കുതിച്ചുയർന്ന് വിക്രം-1; ഇന്ത്യയുടെ ബഹിരാകാശ ചരിത്രത്തിൽ പുതിയ അധ്യായം.
സ്കൈറൂട്ട് എയറോസ്പേസിന്റെ ആദ്യ ഓർബിറ്റൽ റോക്കറ്റ് വിജയകരമായി വിക്ഷേപിച്ചു; 'മിഷൻ ആഗമൻ' ഇന്ത്യൻ സ്വകാര്യ ബഹിരാകാശ മേഖലയ്ക്ക് നാഴികക്കല്ലായി.
രതീഷ് കാട്ടുകുളങ്ങര 
ശ്രീഹരിക്കോട്ട: ഇന്ത്യയുടെ സ്വകാര്യ ബഹിരാകാശ രംഗത്ത് ചരിത്രം കുറിച്ച് സ്കൈറൂട്ട് എയറോസ്പേസ് വികസിപ്പിച്ച വിക്രം-1 റോക്കറ്റ് വിജയകരമായി കുതിച്ചുയർന്നു. ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിൽ നിന്ന് നടന്ന വിക്ഷേപണം, ഇന്ത്യയിൽ സ്വകാര്യ കമ്പനി വികസിപ്പിച്ച ആദ്യ ഓർബിറ്റൽ റോക്കറ്റിന്റെ വിജയകരമായ പറക്കലെന്ന നേട്ടം സ്വന്തമാക്കി.
'മിഷൻ ആഗമൻ' എന്ന പേരിൽ നടന്ന ഈ ദൗത്യം ഇന്ത്യയുടെ സ്വകാര്യ ബഹിരാകാശ വ്യവസായത്തിന് പുതിയ വഴിത്തിരിവായാണ് വിലയിരുത്തപ്പെടുന്നത്. താഴ്ന്ന ഭൂമിഭ്രമണപഥത്തിലേക്ക് (LEO) വിവിധ സാങ്കേതിക പരീക്ഷണ പേലോഡുകൾ എത്തിക്കുന്നതിനായാണ് വിക്രം-1 രൂപകൽപ്പന ചെയ്തിരിക്കുന്നത്. ഇന്ത്യൻ-വിദേശ സ്ഥാപനങ്ങളുടെ പരീക്ഷണ ഉപഗ്രഹങ്ങളും ദൗത്യത്തിന്റെ ഭാഗമായിരുന്നു.
ഹൈദരാബാദ് ആസ്ഥാനമായുള്ള സ്കൈറൂട്ട് എയറോസ്പേസ് വികസിപ്പിച്ച വിക്രം-1, ഡോ. വിക്രം സാരാഭായിയുടെ സ്മരണാർത്ഥമാണ് ഈ പേര് നൽകിയത്. ഇന്ത്യയുടെ വാണിജ്യ ബഹിരാകാശ രംഗത്ത് സ്വകാര്യ കമ്പനികളുടെ പങ്കാളിത്തം ശക്തിപ്പെടുത്തുകയും ആഗോള ഉപഗ്രഹ വിക്ഷേപണ വിപണിയിൽ രാജ്യത്തിന്റെ സാന്നിധ്യം വർധിപ്പിക്കുകയുമാണ് പദ്ധതിയുടെ ലക്ഷ്യം.
ദൗത്യത്തിന് മുന്നോടിയായി പ്രധാനമന്ത്രി നരേന്ദ്ര മോദി സ്കൈറൂട്ട് സംഘത്തിന് ആശംസകൾ നേർന്നിരുന്നു. ഇന്ത്യൻ യുവജനങ്ങളുടെ പ്രതിഭയുടെയും നവീകരണശേഷിയുടെയും പ്രതീകമാണ് ഈ നേട്ടമെന്ന് അദ്ദേഹം അഭിപ്രായപ്പെട്ടു.
