ദീപാവലി ദിനത്തിൽ തമിഴ്‌നാട്ടിൽ 17 കൊലപാതകങ്ങൾ; ക്രമസമാധാന നിലയിൽ കേന്ദ്രത്തിന്റെ ഇടപെടൽ, ഗവർണറോട് റിപ്പോർട്ട് തേടി

കേന്ദ്ര ആഭ്യന്തര മന്ത്രാലയമാണ് ഗവർണർ രാജേന്ദ്ര അർലേക്കറോട് റിപ്പോർട്ട് ആവശ്യപ്പെട്ടത്. ദീപാവലി ദിനമായ നവംബർ 8 മുതൽ തൊട്ടടുത്ത ദിവസം വരെയുള്ള കാലയളവിൽ സംസ്ഥാനത്തിന്റെ വിവിധ ഭാഗങ്ങളിലായി കൊലപാതകങ്ങൾ റിപ്പോർട്ട് ചെയ്തിരുന്നു. പ്രതിപക്ഷം ഉന്നയിക്കുന്ന കണക്കുപ്രകാരം കൊലപാതകങ്ങളുടെ എണ്ണം 17 ആണ്. എന്നാൽ ദീപാവലി ദിവസം മാത്രം എട്ട് കൊലപാതകങ്ങളാണ് റിപ്പോർട്ട് ചെയ്തതെന്നാണ് സംസ്ഥാന സർക്കാരിന്റെയും പോലീസിന്റെയും വിശദീകരണം. 

സംഭവങ്ങളിൽ ഏറ്റവും ശ്രദ്ധേയമായത് തേനി ജില്ലയിൽ സ്പെഷ്യൽ സബ് ഇൻസ്പെക്ടർ സെന്തിൽകുമാർ (56) കൊല്ലപ്പെട്ടതാണ്. പൊതുറോഡിൽ പടക്കം പൊട്ടിച്ച് ഗതാഗതം തടസ്സപ്പെടുത്തിയ യുവാക്കളെ ചോദ്യം ചെയ്തതിനെ തുടർന്നാണ് അദ്ദേഹത്തിന് മർദനമേറ്റത്. തുടർന്ന് ചികിത്സയിലിരിക്കെ മരിച്ചു.

സംഭവങ്ങൾ തമിഴ്‌നാട്ടിലെ രാഷ്ട്രീയരംഗത്തും വലിയ ചർച്ചയായിട്ടുണ്ട്. മുഖ്യമന്ത്രി സി. ജോസഫ് വിജയ് ആഭ്യന്തരവകുപ്പിന്റെ ചുമതല കൂടി വഹിക്കുന്ന സാഹചര്യത്തിൽ സർക്കാരിനെതിരെ ഡിഎംകെ, എഐഎഡിഎംകെ തുടങ്ങിയ പ്രതിപക്ഷ കക്ഷികൾ വിമർശനം ശക്തമാക്കി. ജനങ്ങൾക്കും പോലീസുകാർക്കും സുരക്ഷയില്ലാത്ത സാഹചര്യമാണെന്നാണ് പ്രതിപക്ഷത്തിന്റെ ആരോപണം.

വിമർശനങ്ങൾക്കിടെ മുഖ്യമന്ത്രി ഉന്നത പോലീസ് ഉദ്യോഗസ്ഥരുടെ യോഗം വിളിച്ച് ക്രമസമാധാന നില വിലയിരുത്തി. കുറ്റവാളികൾക്കെതിരെ കർശന നടപടി സ്വീകരിക്കാനും സംസ്ഥാനവ്യാപകമായി പരിശോധനകളും നിരീക്ഷണവും ശക്തമാക്കാനും നിർദേശം നൽകി. 

ഗവർണർ സമർപ്പിക്കുന്ന റിപ്പോർട്ടിൽ സംസ്ഥാനത്തെ സമീപകാല അക്രമസംഭവങ്ങൾ, അവയുടെ പശ്ചാത്തലം, കുറ്റവാളികൾക്കെതിരെ സ്വീകരിച്ച നടപടികൾ എന്നിവ ഉൾപ്പെടുമെന്നാണ് റിപ്പോർട്ടുകൾ. നവംബർ 13ന് ഗവർണർ ഡൽഹിയിലെത്തി കേന്ദ്ര ആഭ്യന്തര മന്ത്രിയുമായി കൂടിക്കാഴ്ച നടത്തുമെന്നും വാർത്തകളുണ്ട്.