്തകർത്ത്, സത്യം പുറത്തുകൊണ്ടുവരാൻ ഉറച്ചുനിന്ന ഡിവൈ.എസ്.പി. ഷൗക്കത്തലിയുടെയും പ്രത്യേക അന്വേഷണ സംഘത്തിന്റെയും കൃത്യമായ നീക്കങ്ങളാണ് എ.ഡി.ജി.പി. അജിത് കുമാറിനെ പൂർണ്ണമായും പൂട്ടിയിരിക്കുന്നത്. അന്വേഷണ ഉദ്യോഗസ്ഥരെ മൂന്നുതവണ രഹസ്യമായി വിളിച്ചുവരുത്തി ഭീഷണിപ്പെടുത്തിയതിന്റെയും കേസ് രേഖകളിൽ തിരുത്തലുകൾ വരുത്തിയതിന്റെയും ഡിജിറ്റൽ തെളിവുകളും മൊഴികളും ഡിവൈ.എസ്.പി. ഷൗക്കത്തലി കൃത്യമായി പുറത്തെടുത്തു. ഈ ശക്തമായ തെളിവുകൾക്ക് മുന്നിൽ എ.ഡി.ജി.പി. പണിതുയർത്തിയ പ്രതിരോധങ്ങളെല്ലാം തവിടുപൊടിയായി.ഇപ്പോൾ താൻ വയനാട്ടിലായിരുന്നു എന്നും ആരെയും ഓഫീസിലേക്ക് വിളിച്ചുവരുത്തിയിട്ടില്ലെന്നുമൊക്കെ പ്രിലിമിനറി മറുപടി നൽകി രക്ഷപ്പെടാൻ അജിത് കുമാർ നെട്ടോട്ടമോടുകയാണ്.
എന്നാൽ, ഷൗക്കത്തലി ഒരുക്കിവെച്ച തെളിവുകളുടെ പൂട്ട് അത്രയ്ക്കും ശക്തമാണ്. വരാനിരിക്കുന്ന ഡി.ജി.പി. പദവിയിലേക്കുള്ള സ്ഥാനക്കയറ്റവും വിജിലൻസ് ക്ലിയറൻസും തടസ്സപ്പെട്ട് സർവ്വീസിന്റെ അവസാനകാലത്ത് നാണംകെട്ടു നിൽക്കുന്ന അജിത് കുമാറിന്റെ അവസ്ഥ, അനീതിക്ക് കൂട്ടുനിൽക്കുന്ന ഏതൊരു ഉദ്യോഗസ്ഥനും വലിയൊരു താക്കീതാണ്. അധികാരത്തിനും രാഷ്ട്രീയ സമ്മർദ്ദങ്ങൾക്കും മുന്നിൽ നട്ടെല്ലു വളയ്ക്കാതെ, ഉന്നതനായ എ.ഡി.ജി.പി.യെ കൃത്യമായി പൂട്ടി നിയമത്തിന് മുന്നിൽ മുട്ടുകുത്തിച്ച അന്വേഷണ ഉദ്യോഗസ്ഥൻ ഷൗക്കത്തലിയുടെ ആർജ്ജവം സത്യസന്ധരായ ഉദ്യോഗസ്ഥർക്കും പൊതുസമൂഹത്തിനും വലിയൊരു പ്രതീക്ഷ തന്നെയാണ് നൽകുന്നത്.
