യുഎഇ – ഇന്ത്യ വിമാനയാത്രക്കാർക്ക് ജാഗ്രതാ നിർദ്ദേശം: 20 വരെ സുരക്ഷാ പരിശോധന കർശനം

യുഎഇയിൽനിന്ന് ഇന്ത്യയിലേക്ക് യാത്ര ചെയ്യുന്നവർക്ക് നിർണായക മുന്നറിയിപ്പുമായി വ്യോമയാന അധികൃതരും എയർലൈനുകളും. സ്വാതന്ത്ര്യദിനാഘോഷങ്ങളുടെ പശ്ചാത്തലത്തിൽ രാജ്യത്തെ പ്രധാന വിമാനത്താവളങ്ങളിൽ സുരക്ഷാ നടപടികൾ ശക്തമാക്കി. ഓഗസ്റ്റ് 20 വരെ കർശന പരിശോധനകൾ തുടരുമെന്ന് അധികൃതർ വ്യക്തമാക്കി.  

അധിക സ്ക്രീനിംഗും നീണ്ട ക്യൂവും നേരിടേണ്ടി വന്നേക്കാമെന്നതിനാൽ യാത്രക്കാർ വിമാനത്താവളങ്ങളിൽ നേരത്തെ എത്താനും അവസാന നിമിഷമുള്ള യാത്ര ഒഴിവാക്കാനും നിർദ്ദേശിക്കുന്നു.

പ്രധാന വിമാനത്താവളങ്ങളിലെ സ്ഥിതി  

കൊച്ചി അന്താരാഷ്ട്ര വിമാനത്താവളം (CIAL): ബാഗേജ്, കാർഗോ പരിശോധനകൾ വ്യാപിപ്പിച്ചു. ഓഗസ്റ്റ് 20 വരെ ആഭ്യന്തര, അന്താരാഷ്ട്ര ടെർമിനലുകളിൽ സന്ദർശകർക്ക് പ്രവേശനമുണ്ടാകില്ല.

ഡൽഹി, മുംബൈ, ബെംഗളൂരു, തിരുവനന്തപുരം: സുരക്ഷാ പരിശോധനകൾ വർദ്ധിപ്പിച്ചു. ഡൽഹിയിലേക്ക് യാത്ര ചെയ്യുന്നവർ നഗരത്തിലെ ഗതാഗത നിയന്ത്രണങ്ങൾ കൂടി മുൻകൂട്ടി കണക്കാക്കണം.

‘എയർ സുവിധ 2.0’ ആരോഗ്യ ഡിക്ലറേഷൻ നിർബന്ധം

യുഎഇയിൽ നിന്നടക്കമുള്ള എല്ലാ അന്താരാഷ്ട്ര യാത്രക്കാരും ഇന്ത്യയിലേക്ക് പുറപ്പെടുന്നതിന് മുൻപ് കേന്ദ്ര സിവിൽ ഏവിയേഷൻ മന്ത്രാലയത്തിന്റെ ഡിജിറ്റൽ ഹെൽത്ത് ഡിക്ലറേഷൻ ഫോമായ ‘എയർ സുവിധ 2.0’ പൂർത്തിയാക്കണം. [Air Suvidha 2.0 Portal](https://airsuvidha.civilaviation.gov.in/) വഴി ഈ സേവനം സൗജന്യമായി ലഭ്യമാണ്.  

(ശ്രദ്ധിക്കുക: വ്യാജ വെബ്‌സൈറ്റുകളിൽ വീഴാതെ ഔദ്യോഗിക പോർട്ടൽ തന്നെ ഉപയോഗിക്കുക.)  

യാത്രക്കാർ ശ്രദ്ധിക്കേണ്ട പ്രധാന നിർദ്ദേശങ്ങൾ:

നേരത്തെ എത്തുക: ബോർഡിംഗ്, സെക്യൂരിറ്റി ചെക്കിംഗ് എന്നിവയ്ക്കായി ആവശ്യത്തിന് സമയം കണ്ടെത്തുക.  

ഫ്ലൈറ്റ് സ്റ്റാറ്റസ് ഉറപ്പാക്കുക: പുറപ്പെടുന്നതിന് മുൻപ് എയർലൈൻ വഴി സമയക്രമം പരിശോധിക്കുക.  

രേഖകൾ കരുതുക: പാസ്‌പോർട്ട്, ഐഡി, ബോർഡിംഗ് പാസ്, എയർ സുവിധ ഡിക്ലറേഷൻ എന്നിവ കൈവശം കരുതുക.

ഗതാഗത നിയന്ത്രണങ്ങൾ: വിമാനത്താവള പാതകളിലെ തിരക്കും തടസ്സങ്ങളും മുൻകൂട്ടി കണ്ട് ഇറങ്ങുക.

നിയമങ്ങൾ പാലിക്കുക: ബാഗേജ് പരിധികൾ പാലിക്കാനും സെക്യൂരിറ്റി ജീവനക്കാരുടെ പരിശോധനയോട് സഹകരിക്കാനും ശ്രദ്ധിക്കുക.