കേരളത്തിന്റെ ഊർജമേഖലയിൽ പുതിയ കുതിപ്പ്; ആദ്യ ബെസ് പദ്ധതി കാസർകോട് മുള്ളേരിയയിൽ പ്രവർത്തനം തുടങ്ങി

കാസർകോട്: പകൽ സമയത്ത് സൂര്യപ്രകാശത്തിൽനിന്ന് ഉൽപ്പാദിപ്പിക്കുന്ന വൈദ്യുതി സംഭരിച്ചുവെച്ച് രാത്രിയിൽ ഉപയോഗിക്കാൻ കഴിയുന്ന ബാറ്ററി എനർജി സ്റ്റോറേജ് സിസ്റ്റം (BESS) പദ്ധതിയിലൂടെ കേരളത്തിന്റെ ഊർജമേഖലയിൽ പുതിയ മുന്നേറ്റം. സംസ്ഥാനത്തെ ആദ്യ ഗ്രിഡ് സ്കെയിൽ ബാറ്ററി സ്റ്റോറേജ് പദ്ധതി കാസർകോട് ജില്ലയിലെ മുള്ളേരിയയിൽ പ്രവർത്തനം ആരംഭിച്ചു.

രാജ്യത്തെ ആദ്യത്തെ നാലുമണിക്കൂർ സ്റ്റോറേജ് സംവിധാനമെന്ന പ്രത്യേകതയും മുള്ളേരിയ പദ്ധതിക്കുണ്ട്. 15 മെഗാവാട്ട് ശേഷിയുള്ള ഈ സംവിധാനത്തിലൂടെ 60 മെഗാവാട്ട് അവർ വൈദ്യുതി സംഭരിക്കാനും നാലുമണിക്കൂർ തുടർച്ചയായോ ഇടവിട്ടോ ഗ്രിഡിലേക്ക് നൽകാനും കഴിയും.

കേന്ദ്ര പൊതുമേഖലാ സ്ഥാപനമായ നാഷണൽ ഹൈഡ്രോ പവർ കോർപ്പറേഷന്റെ (NHPC) സഹായത്തോടെയാണ് പദ്ധതി നടപ്പാക്കിയത്. കേന്ദ്രസർക്കാർ വിവിധ പൊതുമേഖലാ സ്ഥാപനങ്ങൾക്ക് അനുവദിച്ച 5000 മെഗാവാട്ട് അവർ ബാറ്ററി സ്റ്റോറേജ് പദ്ധതികളിൽ രാജ്യത്ത് ആദ്യമായി കമ്മീഷൻ ചെയ്യുന്ന പദ്ധതിയെന്ന പ്രത്യേകതയും ഇതിനുണ്ട്. ഒപെറ എനർജിയാണ് പദ്ധതിയുടെ ഡെവലപ്പർ.

എങ്ങനെയാണ് ബെസ് പ്രവർത്തിക്കുന്നത്?

ലളിതമായി പറഞ്ഞാൽ, വലിയ ശേഷിയുള്ള ഒരു പവർ ബാങ്കാണ് ബാറ്ററി എനർജി സ്റ്റോറേജ് സിസ്റ്റം. പകൽ സമയത്ത് സോളാർ നിലയങ്ങളിൽനിന്ന് ഉൽപ്പാദിപ്പിക്കുന്നതും വൈദ്യുതി ആവശ്യകത കുറവുള്ള സമയത്ത് ലഭ്യമാകുന്നതുമായ അധിക വൈദ്യുതി ബാറ്ററികളിൽ സംഭരിച്ചുവെക്കും. വൈകുന്നേരങ്ങളിലും രാത്രിയിലും വൈദ്യുതി ആവശ്യകത വർധിക്കുമ്പോൾ ഈ ശേഖരം വീണ്ടും വൈദ്യുതി ഗ്രിഡിലേക്ക് നൽകും.

കേരളം പുരപ്പുറ സൗരോർജ ഉൽപ്പാദനത്തിൽ രാജ്യത്തെ മുൻനിര സംസ്ഥാനങ്ങളിലൊന്നാണ്. എന്നാൽ പകൽ സമയത്ത് സൗരോർജ വൈദ്യുതി ധാരാളമായി ലഭിക്കുമ്പോൾ വൈകുന്നേരത്തോടെ വീടുകളിലും സ്ഥാപനങ്ങളിലും വൈദ്യുതി ഉപയോഗം ഒരേസമയം വർധിക്കുന്നത് വലിയ വെല്ലുവിളിയാണ്. ഈ സമയത്തെ ഉയർന്ന വൈദ്യുതി ആവശ്യകതയാണ് പീക്ക് ഡിമാൻഡ് എന്നറിയപ്പെടുന്നത്.

സൗരോർജം പകൽ മാത്രം ലഭ്യമാകുന്ന പരിമിതി മറികടക്കാനും ഉൽപ്പാദിപ്പിക്കുന്ന വൈദ്യുതി പാഴാകാതെ രാത്രിയിലും ഉപയോഗിക്കാനും ബെസ് സംവിധാനത്തിന് കഴിയും. വൈകുന്നേരങ്ങളിലെ ഉയർന്ന ആവശ്യകത നേരിടുന്നതിനൊപ്പം ഉയർന്ന വിലയ്ക്ക് പുറത്തുനിന്ന് വൈദ്യുതി വാങ്ങേണ്ടിവരുന്ന സാഹചര്യം കുറയ്ക്കാനും ഇതിലൂടെ സാധിക്കും.

മുള്ളേരിയയിലെ പദ്ധതി തുടക്കം മാത്രമാണ്. മൈലാട്ടിയിൽ 125 മെഗാവാട്ട് ശേഷിയിലും 500 മെഗാവാട്ട് അവർ സംഭരണശേഷിയിലുമുള്ള വമ്പൻ ബെസ് പദ്ധതി പൂർത്തീകരണത്തോടടുക്കുകയാണ്.

ശ്രീകണ്ഠപുരത്ത് 40 മെഗാവാട്ട്, പോത്തൻകോട് 40 മെഗാവാട്ട്, അരീക്കോട് 30 മെഗാവാട്ട് ശേഷിയുള്ള പദ്ധതികളും നിർമ്മാണ പുരോഗതിയിലാണ്.

രാത്രികാല വൈദ്യുതി ആവശ്യകതയുടെ വലിയൊരു പങ്ക് സംസ്ഥാനത്തിന് പുറത്തുനിന്ന് വാങ്ങേണ്ടിവരുന്ന കേരളത്തിന് ഇത്തരം സംഭരണ സംവിധാനങ്ങൾ ഏറെ നിർണായകമാണ്. വൈദ്യുതി ആവശ്യകത ഉയരുന്ന സമയത്ത് സംഭരിച്ചുവെച്ച വൈദ്യുതി ഉപയോഗിക്കാനാകുന്നത് പുറത്തുനിന്നുള്ള വൈദ്യുതി വാങ്ങലിന്റെ ചെലവ് കുറയ്ക്കുന്നതിനും വിതരണശൃംഖലയുടെ കാര്യക്ഷമത മെച്ചപ്പെടുത്തുന്നതിനും സഹായിക്കും.

ഫോസിൽ ഇന്ധനങ്ങളെ ആശ്രയിക്കുന്നത് കുറയ്ക്കുന്നതിനും പുനരുപയോഗ ഊർജത്തിന്റെ പരമാവധി പ്രയോജനം ഉറപ്പാക്കുന്നതിനും ബെസ് പദ്ധതികൾക്ക് വലിയ പങ്കുവഹിക്കാനാകും. ബാറ്ററി ലഭ്യതയും പദ്ധതികളുടെ ചെലവും ഉൾപ്പെടെയുള്ള വെല്ലുവിളികൾ മറികടന്ന് കൂടുതൽ പദ്ധതികൾ യാഥാർത്ഥ്യമാകുന്നതോടെ കേരളത്തിന്റെ ഊർജസുരക്ഷയ്ക്ക് പുതിയ കരുത്താകുമെന്നാണ് പ്രതീക്ഷ.