ഡിവൈഎസ്പി സ്പെഷൽ റിക്രൂട്ട്മെന്റിൽ മുൻ എസ്‌എഫ്ഐ നേതാവിന് ഒന്നാം റാങ്ക്; ക്രമക്കേട് ആരോപിച്ച് മുഖ്യമന്ത്രിക്കും ആഭ്യന്തര മന്ത്രിക്കും പരാതി

തിരുവനന്തപുരം: പി.എസ്.സി നടത്തുന്ന ഡിവൈഎസ്പി സ്പെഷൽ റിക്രൂട്ട്മെന്റിൽ മുൻ എസ്‌എഫ്ഐ നേതാവിന് വഴിവിട്ട് ഒന്നാം റാങ്ക് നൽകിയെന്ന പരാതിയുമായി സേവ് യൂണിവേഴ്‌സിറ്റി ക്യാംപയിൻ കമ്മിറ്റി. മുൻ എസ്‌എഫ്ഐ നേതാവ് കെ.ജെ. ജിതിന്റെ നിയമന ശുപാർശയിൽ ക്രമക്കേട് നടന്നതായി ആരോപിച്ച് മുഖ്യമന്ത്രിക്കും ആഭ്യന്തര മന്ത്രിക്കും പരാതി നൽകി.

ജിതിന് പരിശീലനത്തിനുള്ള അനുമതിയും നിയമന ഉത്തരവും നൽകുന്നത് തടയണമെന്നാണ് പരാതിയിലെ പ്രധാന ആവശ്യം. പൊലീസ് ബറ്റാലിയൻ കോൺസ്റ്റബിൾ റാങ്ക് പട്ടികയിൽ പ്രധാന ലിസ്റ്റിൽ പോലും ഇടംനേടാൻ കഴിയാതിരുന്ന വ്യക്തിക്ക് ഡിവൈഎസ്പി സ്പെഷൽ റിക്രൂട്ട്മെന്റിൽ ഒന്നാം റാങ്ക് ലഭിച്ചതിൽ ദുരൂഹതയുണ്ടെന്നാണ് പരാതിക്കാരുടെ വാദം.

ഗ്രേസ് മാർക്ക് ആനുകൂല്യത്തോടെ മൂന്നാം ക്ലാസിൽ ബികോം പാസായ ജിതിൻ, സബ് ഇൻസ്പെക്ടർ, യൂണിവേഴ്സിറ്റി അസിസ്റ്റന്റ്, ഹൈക്കോടതി അസിസ്റ്റന്റ്, ഗവൺമെന്റ് ഓഡിറ്റർ തുടങ്ങിയ തസ്തികകളിൽ ജോലി ചെയ്യുന്ന ഉയർന്ന യോഗ്യതയുള്ള ഉദ്യോഗാർഥികളെ പിന്തള്ളിയാണ് ഒന്നാം റാങ്ക് നേടിയതെന്ന് പരാതിയിൽ ചൂണ്ടിക്കാട്ടുന്നു.

എറണാകുളം ജില്ലയിലെ വിവിധ കോളജ് പ്രിൻസിപ്പൽമാരെ കയ്യേറ്റം ചെയ്തതിനും മദ്യപിച്ച് വാഹനമോടിച്ചതിനും ഉൾപ്പെടെ നിരവധി കേസുകളിൽ ജിതിനെതിരെ എഫ്ഐആറുകൾ രജിസ്റ്റർ ചെയ്തിട്ടുണ്ടെന്നും പരാതിയിൽ പറയുന്നു.

2025 സെപ്റ്റംബറിലാണ് ഡിവൈഎസ്പി സ്പെഷൽ റിക്രൂട്ട്മെന്റിലേക്ക് ഏകദേശം 17,000 പേരിൽനിന്ന് പി.എസ്.സി അപേക്ഷ ക്ഷണിച്ചത്. ഡിസംബർ 25ന് എഴുത്തുപരീക്ഷ നടത്തി. 2026 മാർച്ച് 26ന് കായികക്ഷമതാ പരീക്ഷയും ഏപ്രിൽ 26ന് 35 ഉദ്യോഗാർഥികളുടെ അഭിമുഖവും പൂർത്തിയാക്കി. മേയ് ആറിനാണ് അന്തിമ റാങ്ക് പട്ടിക പ്രസിദ്ധീകരിച്ചത്.

പി.എസ്.സി ചെയർമാൻ എം.ആർ. ബൈജു നേരിട്ട് പങ്കെടുത്ത അഭിമുഖത്തിൽ എഴുത്തുപരീക്ഷയിൽ ഉയർന്ന മാർക്ക് നേടിയ ഉദ്യോഗാർഥികളെ പിന്നിലാക്കാൻ ക്രമവിരുദ്ധമായി ഉയർന്ന മാർക്ക് നൽകിയെന്നാണ് സേവ് യൂണിവേഴ്‌സിറ്റി ക്യാംപയിൻ കമ്മിറ്റിയുടെ ആരോപണം. പരാതിയിൽ ഉന്നയിച്ചിരിക്കുന്ന ആരോപണങ്ങളിൽ ഔദ്യോഗിക അന്വേഷണത്തിലൂടെ വ്യക്തത വരേണ്ടതുണ്ട്.