കോമൺവെൽത്ത് ഗെയിംസിൽ CWG റെക്കോർഡ് തകർത്ത് ഇന്ത്യയ്ക്ക് ആദ്യ സ്വർണം: മണിപ്പൂരിന്റെ കരുത്ത് മീരാബായി ചാനു സ്വർണ്ണം നേടി.

ഗ്ലാസ്‌ഗോ: കോമൺവെൽത്ത് ഗെയിംസ് 2026ൽ ഇന്ത്യയ്ക്ക് ആദ്യ സ്വർണം സമ്മാനിച്ച് ഭാരോദ്വഹന താരം മീരാബായി ചാനു വീണ്ടും ചരിത്രമെഴുതി. വനിതകളുടെ 48 കിലോ വിഭാഗത്തിൽ സ്വർണം നേടിയ ചാനു, കോമൺവെൽത്ത് ഗെയിംസിൽ തുടർച്ചയായി മൂന്നാം തവണയാണ് സ്വർണ മെഡൽ സ്വന്തമാക്കുന്നത്. 

റെക്കോർഡ് പ്രകടനത്തോടെയാണ് ചാനു സ്വർണം സ്വന്തമാക്കിയത്. സ്നാച്ചിലും ക്ലീൻ ആൻഡ് ജർക്കിലും മികച്ച പ്രകടനം പുറത്തെടുത്ത താരം ഗെയിംസ് റെക്കോർഡുകൾ മറികടന്നു. ആകെ 190 കിലോ ഭാരം ഉയർത്തിയാണ് ചാനു സ്വർണത്തിലേക്ക് കുതിച്ചത്. 

2018, 2022 കോമൺവെൽത്ത് ഗെയിംസുകളിലും സ്വർണം നേടിയിരുന്ന മീരാബായി ചാനു, 2026ലെ വിജയത്തോടെ ഗെയിംസിന്റെ ചരിത്രത്തിൽ അപൂർവ നേട്ടം സ്വന്തമാക്കി. 

ഒളിമ്പിക് വെള്ളി മെഡൽ ജേതാവായ ചാനുവിന്റെ ഈ വിജയം ഇന്ത്യയുടെ ഭാരോദ്വഹന രംഗത്തെ മറ്റൊരു അഭിമാന നിമിഷമായി മാറി. കഠിന പരിശീലനവും ശരീരഭാരം നിയന്ത്രിക്കാനുള്ള വലിയ വെല്ലുവിളികളും അതിജീവിച്ചാണ് താരം ഈ നേട്ടം കൈവരിച്ചത്. 

മീരാബായി ചാനുവിന്റെ സ്വർണത്തോടെ കോമൺവെൽത്ത് ഗെയിംസിലെ ഇന്ത്യയുടെ മെഡൽ വേട്ടയ്ക്ക് ശക്തമായ തുടക്കമാണ് ലഭിച്ചിരിക്കുന്നത്.