സോണിയയെ വിടാതെ ഇഡി; പ്രതിഷേധം കടുപ്പിച്ച് കോണ്ഗ്രസ്
നാഷണല് ഹെറാള്ഡ് കേസില് സോണിയ ഗാന്ധിയില് നിന്ന് ഇന്ന് വീണ്ടും മൊഴിയെടുത്ത് എന്ഫോഴ്സ്മെന്റ് ഡയറക്ട്രേറ്റ്. ഏഴ് മണിക്കൂറോളം നേരമാണ് സോണിയ ഗാന്ധിയെ കഴിഞ്ഞ ദിവസം ചോദ്യം ചെയ്തത്. രണ്ട് ദിവസങ്ങളിലായി 55 ചോദ്യങ്ങള് സോണിയയോട് ചോദിച്ചു. സാമ്പത്തിക ഇടപാടുകളുമായി ബന്ധപ്പെട്ട് രാഹുല് ഗാന്ധിയോടുന്നയിച്ച അതേ ചോദ്യങ്ങളാണ് സോണിയയോടും ചോദിച്ചത്. മറുപടി തൃപ്തികരമല്ലാത്ത സാഹചര്യത്തിലാണ് ഇന്ന് വീണ്ടും വിളിപ്പിക്കുന്നതെന്നാണ് സൂചന. സോണിയയെ ഇഡി ചോദ്യം ചെയ്യുമ്പോള് എഐസിസി ആസ്ഥാനം കേന്ദ്രീകരിച്ച് പ്രതിഷേധിക്കാനാണ് കോണ്ഗ്രസിന്റെ തീരുമാനം. അന്വേഷണ ഏജന്സിയെ കേന്ദ്രം ദുരുപയോഗം ചെയ്യുന്നുവെന്നാരോപിച്ച് പാര്ലമന്റില് അടിയന്തരപ്രമേയത്തിന് നോട്ടീസ് നല്കും. ചര്ച്ചക്ക് തയ്യാറായില്ലെങ്കില് പാര്ലമെന്റിലും പ്രതിഷേധിക്കാനാണ് തീരുമാനം.
