“ആറ് റൗണ്ട് പിന്നിലാക്കിയ ധർമ്മടത്തെ ജനതയുണ്ട്, അവരെ എന്ത് പറയും?”പിണറായിക്ക് ടി.കെ. ഗോവിന്ദന്റെ മറുപടി;

തളിപ്പറമ്പിലെയും പയ്യന്നൂരിലെയും തോൽവിക്ക് പ്രവർത്തകരെ മാത്രം കുറ്റപ്പെടുത്തരുതെന്ന് വിമർശനം; സ്ഥാനാർഥി നിർണയത്തിലെ പാളിച്ചകളും സംസ്ഥാന നേതൃത്വത്തിന്റെ നിലപാടുകളും ചോദ്യം ചെയ്ത് ടി.കെ. ഗോവിന്ദൻ

പിണറായി വിജയന്റെ പരാമർശത്തിന് മറുപടിയുമായി ടി.കെ. ഗോവിന്ദൻ. തളിപ്പറമ്പിലും പയ്യന്നൂരിലും പാർട്ടി പ്രവർത്തകർക്ക് തെറ്റുപറ്റിയെന്നും പ്രവർത്തകർ തന്നെ അത് തിരുത്തണമെന്നുമുള്ള പിണറായി വിജയന്റെ പ്രതികരണത്തിന് പിന്നാലെയാണ് ടി.കെ. ഗോവിന്ദന്റെ വിമർശനം.

“സഖാവ് പിണറായിയെ ആറ് റൗണ്ട് പിറകിലാക്കിയ ജനതയുണ്ട്; അവരെ എന്ത് പറയും?” എന്ന ചോദ്യത്തിലൂടെയാണ് തോൽവിയുടെ ഉത്തരവാദിത്വം പ്രവർത്തകരിൽ മാത്രം ചുമത്തുന്നതിനെ ഗോവിന്ദൻ ചോദ്യം ചെയ്യുന്നത്.

തളിപ്പറമ്പിലും പയ്യന്നൂരിലും സിപിഐഎമ്മിനുണ്ടായ തിരിച്ചടിയുടെ യഥാർഥ കാരണങ്ങൾ പാർട്ടി നേതൃത്വം പരിശോധിക്കണമെന്നാണ് വിമർശനം. സ്ഥാനാർഥി നിർണയത്തിലുണ്ടായ പാളിച്ചകളും മണ്ഡലങ്ങളിലെ ജനവികാരവും കൃത്യമായി വിലയിരുത്തുന്നതിൽ നേതൃത്വത്തിന് സംഭവിച്ച വീഴ്ചകളും പരിശോധിക്കേണ്ടതുണ്ട്.

പയ്യന്നൂരിലെ മുൻ എംഎൽഎ ടി.ഐ. മധുസൂദനനെതിരെ ഉയർന്ന അഴിമതി ആരോപണങ്ങളും ഇതോടൊപ്പം ചർച്ചയാകുകയാണ്. ആരോപണങ്ങളിൽ സംസ്ഥാന കമ്മിറ്റിയുടെ നിലപാടും അഴിമതി ആരോപണങ്ങൾ നേരിടുന്നവരെ സംരക്ഷിക്കുന്നുവെന്ന വിമർശനവും പാർട്ടിക്കുള്ളിൽ ശക്തമാണ്.

പ്രവർത്തകരുടെ വീഴ്ച മാത്രം ചൂണ്ടിക്കാട്ടുന്നതിന് പകരം സ്ഥാനാർഥി നിർണയം മുതൽ സംസ്ഥാന നേതൃത്വത്തിന്റെ രാഷ്ട്രീയ തീരുമാനങ്ങൾ വരെ പരിശോധിക്കണമെന്നതാണ് ടി.കെ. ഗോവിന്ദന്റെ പ്രതികരണത്തിന്റെ കാതൽ. ജനവിധിയെ ഗൗരവമായി കാണാതെ താഴെത്തട്ടിലെ പ്രവർത്തകരുടെ തലയിൽ മാത്രം തോൽവിയുടെ ഉത്തരവാദിത്വം ചുമത്തുന്നത് പാർട്ടിയുടെ പ്രതിസന്ധി പരിഹരിക്കില്ലെന്ന വിമർശനവും ഇതിലൂടെ ഉയരുന്നു.