ശബരിമലയിൽ പുതിയ മേൽശാന്തിയായി ശങ്കരൻ നമ്പൂതിരി; മാളികപ്പുറത്ത് എ. ദാമോദരൻ നമ്പൂതിരിക്ക് നറുക്കെടുപ്പിലൂടെ നിയമനം

പത്തനംത്തിട്ട: ശബരിമല അയ്യപ്പ ക്ഷേത്രത്തിലെ പുതിയ മേൽശാന്തിയായി അരീക്കര സുബ്രഹ്‌മണ്യൻ ശങ്കരൻ നമ്പൂതിരിയെ തിരഞ്ഞെടുത്തു. നറുക്കെടുപ്പിലൂടെയായിരുന്നു തിരഞ്ഞെടുപ്പ്. നിലവിൽ തിരുവനന്തപുരം പുളിമൂട് സ്വദേശിയായ അദ്ദേഹം പഴവങ്ങാടി ക്ഷേത്രത്തിലെ മേൽശാന്തിയായി സേവനമനുഷ്ഠിച്ചുവരികയാണ്. ശബരിമല മേൽശാന്തി സ്ഥാനത്തേക്ക് അഞ്ച് തവണ അപേക്ഷിച്ചിട്ടുള്ള ശങ്കരൻ നമ്പൂതിരി മൂന്ന് തവണ ചുരുക്കപ്പട്ടികയിലും ഇടം നേടിയിരുന്നു. ഇത്തവണ നറുക്കെടുപ്പിലൂടെ തിരഞ്ഞെടുക്കപ്പെട്ടതിൽ ഏറെ സന്തോഷമുണ്ടെന്നും ഈ നേട്ടം പ്രതീക്ഷിച്ചിരുന്നുവെന്നും അദ്ദേഹം പ്രതികരിച്ചു.

മാളികപ്പുറം ക്ഷേത്രത്തിലെ പുതിയ മേൽശാന്തിയായി എ. ദാമോദരൻ നമ്പൂതിരിയെയും തിരഞ്ഞെടുത്തു. കോഴിക്കോട് വടകര സ്വദേശിയായ അദ്ദേഹം നിലവിൽ പയ്യോളി കീഴൂർ ശിവക്ഷേത്രത്തിലെ മേൽശാന്തിയാണ്.

സന്നിധാനത്ത് തന്ത്രിമാരുടെയും തിരുവിതാംകൂർ ദേവസ്വം ബോർഡ് ഭാരവാഹികളുടെയും സാന്നിധ്യത്തിലായിരുന്നു തിരഞ്ഞെടുപ്പ് നടപടികൾ നടന്നത്. പന്തളം കൊട്ടാരത്തിൽ നിന്നുള്ള കുട്ടിയാണ് നറുക്കെടുപ്പിലൂടെ മേൽശാന്തിമാരെ തിരഞ്ഞെടുത്തത്. വരാനിരിക്കുന്ന മണ്ഡല-മകരവിളക്ക് തീർഥാടന കാലത്തിന് മുന്നോടിയായി വൃശ്ചികം ഒന്നിന് ശബരിമല നട തുറക്കുന്നതോടെയാണ് പുതിയ മേൽശാന്തിമാർ ചുമതലയേൽക്കുക.