കോവളത്തെ സ്പായിൽ 16കാരിക്ക് പീഡനം; ആന്ധ്രയിൽ നിന്ന് രണ്ടുപേർ പിടിയിൽ, വ്യാജരേഖയുണ്ടാക്കിയെന്നും കണ്ടെത്തൽ

തിരുവനന്തപുരം: കോവളത്തെ സ്പായിൽ പ്രായപൂർത്തിയാകാത്ത പെൺകുട്ടിയെ ലൈംഗികമായി ചൂഷണം ചെയ്ത കേസിൽ നിർണായക കണ്ടെത്തലുകളുമായി പൊലീസ് അന്വേഷണം. 16 വയസ്സുകാരിയെ സ്പായിൽ എത്തിച്ചെന്ന് സംശയിക്കുന്ന രണ്ടുപേരെ ആന്ധ്രാപ്രദേശിൽനിന്ന് പൊലീസ് പിടികൂടി. പെൺകുട്ടിക്ക് പ്രായപൂർത്തിയായെന്ന് വരുത്തിത്തീർക്കാൻ വ്യാജരേഖകൾ തയ്യാറാക്കിയതായും അന്വേഷണത്തിൽ കണ്ടെത്തിയതായി പൊലീസ് അറിയിച്ചു.

കേസിൽ സ്പാ ഉടമകളായ സജിത്തിനെയും നിഷാന്തിനെയും പൊലീസ് നേരത്തെ അറസ്റ്റ് ചെയ്തിരുന്നു. പെൺകുട്ടിയുടെ രണ്ടാനമ്മയും അവരുടെ ഭർത്താവുമാണ് കേസിലെ ഒന്നും രണ്ടും പ്രതികൾ. ഇവരും ആന്ധ്രാപ്രദേശ് സ്വദേശികളാണ്.

സ്കൂൾ രേഖകൾ പരിശോധിച്ചപ്പോൾ പ്രായം 16

സ്പായിൽ ജോലി ചെയ്തിരുന്ന പെൺകുട്ടി ഒപ്പം ജോലി ചെയ്തിരുന്ന യുവാവിനൊപ്പം പോയതിനെത്തുടർന്നാണ് സംഭവം പുറത്തറിയുന്നത്. ആന്ധ്രാപ്രദേശ് സ്വദേശിനിയായ പെൺകുട്ടിയെ കോവളം പൊലീസ് കണ്ടെത്തി വിവരങ്ങൾ പരിശോധിച്ചപ്പോഴാണ് സ്പായുടെ മറവിൽ നടന്ന ചൂഷണത്തിന്റെ വിവരങ്ങൾ പുറത്തുവന്നത്.

പെൺകുട്ടി പഠിച്ചിരുന്ന സ്കൂളിൽനിന്ന് വിവരങ്ങൾ ശേഖരിച്ചതോടെയാണ് കുട്ടിക്ക് 16 വയസ്സ് മാത്രമാണെന്ന് വ്യക്തമായത്. തുടർന്ന് നടത്തിയ കൗൺസിലിംഗിനിടെയാണ് ബന്ധുക്കളിൽനിന്ന് നേരിട്ട ക്രൂരതയെക്കുറിച്ചും സ്പായിൽ അനുഭവിക്കേണ്ടിവന്ന ചൂഷണത്തെക്കുറിച്ചും പെൺകുട്ടി വെളിപ്പെടുത്തിയതെന്നാണ് വിവരം.

ചെന്നൈയിൽനിന്ന് വിഴിഞ്ഞത്തെ സ്പാകളിലേക്ക്

പെൺകുട്ടിയുടെ രണ്ടാനമ്മയും ഭർത്താവും ചേർന്ന് ആദ്യം ചെന്നൈയിൽ എത്തിച്ച് സ്പായിൽ ജോലി ചെയ്യിപ്പിച്ചതായാണ് അന്വേഷണത്തിൽ കണ്ടെത്തിയത്. പിന്നീട് വിഴിഞ്ഞം മേഖലയിലെ രണ്ട് സ്പാകളിലേക്ക് പെൺകുട്ടിയെ എത്തിക്കുകയായിരുന്നു.

ചപ്പാത്തിനടുത്തുള്ള കേരള ആയുർവേദ, വൈകോർകുളത്തുള്ള ആയുർ കേരള എന്നീ സ്ഥാപനങ്ങളിലാണ് പെൺകുട്ടിയെ എത്തിച്ചതെന്നാണ് വിവരം. ഈ സ്ഥാപനങ്ങൾ ആയുർവേദ ചികിത്സാ കേന്ദ്രങ്ങളാണെന്നാണ് നാട്ടുകാർ കരുതിയിരുന്നത്.

വിശദമായ അന്വേഷണത്തിനൊടുവിലാണ് സ്പാ ഉടമകളായ സജിത്തിനെയും നിഷാന്തിനെയും പൊലീസ് അറസ്റ്റ് ചെയ്തത്. പെൺകുട്ടിയെ സ്പായിലെത്തിച്ചവരുടെയും വ്യാജരേഖകൾ തയ്യാറാക്കിയതിന്റെയും പിന്നിലെ സാഹചര്യങ്ങൾ സംബന്ധിച്ച അന്വേഷണം തുടരുകയാണ്.

സ്പാ നടത്തിപ്പിൽ നഗരസഭാ ഉദ്യോഗസ്ഥന് ബന്ധമെന്ന് സൂചന

കേസിലെ പ്രതിയായ നിഷാന്തിന്റെ ബാങ്ക് അക്കൗണ്ട് പരിശോധിച്ചതോടെയാണ് തിരുവനന്തപുരം നഗരസഭയിലെ ഒരു ഹെൽത്ത് ഇൻസ്പെക്ടർക്ക് സ്പാ നടത്തിപ്പുമായി നേരിട്ട് ബന്ധമുണ്ടെന്നതിന് തെളിവുകൾ ലഭിച്ചതെന്ന് പൊലീസ് വ്യക്തമാക്കിയതായി റിപ്പോർട്ടുണ്ട്.

ഹെൽത്ത് ഇൻസ്പെക്ടറുടെ ബിനാമി ബിസിനസായാണ് സ്പാ പ്രവർത്തിച്ചിരുന്നതെന്ന സംശയവും അന്വേഷണത്തിൽ ഉയർന്നിട്ടുണ്ട്. സ്പായിലെ സേവനങ്ങൾക്ക് പണം സ്വീകരിക്കുന്നതിനായി ഉദ്യോഗസ്ഥന്റെ പേരിലുള്ള സ്കാനർ ഉപയോഗിച്ചിരുന്നതായും കണ്ടെത്തിയിട്ടുണ്ട്. സംഭവത്തിൽ ഉദ്യോഗസ്ഥന്റെ പങ്കും സാമ്പത്തിക ഇടപാടുകളും സംബന്ധിച്ച കൂടുതൽ വിവരങ്ങൾ അന്വേഷണത്തിലൂടെ വ്യക്തമാകേണ്ടതുണ്ട്.

സംസ്ഥാന വ്യാപക പരിശോധന; 14 കേസുകൾ

സ്പാകളിലെ നിയമവിരുദ്ധ പ്രവർത്തനങ്ങൾ കണ്ടെത്തുന്നതിനായി സംസ്ഥാന വ്യാപകമായി പൊലീസ് പരിശോധന തുടരുകയാണ്. ഇതിന്റെ ഭാഗമായി 586 സ്ഥാപനങ്ങളിൽ പരിശോധന നടത്തിയതായും 14 കേസുകൾ രജിസ്റ്റർ ചെയ്തതായും അഞ്ച് പേരെ അറസ്റ്റ് ചെയ്തതായും റിപ്പോർട്ടുകൾ വ്യക്തമാക്കുന്നു.

കൊച്ചിയിൽ സ്പാ ജീവനക്കാരിയെ ക്രൂരമായി പീഡിപ്പിച്ച സംഭവത്തിന്റെ ഞെട്ടൽ മാറുംമുമ്പാണ് തിരുവനന്തപുരത്തുനിന്ന് പ്രായപൂർത്തിയാകാത്ത പെൺകുട്ടിയെ ചൂഷണം ചെയ്തതിന്റെ വിവരങ്ങൾ പുറത്തുവരുന്നത്. സ്പാകളുടെ മറവിൽ നടക്കുന്ന നിയമവിരുദ്ധ പ്രവർത്തനങ്ങളും ഇത്തരം സ്ഥാപനങ്ങളുടെ നടത്തിപ്പിന് പിന്നിലുള്ളവരുടെ പങ്കും സംബന്ധിച്ച് കൂടുതൽ അന്വേഷണം ആവശ്യമായിരിക്കുകയാണ്.