ഗ്യാനേഷ് കുമാറിനെ പുറത്താക്കാൻ പ്രതിപക്ഷം; ഇംപീച്ച്‌മെന്റ് നീക്കത്തിൽ ബിജെപിയിലും ആശങ്കയോ?

പാർലമെന്റിലേക്ക് ഇരമ്പിയെത്തുന്ന പ്രതിപക്ഷം ആവശ്യപ്പെടുന്നത് ഒന്ന് മാത്രം... മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി. ഇംപീച്ച്‌മെന്റ് നടപടികൾ പാർലമെന്റിൽ തുടങ്ങുമ്പോൾ വലിയ ആശങ്കയിലാണ് തിരഞ്ഞെടുപ്പ് കമ്മീഷണർ. വോട്ട് ചോരി ആരോപണങ്ങളിൽ കുടുങ്ങി, സുപ്രീം കോടതിയിൽ ഭാവി ചോദ്യചിഹ്നമായി മാറിയ അവസ്ഥയിൽ തിരഞ്ഞെടുപ്പ് കമ്മീഷന് പുറത്തേക്കുള്ള വഴി തെളിക്കുകയാണ് പ്രതിപക്ഷം.

രാജ്യത്ത് സ്വതന്ത്രവും നീതിപൂർവകവുമായ തിരഞ്ഞെടുപ്പ് നടത്താനുള്ള ഉത്തരവാദിത്തം തിരഞ്ഞെടുപ്പ് കമ്മീഷനാണ്. അതിൽ നിന്ന് കമ്മീഷൻ പിന്നാക്കം പോകുമ്പോൾ ചോദ്യങ്ങൾ ഉയരുന്നത് സ്വാഭാവികമാണ്. മുഖ്യ തിരഞ്ഞെടുപ്പ് കമ്മീഷണറുടെ നിയമനം ആറ് വർഷത്തേക്കോ അല്ലെങ്കിൽ 65 വയസ്സ് പൂർത്തിയാകുന്നതുവരെയോ ആണ്. ഇതിൽ ഏതാണ് ആദ്യം സംഭവിക്കുന്നത് എന്നതിനെ ആശ്രയിച്ചിരിക്കും കാലാവധി. സുപ്രീം കോടതി ജഡ്ജിമാർക്ക് ലഭിക്കുന്നതിന് സമാനമായ സേവന, സാമ്പത്തിക ആനുകൂല്യങ്ങളാണ് മുഖ്യ തിരഞ്ഞെടുപ്പ് കമ്മീഷണർക്കും ലഭിക്കുന്നത്.

മുഖ്യ തിരഞ്ഞെടുപ്പ് കമ്മീഷണറെ സ്ഥാനത്തുനിന്ന് നീക്കം ചെയ്യുന്നതിനുള്ള മാനദണ്ഡം വളരെ കഠിനമാണ്. രാഷ്ട്രീയ സമ്മർദങ്ങളിൽ നിന്ന് തിരഞ്ഞെടുപ്പ് കമ്മീഷനെ സംരക്ഷിക്കുക എന്ന ലക്ഷ്യത്തോടെയാണ് ഇത്തരമൊരു ശക്തമായ സംരക്ഷണം നൽകിയത്. ഭരണഘടനയിലെ ആർട്ടിക്കിൾ 324(5) പ്രകാരം സുപ്രീം കോടതി ജഡ്ജിയെ പുറത്താക്കുന്ന അതേ രീതിയിലും അതേ കാരണങ്ങളിലുമല്ലാതെ മുഖ്യ തിരഞ്ഞെടുപ്പ് കമ്മീഷണറെ സ്ഥാനത്തുനിന്ന് നീക്കാനാവില്ല. മറ്റ് തിരഞ്ഞെടുപ്പ് കമ്മീഷണർമാരെ മുഖ്യ തിരഞ്ഞെടുപ്പ് കമ്മീഷണറുടെ ശുപാർശയുടെ അടിസ്ഥാനത്തിൽ മാത്രമേ നീക്കം ചെയ്യാൻ കഴിയൂ. പാർലമെന്റ് ഇക്കാര്യത്തിൽ ഉണ്ടാക്കുന്ന നിയമങ്ങളുടെ വ്യവസ്ഥകൾക്ക് വിധേയമായിരിക്കും ഈ നടപടിക്രമവും. 2023-ലെ നിയമത്തിലെ സെക്ഷൻ 11-ലും സമാനമായ വ്യവസ്ഥയാണ് ഉള്ളത്. സുപ്രീം കോടതി ജഡ്ജിയെ പുറത്താക്കുന്ന അതേ രീതിയിലും അതേ കാരണങ്ങളിലുമല്ലാതെ മുഖ്യ തിരഞ്ഞെടുപ്പ് കമ്മീഷണറെ നീക്കം ചെയ്യാൻ കഴിയില്ലെന്നാണ് നിയമം വ്യക്തമാക്കുന്നത്.

സുപ്രീം കോടതി ജഡ്ജിയെ നീക്കം ചെയ്യുന്നതിനുള്ള നടപടിക്രമം വ്യക്തമാക്കുന്ന ഭരണഘടനയിലെ ആർട്ടിക്കിൾ 124(4) പ്രകാരം തെളിയിക്കപ്പെട്ട ദുര്‍നടപ്പ് അല്ലെങ്കിൽ കാര്യശേഷിയിലെ കുറവ് എന്നീ കാരണങ്ങളുടെ അടിസ്ഥാനത്തിൽ മാത്രമേ നടപടി സ്വീകരിക്കാൻ കഴിയൂ. അഴിമതി പ്രവർത്തനങ്ങൾ, ഔദ്യോഗിക പദവിയുടെ ദുരുപയോഗം തുടങ്ങിയവ ദുര്‍നടപ്പിന്റെ പരിധിയിൽ വരാം. മുഖ്യ തിരഞ്ഞെടുപ്പ് കമ്മീഷണറുടെ പദവിക്ക് നിരക്കാത്ത പ്രവർത്തനങ്ങൾ അല്ലെങ്കിൽ ഔദ്യോഗിക ചുമതലകൾ നിർവഹിക്കുന്നതിൽ വീഴ്ച വരുത്തുന്നതും ഇതിന്റെ ഭാഗമായി പരിഗണിക്കപ്പെടാമെന്ന് വിവിധ കോടതി വ്യാഖ്യാനങ്ങളിലുണ്ട്.

മുഖ്യ തിരഞ്ഞെടുപ്പ് കമ്മീഷണറെ നീക്കം ചെയ്യുന്നതിനുള്ള നടപടിക്ക് തുടക്കമിടാൻ പാർലമെന്റിന്റെ ഇരുസഭകളിലെയും അംഗങ്ങൾ ദുര്‍നടപ്പോ കാര്യശേഷിക്കുറവോ ആരോപിച്ച് പ്രമേയ നോട്ടീസ് നൽകണം. ലോക്‌സഭയിൽ പ്രമേയം സ്വീകരിക്കപ്പെടണമെങ്കിൽ കുറഞ്ഞത് 100 എംപിമാരും രാജ്യസഭയിൽ കുറഞ്ഞത് 50 എംപിമാരും അതിൽ ഒപ്പുവെച്ചിരിക്കണം. പ്രമേയം സ്വീകരിക്കണോ തള്ളണോ എന്ന് തീരുമാനിക്കുന്നതിന് മുമ്പ് ബന്ധപ്പെട്ട വ്യക്തികളിൽ നിന്നും രേഖകളിൽ നിന്നും വിവരങ്ങൾ തേടാനും അധികാരികൾക്ക് കഴിയും.

പ്രമേയം സ്വീകരിക്കപ്പെട്ടാൽ ആരോപണങ്ങളുടെ സാധുത പരിശോധിക്കാൻ അന്വേഷണം നടത്തും. ദുര്‍നടപ്പോ അതുമല്ലെങ്കിൽ കടമകൾ നിർവഹിക്കുന്നതിൽ പരാജയപ്പെട്ടാലോ ഇതുസംബന്ധിച്ച തെളിവുകൾ പരിശോധിക്കുന്നതിനായി അന്വേഷണ സമിതി രൂപീകരിക്കുന്നതാണ് ഇതിന്റെ ഭാഗം.

മുഖ്യ തിരഞ്ഞെടുപ്പ് കമ്മീഷണറെ നീക്കം ചെയ്യാനുള്ള പ്രമേയത്തിന് പാർലമെന്റിന്റെ ഓരോ സഭയിലെയും ആകെ അംഗസംഖ്യയുടെ ഭൂരിപക്ഷത്തിന്റെ പിന്തുണ ലഭിക്കണം. കൂടാതെ, ഹാജരായി വോട്ട് ചെയ്യുന്ന അംഗങ്ങളിൽ മൂന്നിൽ രണ്ട് ഭൂരിപക്ഷത്തോടെ ഇരുസഭകളിലും പ്രമേയം പാസാകുകയും വേണം. പ്രമേയം വിജയകരമായി പാസായാൽ രാഷ്ട്രപതി മുഖ്യ തിരഞ്ഞെടുപ്പ് കമ്മീഷണറെ സ്ഥാനത്തുനിന്ന് നീക്കം ചെയ്യുന്നതിനുള്ള ഉത്തരവ് പുറപ്പെടുവിക്കും. ഭരണഘടനാപരമായ എല്ലാ നിബന്ധനകളും പൂർത്തിയായാൽ ഈ സാഹചര്യത്തിൽ രാഷ്ട്രപതിക്ക് പ്രത്യേക വിവേചനാധികാരമില്ല.

കഴിഞ്ഞ ഏപ്രിലിൽ, ഗ്യാനേഷ് കുമാറിനെ സ്ഥാനത്തുനിന്ന് നീക്കണമെന്നാവശ്യപ്പെട്ട് പ്രതിപക്ഷം ലോക്‌സഭയിലും രാജ്യസഭയിലും സമർപ്പിച്ച ഇംപീച്ച്‌മെന്റ് പ്രമേയങ്ങൾ ലോക്‌സഭാ സ്പീക്കറും രാജ്യസഭാ ചെയർമാനും തള്ളിയിരുന്നു. മാർച്ച് 12-ന് തൃണമൂൽ കോൺഗ്രസിന്റെ നേതൃത്വത്തിലാണ് ലോക്‌സഭയിലും രാജ്യസഭയിലും ഇംപീച്ച്‌മെന്റ് പ്രമേയങ്ങൾ സമർപ്പിച്ചത്. ലോക്‌സഭയിലെ പ്രമേയത്തിൽ 130 എംപിമാരും രാജ്യസഭയിലെ പ്രമേയത്തിൽ 63 എംപിമാരും അന്ന് ഒപ്പുവെച്ചിരുന്നു. തിരഞ്ഞെടുപ്പ് കമ്മീഷൻ നടപ്പാക്കിവരുന്ന പ്രത്യേക തീവ്ര വോട്ടർ പട്ടിക പരിഷ്കരണമായ എസ്ഐആറുമായി ബന്ധപ്പെട്ട നടപടികളെ ഇരു പ്രമേയങ്ങളും ചൂണ്ടിക്കാട്ടിയിരുന്നു. വീണ്ടും ലോക്‌സഭയിൽ ഇംപീച്ച്‌മെന്റ് പ്രമേയം അവതരിപ്പിക്കുമ്പോൾ ഭരണപക്ഷത്തുനിന്ന് പോലും കൈകൾ ഉയർന്നേക്കാമെന്ന റിപ്പോർട്ടുകളാണ് പുറത്തുവരുന്നത്.