കാലാവസ്ഥാ വ്യതിയാനത്തെ നേരിടാൻ സംസ്ഥാനതല മോണിറ്ററിങ് യൂണിറ്റ്; എൽ നിനോ പ്രത്യാഘാതങ്ങൾ ചെറുക്കാൻ സംയോജിത കർമപദ്ധതി

തിരുവനന്തപുരം : കാലാവസ്ഥാ വ്യതിയാനവും എൽ നിനോ പ്രതിഭാസവും കാർഷിക മേഖലയിലുണ്ടാക്കുന്ന പ്രത്യാഘാതങ്ങൾ ഫലപ്രദമായി നേരിടുന്നതിനും ജലസംരക്ഷണ പ്രവർത്തനങ്ങൾ ഏകോപിപ്പിക്കുന്നതിനുമായി സംസ്ഥാനതല മോണിറ്ററിങ് യൂണിറ്റ് രൂപീകരിക്കാൻ നടപടി. ഇതിനായി വിവിധ വകുപ്പുകളെ ഏകോപിപ്പിച്ചുള്ള സംയോജിത കർമപദ്ധതിയും ആവിഷ്കരിക്കും. നിയമസഭാ ബാങ്ക്വറ്റ് ഹാളിൽ കൃഷിവകുപ്പ് മന്ത്രി ടി. സിദ്ദിഖിന്റെ അധ്യക്ഷതയിൽ ചേർന്ന മന്ത്രിതല യോഗത്തിലാണ് ഇതുസംബന്ധിച്ച തീരുമാനമുണ്ടായത്.

കാലാവസ്ഥാ വ്യതിയാനത്തിന്റെ പശ്ചാത്തലത്തിൽ കാർഷിക മേഖലയിലുണ്ടാകുന്ന വെല്ലുവിളികൾ നേരിടുന്നതിനൊപ്പം ജലലഭ്യത ഉറപ്പാക്കുന്നതിനും ജലസ്രോതസ്സുകൾ സംരക്ഷിക്കുന്നതിനും പ്രത്യേക ഊന്നൽ നൽകും. തോടുകളുടെയും കുളങ്ങളുടെയും പുനരുദ്ധാരണം, മഴവെള്ള സംഭരണം, ജലനിർഗമന സംവിധാനങ്ങളുടെ പരിപാലനം, മണ്ണിലെ ഈർപ്പം നിലനിർത്തുന്നതിനുള്ള നടപടികൾ എന്നിവ ഏകോപിതമായി നടപ്പാക്കും. വിവിധ വകുപ്പുകളുടെ പ്രവർത്തനങ്ങൾ ഒരുമിപ്പിച്ച് പ്രാദേശിക സാഹചര്യങ്ങൾക്കനുസരിച്ച് പദ്ധതികൾ ആവിഷ്കരിക്കുകയാണ് ലക്ഷ്യം.

ജില്ലാ കളക്ടർമാരുടെ നേതൃത്വത്തിൽ ജില്ലാ തലത്തിലും തദ്ദേശസ്ഥാപനങ്ങളുടെ നേതൃത്വത്തിൽ പഞ്ചായത്ത് തലത്തിലും പ്രവർത്തനങ്ങൾ ഏകോപിപ്പിക്കും. ഓരോ പ്രദേശത്തെയും കാലാവസ്ഥാ സാഹചര്യങ്ങൾ, ജലലഭ്യത, കാർഷിക ആവശ്യങ്ങൾ എന്നിവ പരിഗണിച്ചായിരിക്കും പദ്ധതികൾ തയ്യാറാക്കുക. കാലാവസ്ഥാ വ്യതിയാനവും എൽ നിനോയും സൃഷ്ടിക്കാവുന്ന പ്രതിസന്ധികൾ മുൻകൂട്ടി കണ്ട് പ്രതിരോധ നടപടികൾ ശക്തമാക്കുന്നതിനും ഇതിലൂടെ സാധിക്കുമെന്നാണ് പ്രതീക്ഷ.

കാലാവസ്ഥാ വ്യതിയാനത്തിന്റെ പ്രത്യാഘാതങ്ങൾ നേരിടുന്നതിൽ പ്രത്യേക പ്രാധാന്യമുള്ള കുട്ടനാടിന് പ്രത്യേക പരിഗണന നൽകുന്നതിനുള്ള നടപടികളും യോഗം പരിഗണിച്ചു. ജലനിർഗമനം, ജലസംരക്ഷണം, കാർഷിക മേഖലയിലെ വെല്ലുവിളികൾ തുടങ്ങിയ വിഷയങ്ങളിൽ കുട്ടനാടിന്റെ സവിശേഷ സാഹചര്യങ്ങൾ കണക്കിലെടുത്തുള്ള ഇടപെടലുകൾക്കാണ് പ്രാധാന്യം നൽകുക.

യോഗത്തിൽ തദ്ദേശസ്വയംഭരണ വകുപ്പ് മന്ത്രി കെ.എം. ഷാജി, ജലവിഭവ വകുപ്പ് മന്ത്രി മോൻസ് ജോസഫ്, റവന്യൂ വകുപ്പ് മന്ത്രി എ.പി. അനിൽകുമാർ എന്നിവർ പങ്കെടുത്തു. ലാൻഡ് റവന്യൂ കമ്മിഷണർ എച്ച്. ദിനേശൻ ഐ.എ.എസ്., തദ്ദേശസ്വയംഭരണ വകുപ്പ് പ്രിൻസിപ്പൽ ഡയറക്ടർ ദിവ്യ എസ്. അയ്യർ ഐ.എ.എസ്., കൃഷിവകുപ്പ് ഡയറക്ടർ അർജുൻ പാണ്ഡ്യൻ ഐ.എ.എസ്. എന്നിവരും വിവിധ സർക്കാർ വകുപ്പുകളുടെയും ഏജൻസികളുടെയും പ്രതിനിധികളും യോഗത്തിൽ പങ്കെടുത്തു.

കാലാവസ്ഥാ വ്യതിയാനത്തെ തുടർന്നുണ്ടാകുന്ന കാർഷിക-ജലപ്രതിസന്ധികൾക്ക് മുൻകൂട്ടി തയ്യാറെടുക്കുകയും വിവിധ വകുപ്പുകളുടെ പ്രവർത്തനങ്ങൾ ഏകോപിപ്പിക്കുകയും ചെയ്യുന്നതിലൂടെ സംസ്ഥാനത്ത് ജലസംരക്ഷണവും കാർഷിക പ്രതിരോധശേഷിയും ശക്തിപ്പെടുത്തുകയാണ് ലക്ഷ്യം.