വ്യായാമം ചെയ്യാൻ സമയമില്ലേ? ആഴ്ചയിൽ ഒറ്റത്തവണ 'ഇങ്ങനെ' നടന്നാൽ കുടവയർ കുറയ്ക്കാം!

തിരക്കുപിടിച്ച ജീവിതശൈലിയിൽ ദിവസവും മണിക്കൂറുകളോളം വ്യായാമം ചെയ്യാൻ സമയം കണ്ടെത്താൻ കഴിയാത്തവരാണോ നിങ്ങൾ? എങ്കിൽ നിങ്ങൾക്ക് ആശ്വാസമേകുന്ന പുതിയൊരു പഠന റിപ്പോർട്ട് പുറത്തുവന്നിരിക്കുകയാണ്. ദിവസവും വ്യായാമം ചെയ്തില്ലെങ്കിലും, ആഴ്ചയിൽ കുറഞ്ഞ സമയം മാത്രം നീക്കിവെച്ച് വയറിലെ അമിത കൊഴുപ്പ് (Belly Fat) കുറയ്ക്കാമെന്നാണ് അന്താരാഷ്ട്ര ശാസ്ത്ര മാസികയായ 'നേച്ചർ കമ്മ്യൂണിക്കേഷൻസ്' പ്രസിദ്ധീകരിച്ച പുതിയ ഗവേഷണഫലം വ്യക്തമാക്കുന്നത്.

വയറ്റിൽ അമിതമായി കൊഴുപ്പടിയുന്ന പ്രശ്നമുള്ള 315 മുതിർന്ന ആളുകളിൽ 16 ആഴ്ചകളിലായി നടത്തിയ പഠനത്തിലാണ് ഈ കണ്ടെത്തൽ. ഇവരെ രണ്ട് ഗ്രൂപ്പുകളായാണ് ഗവേഷകർ വിഭജിച്ചത്:

ആദ്യ ഗ്രൂപ്പ്: ആഴ്ചയിൽ ഒരു ദിവസം തുടർച്ചയായി 75 മിനിറ്റ് മാത്രം നടന്നു.

രണ്ടാം ഗ്രൂപ്പ്: ഈ 75 മിനിറ്റ് മൂന്ന് ദിവസങ്ങളിലായി (25 മിനിറ്റ് വീതം) വിഭജിച്ച് നടന്നു.

16 ആഴ്ചകൾക്ക് ശേഷം നടത്തിയ പരിശോധനയിൽ, രണ്ട് ഗ്രൂപ്പുകളിലുള്ളവർക്കും ഒരേപോലെ വയറിലെ കൊഴുപ്പ് കുറയുകയും ഹൃദയാരോഗ്യം മെച്ചപ്പെടുകയും ചെയ്തതായി കണ്ടെത്തി. അതായത് ദിവസവും വ്യായാമം ചെയ്യാൻ സാധിച്ചില്ലെങ്കിലും, ആഴ്ചയിലൊരിക്കൽ കൃത്യമായി 75 മിനിറ്റ് നീക്കിവെച്ചാൽ പോലും ശരീരഭാരവും അരക്കെട്ടിന്റെ വണ്ണവും നിയന്ത്രിക്കാം.

എന്താണ് 'ബ്രിസ്ക് ഇന്റർവൽ വാക്കിങ്'? 

സാധാരണയായി നടക്കുന്നത് പോലെയല്ല ഇത്. വേഗത കൂട്ടിയും കുറച്ചും നടക്കുന്ന പ്രത്യേക രീതിയാണിത്.

വർക്ക് ഔട്ട് രീതി: ആദ്യം 3 മിനിറ്റ് വളരെ വേഗത്തിൽ നടക്കുക. തുടർന്നുള്ള 3 മിനിറ്റ് വേഗത കുറച്ച് സാവധാനം നടക്കുക. ഇത് തുടർച്ചയായി ആവർത്തിക്കുക. സാധാരണ നടപ്പിനെക്കാൾ വളരെ പെട്ടെന്ന് ഹൃദയമിടിപ്പ് കൂട്ടാനും കുറഞ്ഞ സമയം കൊണ്ട് കൂടുതൽ കലോറി എരിച്ചു കളയാനും ഈ രീതി സഹായിക്കും.

 എന്തുകൊണ്ട് ഇത്ര അപകടകരം?

ഇന്ത്യൻ കൗൺസിൽ ഓഫ് മെഡിക്കൽ റിസർച്ച്  നൽകുന്ന മുന്നറിയിപ്പ് പ്രകാരം മലയാളിയിൽ കണ്ടുവരുന്ന പ്രധാന ആരോഗ്യ വെല്ലുവിളികളിലൊന്നാണ് സെൻട്രൽ ഒബിസിറ്റി. വയറിന് ചുറ്റും അടിഞ്ഞുകൂടുന്ന 'വിസറൽ ഫാറ്റ്' കൈകാലുകളിലെ കൊഴുപ്പിനെക്കാൾ അപകടകരമാണ്.

ആന്തരിക അവയവങ്ങളെ ബാധിക്കുന്നു: ആന്തരിക അവയവങ്ങൾക്ക് ചുറ്റും അടിഞ്ഞുകൂടുന്നതിനാൽ കരൾ, പാൻക്രിയാസ് എന്നിവയുടെ പ്രവർത്തനത്തെ ഇത് തടസ്സപ്പെടുത്തുന്നു.

പ്രമേഹവും ഹൃദ്രോഗവും: ഇൻസുലിൻ പ്രതിരോധം (Insulin Resistance) ഉണ്ടാക്കുന്നതിനാൽ ടൈപ്പ്-2 പ്രമേഹം, ഫാറ്റി ലിവർ, ഉയർന്ന രക്തസമ്മർദ്ദം, ഹൃദയാഘാതം എന്നിവയ്ക്കുള്ള സാധ്യത ഇരട്ടിയാക്കുന്നു.

നടക്കുമ്പോൾ ശ്രദ്ധിക്കേണ്ട 4 പ്രധാന കാര്യങ്ങൾ

സ്ട്രെച്ചിങ് പ്രധാനം: നടക്കാൻ തുടങ്ങുന്നതിന് മുൻപ് പേശികൾക്ക് ആയാസം നൽകാൻ ചെറിയ രീതിയിലുള്ള വാർമ് അപ്പ് / സ്ട്രെച്ചിങ് ചെയ്യുക.

കൃത്യമായ പാദരക്ഷകൾ: പാദങ്ങൾക്കും നട്ടെല്ലിനും സപ്പോർട്ട് നൽകുന്ന നല്ല സ്പോർട്സ് ഷൂസുകൾ മാത്രം ഉപയോഗിക്കുക.

ഹൈഡ്രേഷൻ: നടക്കുമ്പോൾ നിർജലീകരണം ഒഴിവാക്കാൻ ആവശ്യത്തിന് വെള്ളം കുടിക്കുക.

ആരോഗ്യം നിരീക്ഷിക്കുക: തുടക്കക്കാർ ആദ്യദിവസം തന്നെ അമിതഭാരം എടുക്കാതെ, ശരീരത്തിന്റെ ശേഷി അനുസരിച്ച് മാത്രം വേഗത കൂട്ടുക.