കൂട്ടപ്പിരിച്ചുവിടലിനിടെ ഹാപ്പി ന്യൂസ്​! ജീവനക്കാർക്ക് ലക്ഷങ്ങളുടെ ഓഫർ; രാജിവെക്കരുതെന്ന് ടെക് കമ്പനിയുടെ അഭ്യർഥന

ആഗോള ഐടി മേഖലയിൽ വൻതോതിലുള്ള പിരിച്ചുവിടലുകൾ തുടരുമ്പോൾ, തികച്ചും വ്യത്യസ്തവും മാതൃകാപരവുമായ നിലപാടിലൂടെ ശ്രദ്ധ നേടുകയാണ് യൂറോപ്പിലെ പ്രമുഖ സെമികണ്ടക്ടർ നിർമാണ ഭീമനായ എഎസ്എംഎൽ (ASML). പ്രഫഷണലുകളെ കമ്പനിയിൽ തന്നെ നിലനിർത്തുന്നതിനായി (Retention Incentive) യോഗ്യരായ ഓരോ ജീവനക്കാരനും 20,000 യൂറോ (ഏകദേശം 22 ലക്ഷത്തിലധികം ഇന്ത്യൻ രൂപ) മൂല്യമുള്ള ദീർഘകാല സ്റ്റോക്ക് ബോണസ് നൽകാൻ കമ്പനി തീരുമാനിച്ചതായി വിവിധ അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.

അമേരിക്കൻ ടെക് ഭീമന്മാർ ചെലവുചുരുക്കലിന്റെ ഭാഗമായി ജീവനക്കാരെ കൂട്ടത്തോടെ പുറത്താക്കുമ്പോഴാണ്, തങ്ങളുടെ പ്രതിഭകളെ ചേർത്തുപിടിച്ചുകൊണ്ട് എഎസ്എംഎല്ലിന്റെ ഈ വേറിട്ട നീക്കം.

ഓഫർ ഇങ്ങനെ:

• കണ്ടീഷണൽ ഷെയർ ബോണസ്: ലോകമെമ്പാടുമുള്ള യോഗ്യരായ ജീവനക്കാർക്കായി ഒറ്റത്തവണ കണ്ടീഷണൽ ഷെയർ ബോണസാണ് എഎസ്എംഎൽ പ്രഖ്യാപിച്ചിരിക്കുന്നത്.

• വിതരണ സമയപരിധി: 2027 ജനുവരി 1-ന് അനുവദിക്കുന്ന ഈ ഷെയറുകൾ, മൂന്ന് വർഷത്തെ നിബന്ധനയ്ക്ക് വിധേയമായി 2030 ജനുവരി 1-ഓടെയായിരിക്കും പൂർണമായും ജീവനക്കാരുടെ അക്കൗണ്ടുകളിലേക്ക് വിതരണം ചെയ്യുക.

• ആർക്കൊക്കെ ലഭിക്കും?: പ്രഖ്യാപിച്ച തീയതി മുതൽ അടുത്ത മൂന്ന് വർഷക്കാലം തുടർച്ചയായി കമ്പനിയിൽ സേവനം അനുഷ്ഠിക്കുന്ന ജീവനക്കാർക്ക് മാത്രമേ ഈ സാമ്പത്തിക ആനുകൂല്യം ലഭ്യമാകൂ.

അത്യാധുനിക ചിപ്പ് നിർമാണ സാങ്കേതികവിദ്യയ്ക്കുള്ള ആഗോളതലത്തിലെ വൻ ഡിമാൻഡും കമ്പനിയുടെ ശക്തമായ സാമ്പത്തിക വളർച്ചയുമാണ് ഇത്തരമൊരു തീരുമാനത്തിന് പിന്നിലെന്ന് എഎസ്എംഎൽ വക്താവ് വ്യക്തമാക്കി. സെമികണ്ടക്ടർ മേഖലയിൽ സാങ്കേതിക വൈദഗ്ധ്യമുള്ള ജീവനക്കാരുടെ രൂക്ഷമായ ക്ഷാമം നിലനിൽക്കുന്നുണ്ട്.

തങ്ങളുടെ മികച്ച പ്രഫഷണലുകൾ മറ്റ് കമ്പനികളിലേക്ക് ചേക്കേറുന്നത് തടയാൻ സാംസങ് ഇലക്ട്രോണിക്സ്, ടിഎസ്എംസി (TSMC), എസ്കെ ഹൈനിക്സ് തുടങ്ങിയ പ്രമുഖ ആഗോള ചിപ്പ് നിർമാതാക്കളും സമാനമായ ആകർഷകമായ സാമ്പത്തിക പാക്കേജുകളും ബോണസുകളും നൽകിവരുന്നുണ്ട്. ഇതിന്റെ തുടർച്ചയായാണ് ജീവനക്കാരുടെ ഭാവി സുരക്ഷിതമാക്കുന്ന ദീർഘകാല സ്റ്റോക്ക് ബോണസ് പദ്ധതിയുമായി എഎസ്എംഎല്ലും രംഗത്തെത്തിയിരിക്കുന്നത്.