‘വന്ദേമാതരം’ സെമിനാർ തടഞ്ഞാൽ നടപടി; വിദ്യാർത്ഥികൾക്ക് വൈസ് ചാൻസലറുടെ ഭീഷണി.

കാസർകോട്: കേരള കേന്ദ്ര സർവകലാശാലയിൽ നടക്കുന്ന ‘വന്ദേമാതരം’ ദേശീയ സെമിനാറിനെതിരെ പ്രതിഷേധം ശക്തമാകുന്നതിനിടെ വിദ്യാർത്ഥികൾക്ക് കർശന മുന്നറിയിപ്പുമായി വൈസ് ചാൻസലർ സിദ്ദു പി. അൽഗൂർ. സെമിനാറിനോ പരിപാടിയിൽ പങ്കെടുക്കുന്നവർക്കോ തടസ്സം സൃഷ്ടിച്ചാൽ കടുത്ത നിയമനടപടി സ്വീകരിക്കുമെന്ന് വ്യക്തമാക്കിയാണ് സർവകലാശാല അധികൃതർ സർക്കുലർ പുറത്തിറക്കിയത്.

വന്ദേമാതരം ആലാപനം തടയുകയോ ആലാപനത്തിൽ പങ്കെടുക്കുന്നവരെ ബോധപൂർവം തടസ്സപ്പെടുത്തുകയോ ചെയ്യുന്നവർക്ക് മൂന്ന് വർഷം വരെ തടവും പിഴയും ലഭിക്കാവുന്ന കുറ്റങ്ങൾ ചുമത്തുമെന്നും സർക്കുലറിൽ വ്യക്തമാക്കുന്നതായാണ് റിപ്പോർട്ട്. ഇതോടെയാണ് സെമിനാറിനെതിരെ പ്രതിഷേധവുമായി രംഗത്തുള്ള വിദ്യാർത്ഥി സംഘടനകൾക്ക് സർവകലാശാലയുടെ കർശന മുന്നറിയിപ്പ്.

വന്ദേമാതരത്തിന്റെ 150-ാം വാർഷികത്തോടനുബന്ധിച്ചാണ് ഒക്ടോബർ 6, 7 തീയതികളിൽ കേരള കേന്ദ്ര സർവകലാശാലയിൽ ദ്വിദിന ദേശീയ സെമിനാർ സംഘടിപ്പിക്കുന്നത്. സാഹിത്യ അക്കാദമി, അഖില ഭാരതീയ സാഹിത്യ പരിഷത്ത്, കേരള കേന്ദ്ര സർവകലാശാല എന്നിവയുടെ സഹകരണത്തോടെയാണ് പരിപാടി.

പ്രജ്ഞാ പ്രവാഹ് ദേശീയ കൺവീനർ ജെ. നന്ദകുമാറിനെ ഉദ്ഘാടന സമ്മേളനത്തിലെ മുഖ്യപ്രഭാഷകനായി ക്ഷണിച്ചതാണ് പ്രധാനമായും വിദ്യാർത്ഥി പ്രതിഷേധത്തിന് കാരണമായത്. നന്ദകുമാർ ക്യാമ്പസിലെത്തിയാൽ പ്രതിഷേധിക്കുമെന്ന് എസ്‌എഫ്‌ഐ ഉൾപ്പെടെയുള്ള സംഘടനകൾ വ്യക്തമാക്കിയിട്ടുണ്ട്. എൻഎസ്‌യുഐ, എംഎസ്എഫ് സംഘടനകളും പരിപാടിയുടെ സംഘാടന രീതിയിലും സഹസംഘടനകളുടെ പങ്കാളിത്തത്തിലും എതിർപ്പ് ഉന്നയിച്ചിട്ടുണ്ട്.

സർവകലാശാലയുടെ അക്കാദമികവും സ്ഥാപനപരവുമായ നിഷ്പക്ഷത ഉറപ്പാക്കണമെന്നാണ് പ്രതിഷേധിക്കുന്ന വിദ്യാർത്ഥി സംഘടനകളുടെ ആവശ്യം. അതേസമയം, സെമിനാർ നിശ്ചയിച്ച പ്രകാരം തന്നെ നടത്താനുള്ള ഒരുക്കങ്ങളിലാണ് സർവകലാശാല.

ഒക്ടോബർ 7ന് നടക്കുന്ന സമാപന സമ്മേളനത്തിൽ കേരള ഗവർണർ രാജേന്ദ്ര വിശ്വനാഥ് അർലേക്കർ പങ്കെടുക്കും. പ്രതിഷേധവും സർവകലാശാലയുടെ കർശന മുന്നറിയിപ്പും നിലനിൽക്കുന്ന സാഹചര്യത്തിൽ സെമിനാർ ദിവസങ്ങളിൽ ക്യാമ്പസിൽ സംഘർഷസാധ്യത ഒഴിവാക്കുന്നതിനുള്ള നടപടികളും ശ്രദ്ധേയമാണ്.