E20 പെട്രോൾ തട്ടിപ്പ് ആരോപണം; എഥനോളിനായി റേഷൻ അരിയും വെട്ടിക്കുറയ്ക്കുന്നു?

രാജ്യത്തെ ജനങ്ങളുടെ വാഹനങ്ങളിൽ ഇപ്പോൾ എഥനോൾ തട്ടിപ്പ് നടക്കുകയാണ്. വിലകൂടിയ പെട്രോളിന് പണം നൽകുമ്പോൾ ടാങ്കിൽ നിറയുന്നത് വിലകുറഞ്ഞ എഥനോളാണ്. അങ്ങനെയിരിക്കെയാണ് കർണാടക സർക്കാരിന്റെ ഭക്ഷ്യ-പൊതുവിതരണ വകുപ്പ് ലാബുകളിൽ നടത്തിയ ശാസ്ത്രീയ പരിശോധനാ ഫലങ്ങളുടെ അടിസ്ഥാനത്തിൽ കേന്ദ്ര സർക്കാരിനും പൊതുമേഖലാ എണ്ണക്കമ്പനികൾക്കുമെതിരെ ലോക്സഭാ പ്രതിപക്ഷ നേതാവ് രാഹുൽ ഗാന്ധി ഗുരുതര ആരോപണങ്ങളുമായി രംഗത്തെത്തിയത്. രാജ്യത്തെ ജനങ്ങളുടെ വാഹനങ്ങളിൽ E20 പെട്രോൾ അടിക്കാൻ അനുവാദം നൽകിയിരിക്കെ, വിപണിയിലെത്തുന്ന ഇന്ധനത്തിൽ എഥനോളിന്റെ അളവ് 26 ശതമാനം മുതൽ 31 ശതമാനം വരെയാണെന്നാണ് ലാബ് പരിശോധനയിൽ കണ്ടെത്തിയത്. വിലകൂടിയ സാധാരണ പെട്രോളിന്റെ തുക ഈടാക്കിയ ശേഷം കുറഞ്ഞ ചെലവിൽ നിർമ്മിക്കുന്ന എഥനോൾ അമിതമായി ചേർത്ത് ഉപഭോക്താക്കളെ വഞ്ചിക്കുകയാണെന്ന് രാഹുൽ ഗാന്ധി ആരോപിക്കുകയും ചെയ്തു. 'E20 എന്നത് തട്ടിപ്പായി മാറിയിരിക്കുന്നു' എന്നായിരുന്നു അദ്ദേഹത്തിന്റെ വിമർശനം. എൻജിന്റെ ആയുസ്സ് കുറയ്ക്കുന്നതിനും മൈലേജ് ഇടിയുന്നതിനും കാരണമാകുന്ന ഇത്തരമൊരു അമിത കലർപ്പ് ജനങ്ങളുടെ പോക്കറ്റടിക്കുന്നതിന് തുല്യമാണെന്ന പരാതി രാജ്യത്തുടനീളം ഉയർന്നുകഴിഞ്ഞു.

ഇത്തരത്തിൽ ഇന്ധന തട്ടിപ്പിലൂടെ വാഹന ഉടമകളെ പ്രതിസന്ധിയിലാക്കുമ്പോഴാണ് സാധാരണക്കാരായ ജനങ്ങളുടെ വയറ്റത്തടിക്കുന്ന കേന്ദ്രത്തിന്റെ അടുത്ത തീരുമാനം പുറത്തുവരുന്നത്. രാജ്യത്ത് അരിയുടെ ഉൽപ്പാദനത്തിലും ലഭ്യതയിലും കുറവ് രേഖപ്പെടുത്തുകയും വിപണിയിൽ അരിവില കുതിച്ചുയരുകയും ചെയ്യുന്ന ഈ സാഹചര്യത്തിലും എഥനോൾ നിർമ്മാണത്തിനായി കൂടുതൽ അരി തിരിച്ചുവിടാനാണ് കേന്ദ്ര പൊതുവിതരണ മന്ത്രാലയത്തിന്റെ നീക്കം. എഥനോൾ നിർമ്മാണത്തിനുള്ള പ്രധാന അസംസ്കൃത വസ്തുവായ നുറുക്കരിയുടെ ലഭ്യത ഉറപ്പാക്കാൻ റേഷൻ വഴി വിതരണം ചെയ്യുന്ന അരിയിലെ നുറുക്കരിയുടെ അളവ് വെട്ടിക്കുറയ്ക്കാനാണ് തീരുമാനം. നിലവിൽ പൊതുവിതരണ ശൃംഖലയിലൂടെ നൽകുന്ന അരിയിൽ 16 മുതൽ 25 ശതമാനം വരെ അടങ്ങിയിരിക്കുന്ന നുറുക്കരിയുടെ അളവ് ഇനി മുതൽ 5 ശതമാനത്തിലേക്ക് പരിമിതപ്പെടുത്താൻ നിർദ്ദേശമുണ്ട്.

അരിമില്ലുകളിൽ നിന്നും പൊതുവിപണിയിൽ നിന്നും കൂടുതൽ നുറുക്കരി എഥനോൾ പ്ലാന്റുകളിലേക്ക് ശേഖരിക്കാനാണ് കേന്ദ്രം ലക്ഷ്യമിടുന്നത്. അരിയുടെ ഗുണനിലവാരം മെച്ചപ്പെടുത്താനാണ് ഈ പരിഷ്കാരമെന്ന് ഭക്ഷ്യ-പൊതുവിതരണ മന്ത്രാലയം വിശദീകരണം നൽകുന്നുണ്ടെങ്കിലും, ഇതിന്റെ യഥാർത്ഥ ലക്ഷ്യം ഇന്ധന വിപണിയിലെ എഥനോൾ കമ്പനികളുടെ താൽപര്യം സംരക്ഷിക്കലാണെന്നത് വ്യക്തമാണ്. റേഷൻ അരിയിലെ നുറുക്കരിയുടെ അളവ് കുറയുന്നതോടെ അരിമില്ലുകൾ കൂടുതൽ അളവ് അരി നൽകാൻ നിർബന്ധിതരാകുകയും ഇത് പൊതുവിതരണത്തിനായി നൽകേണ്ട അരിയുടെ ആകെ അളവിനെ ബാധിക്കുകയും ചെയ്യും.

കേരളമടക്കമുള്ള തെക്കേ ഇന്ത്യൻ സംസ്ഥാനങ്ങളിൽ ഇതിനകം തന്നെ അരിവില കുതിച്ചുയരുകയാണ്. നിലവിലെ അരിക്ഷാമം കണക്കിലെടുത്ത് സംസ്ഥാനങ്ങളിലെ അരിയുടെ പ്രതിവാര സ്റ്റോക്ക് വിവരങ്ങൾ കൃത്യമായി വെളിപ്പെടുത്താൻ കേന്ദ്ര സർക്കാർ തെക്കേ ഇന്ത്യൻ സംസ്ഥാനങ്ങൾക്ക് കർശന നിർദ്ദേശം നൽകിയിട്ടുണ്ട്. ഇതിനിടയിലാണ് ജനങ്ങൾക്ക് വിതരണം ചെയ്യേണ്ട ധാന്യം വ്യാവസായിക ആവശ്യങ്ങൾക്കായി മാറ്റുന്നത്. കേന്ദ്രനയം നടപ്പിലാക്കുന്നതിനായി കേരളത്തിലെ സപ്ലൈകോയും നടപടികൾ ആരംഭിച്ചുകഴിഞ്ഞു. സപ്ലൈകോ നിലവിൽ സംസ്ഥാനത്തെ 42 ഓളം റൈസ് മില്ലുകളുമായി കരാറിലേർപ്പെട്ടതായി റൈസ് മിൽസ് അസോസിയേഷൻ പ്രതിനിധികൾ സ്ഥിരീകരിക്കുന്നു.

രാജ്യത്തെ പാവപ്പെട്ട ജനങ്ങൾക്ക് ഭക്ഷണത്തിനുള്ള അരി ലഭ്യമാക്കേണ്ട ഘട്ടത്തിൽ അത് എഥനോളാക്കി മാറ്റി വൻകിട എണ്ണക്കമ്പനികൾക്കും കരാറുകാർക്കും ലാഭം കൊയ്യാൻ അവസരമൊരുക്കുന്നത് കടുത്ത അനീതി തന്നെയാണ്. ഒരു വശത്ത് അമിത എഥനോൾ കലർന്ന പെട്രോൾ അടിച്ച് വാഹനം കേടാകുന്നതിനൊപ്പം പണവും നഷ്ടപ്പെടുന്നു; മറുവശത്ത് വിപണിയിൽ അരിവില കുതിച്ചുയരുകയും റേഷൻ വിഹിതം വെട്ടിച്ചുരുക്കപ്പെടുകയും ചെയ്യുന്നു. കേന്ദ്ര സർക്കാരിന്റെ ഈ ഇരട്ടത്താപ്പും സാമ്പത്തിക താൽപര്യങ്ങളും സാധാരണക്കാരെ പട്ടിണിയിലേക്കും കടുത്ത സങ്കീർണതകളിലേക്കും തള്ളിവിടുന്ന അവസ്ഥയാണ് നിലവിലുള്ളത്.