കുട്ടിക്കർഷകൻ ആദിത്യന്റെ വീടെന്ന സ്വപ്നത്തിന് ആദ്യ ചുവടുവെപ്പ്; ശിലാസ്ഥാപനം നിർവഹിച്ച് കെ.സി. വേണുഗോപാൽ

ആലപ്പുഴ: കുട്ടിക്കർഷകൻ ആദിത്യന്റെ വീടെന്ന സ്വപ്നത്തിലേക്ക് ആദ്യ ചുവടുവെച്ചു. ചേർത്തല അരീമ്പറമ്പിൽ ആദിത്യന്റെ പുതിയ വീടിന്റെ ശിലാസ്ഥാപന കർമ്മം കെ.സി. വേണുഗോപാൽ എം.പി. നിർവഹിച്ചു.

ആദിത്യന്റെ വീടെന്ന സ്വപ്നത്തിന് തുടക്കമായ ഈ ശിലാസ്ഥാപനം നാടിനും കുട്ടിക്കർഷകനും ഒരുപോലെ സന്തോഷം പകരുന്ന നിമിഷമായി എന്നും പുതിയ വീടിന്റെ തറക്കല്ലിടൽ ചടങ്ങിന് തുടക്കം കുറിക്കാൻ കഴിഞ്ഞതിൽ ഏറെ സന്തോഷമുണ്ടെന്ന്കെ .സി. വേണുഗോപാൽ എംപി വ്യക്തമാക്കി.

സംസ്ഥാനതലത്തിലെ മികച്ച വിദ്യാർത്ഥി കർഷകനുള്ള പുരസ്‌കാരം നേടിയ ആറാം ക്ലാസ് വിദ്യാർത്ഥിയാണ് ആദിത്യൻ. പ്രതികൂലമായ ജീവിതസാഹചര്യങ്ങൾക്കിടയിലും കൃഷിയോടുള്ള താൽപര്യവും കഠിനാധ്വാനവും കൈവിടാതെ മുന്നേറിയ ആദിത്യൻ നിരവധി കുട്ടികൾക്ക് മാതൃകയായി മാറിയിരുന്നു.

44 സെന്റ് സ്ഥലത്ത് നെൽക്കൃഷിയും 20 സെന്റ് പാട്ടഭൂമിയിൽ പച്ചക്കറിക്കൃഷിയും അലങ്കാര മത്സ്യക്കൃഷിയും നടത്തുന്നതിനൊപ്പം ആട്, കോഴി, താറാവ്, പശു എന്നിവയെ വളർത്തിയും ആദിത്യൻ കാർഷികരംഗത്ത് മികവ് തെളിയിച്ചു.

ആദിത്യന്റെ ജീവിതസാഹചര്യങ്ങൾ നേരിൽ മനസ്സിലാക്കിയതിനെ തുടർന്ന് കൃഷിമന്ത്രി ടി. സിദ്ദിഖ് അദ്ദേഹത്തിന് വീട് നിർമ്മിച്ചുനൽകുമെന്ന് നേരത്തെ പ്രഖ്യാപിച്ചിരുന്നു.

അജ്ഫാൻ സ്ഥാപന ഉടമ നെച്ചിക്കാട്ടിൽ മുഹമ്മദ് കുട്ടിയുടെ സഹായത്തോടെയാണ് ആദിത്യന്റെ വീടിന്റെ നിർമ്മാണം നടക്കുന്നത്. ഒരു കൊച്ചു കർഷകന്റെ പ്രയാസങ്ങൾ തിരിച്ചറിഞ്ഞ് വീടെന്ന സ്വപ്നത്തിന് തണലൊരുക്കാൻ മുന്നിട്ടിറങ്ങിയ എല്ലാവരോടും നന്ദിയുണ്ടെന്നും ആദിത്യന്റെ കുടുംബത്തിന് പുതിയ വീട് വലിയ ആശ്വാസമാകുമെന്നും ചടങ്ങിൽ അഭിപ്രായപ്പെട്ടു.

ലഹരി ഉൾപ്പെടെയുള്ള ദുഷ്പ്രവണതകളിൽനിന്ന് പുതുതലമുറയെ മാറ്റിനിർത്തി കുട്ടികളെ കൃഷിയിലേക്കും ക്രിയാത്മക പ്രവർത്തനങ്ങളിലേക്കും നയിക്കേണ്ടതിന്റെ ആവശ്യകതയും ചടങ്ങിൽ നേതാക്കൾ ചൂണ്ടിക്കാട്ടി.