ജിമെയിൽ 'സ്റ്റോറേജ് ഫുൾ' ആണോ? ദാ, ഒരൊറ്റ ക്ലിക്കിൽ ഇൻബോക്സ് ക്ലീനാക്കാം!
Gmail storage can fill up quickly with thousands of unwanted emails. Bulk deleting these emails efficiently is crucial for managing your digital space.
Desk Mediagraamam 
മൊബൈൽ സ്ക്രീനിൽ ദിവസവും വന്ന് നിറയുന്ന 'Storage Full' എന്ന വാണിംഗ് കണ്ട് മടുത്തോ? ആയിരക്കണക്കിന് പ്രൊമോഷൻ മെയിലുകളും പരസ്യങ്ങളും കാരണം ആവശ്യമുള്ള ഇമെയിലുകൾ പോലും കാണാൻ പറ്റാത്ത അവസ്ഥയിലാണോ നിങ്ങൾ? പേടിക്കേണ്ട, ഓരോ മെയിലായി തിരഞ്ഞുപിടിച്ച് ഡിലീറ്റ് ചെയ്ത് സമയം കളയേണ്ടതില്ല. നിങ്ങളുടെ ജിമെയിൽ ഇൻബോക്സ് ഒരൊറ്റ ക്ലിക്കിൽ എങ്ങനെ പുത്തനാക്കിയെടുക്കാമെന്ന് നോക്കാം!
ഈ ട്രിക്ക് പൂർണ്ണമായി വർക്ക് ചെയ്യാൻ ലാപ്ടോപ്പോ കമ്പ്യൂട്ടറോ ഉപയോഗിക്കുന്നതാണ് എളുപ്പം. മൊബൈലിലാണ് ചെയ്യുന്നതെങ്കിൽ, ഗൂഗിൾ ക്രോം ബ്രൗസറിൽ 'Desktop Site' മോഡ് ഓൺ ചെയ്ത ശേഷം ജിമെയിൽ ലോഗിൻ ചെയ്താൽ മതി.
ഇൻബോക്സ് മൊത്തമായി തൂത്തുവാരാൻ 3 സ്റ്റെപ്പുകൾ:
-
ഫോൾഡർ തിരഞ്ഞെടുക്കുക: കമ്പ്യൂട്ടറിൽ ജിമെയിൽ ഓപ്പൺ ചെയ്ത് പ്രൈമറി (Primary), സോഷ്യൽ (Social), പ്രൊമോഷൻസ് (Promotions) എന്നിവയിൽ ഏത് കാറ്റഗറിയിലെ മെയിലുകളാണ് ഡിലീറ്റ് ചെയ്യേണ്ടതെന്ന് തീരുമാനിക്കുക.
-
വൺ-ക്ലിക്ക് സെലക്ഷൻ: ഇൻബോക്സിന് മുകളിൽ ഇടതുവശത്തായി കാണുന്ന ചതുരത്തിലുള്ള 'Check box'-ൽ ക്ലിക്ക് ചെയ്യുക. ഇപ്പോൾ ആ പേജിലെ 50 മെയിലുകൾ സെലക്ട് ആകും. ഉടൻ തന്നെ അതിന് മുകളിലായി തെളിഞ്ഞു വരുന്ന "Select all conversations..." എന്ന നീല ലിങ്കിൽ ക്ലിക്ക് ചെയ്യുക. ഇതോടെ ആ ഫോൾഡറിലെ ആയിരക്കണക്കിന് ഇമെയിലുകൾ ഒന്നിച്ച് സെലക്ട് ആകും!
-
ഡിലീറ്റ്: ഇനി മുകളിലെ ടൂൾബാറിലുള്ള 'Trash' (ഡസ്റ്റ്ബിൻ) ഐക്കണിൽ ക്ലിക്ക് ചെയ്ത് 'OK' നൽകുക. പണി തീർന്നു!
ഒരു പ്രത്യേക വ്യക്തിയുടെയോ കമ്പനിയുടെയോ മെയിലുകൾ മാത്രം കളയണോ?
ഫ്ലിപ്കാർട്ട്, ആമസോൺ അല്ലെങ്കിൽ മറ്റേതെങ്കിലും പ്രത്യേക കമ്പനികളിൽ നിന്നുള്ള മെയിലുകൾ മാത്രം ഒഴിവാക്കാനും എളുപ്പവഴിയുണ്ട്:
-
ജിമെയിൽ സെർച്ച് ബാറിൽ ആ കമ്പനിയുടെയോ വ്യക്തിയുടെയോ പേര്/ഇമെയിൽ ഐഡി ടൈപ്പ് ചെയ്ത് സെർച്ച് ചെയ്യുക.
-
അവർ അയച്ച മെയിലുകൾ മാത്രം ലിസ്റ്റ് ചെയ്യുമ്പോൾ, മുൻപ് പറഞ്ഞതുപോലെ മുകളിലെ 'Check box' വഴി 'Select all conversations that match this search' കൊടുക്കുക.
-
ഡിലീറ്റ് ഐക്കൺ ക്ലിക്ക് ചെയ്താൽ ആ മെയിലുകൾ മാത്രമായി പമ്പകടക്കും!
ഇതുകൂടി ചെയ്തില്ലെങ്കിൽ സ്റ്റോറേജ് ഫ്രീയാകില്ല!
നമ്മൾ ഡിലീറ്റ് ചെയ്യുന്ന ഇമെയിലുകൾ നേരെ പോകുന്നത് 'Trash' (Bin) ഫോൾഡറിലേക്കാണ്. ഇവ അവിടെ 30 ദിവസം വരെ കിടക്കും. അതുകൊണ്ട് സ്റ്റോറേജ് ഉടൻ തന്നെ ഫ്രീയാക്കാൻ ജിമെയിലിന്റെ ഇടതുവശത്തുള്ള മെനുവിൽ നിന്ന് 'More' ക്ലിക്ക് ചെയ്ത് 'Trash' ഫോൾഡർ ഓപ്പൺ ചെയ്യുക. അവിടെ കാണുന്ന "Empty Trash now" ക്ലിക്ക് ചെയ്താൽ മെയിലുകൾ പൂർണ്ണമായി ഇല്ലാതാവുകയും നിങ്ങളുടെ ജിമെയിൽ സ്പേസ് തിരികെ ലഭിക്കുകയും ചെയ്യും.
