'ബിലോങ്ങിങ്: എ ജേർണി ഓഫ് ലവ്'; സോണിയയുടെ വെളിപ്പെടുത്തലുകൾ കാത്ത് രാഷ്ട്രീയം

ഇനി ഇവിടെ എന്തൊക്കെ സംഭവിക്കുമോ ആവോ... ഇന്നലെ വരെ തന്നെക്കുറിച്ച് ആളുകൾ എഴുതിക്കൂട്ടിയതിൽ പലതും തെറ്റും പലതും അതിശയോക്തി കലർന്നതോ ആയിരുന്നുവെങ്കിൽ, ഇത് അങ്ങനെയല്ല എന്ന് പറഞ്ഞുകൊണ്ട് മുൻ കോൺഗ്രസ് അധ്യക്ഷ സോണിയ ഗാന്ധി തന്റെ ആത്മകഥയുമായി വായനക്കാരുടെ മുന്നിലേക്ക് എത്തുകയാണ്. തീർത്തും ഇന്ത്യൻ രാഷ്ട്രീയത്തിൽ വലിയ കോളിളക്കം ഈ പുസ്തകം സൃഷ്ടിക്കുമെന്ന് സോണിയ ഗാന്ധി തന്നെ പറയുമ്പോൾ, ഇന്നത്തെ ഇന്ത്യൻ രാഷ്ട്രീയ സാഹചര്യത്തിൽ ആരൊക്കെയോ സോണിയയെയും സോണിയ ഗാന്ധിയുടെ പുസ്തകത്തെയും ഭയക്കുന്നു എന്ന് തന്നെ പറയാം. ഏറെക്കാലമായി രാഷ്ട്രീയ ലോകം ഉറ്റുനോക്കിക്കൊണ്ടിരുന്ന തന്റെ ആത്മകഥയായ 'ബിലോങ്ങിങ്: എ ജേർണി ഓഫ് ലവ്' എന്ന പുസ്തകം പുറത്തിറങ്ങുന്നതോടെ രാഷ്ട്രീയ രംഗത്ത് വലിയ രീതിയിലുള്ള ബഹളങ്ങൾക്കും വിവാദങ്ങൾക്കും സാധ്യതയുണ്ടെന്നാണ് അവർ തന്നെ തുറന്നുപറഞ്ഞിരിക്കുന്നത്. എക്സ് പ്ലാറ്റ്‌ഫോമിലൂടെയും ഇൻസ്റ്റഗ്രാം അടക്കമുള്ള സമൂഹമാധ്യമങ്ങളിലൂടെയും പങ്കുവെച്ച വീഡിയോകളിലൂടെയാണ് സോണിയ ഗാന്ധി ഇക്കാര്യം വ്യക്തമാക്കിയത്. തന്നെക്കുറിച്ച് ഇതുവരെ മാധ്യമങ്ങളിലും പുസ്തകങ്ങളിലും വന്നിട്ടുള്ള പല കാര്യങ്ങളും ഒന്നുകിൽ പൂർണമായി കെട്ടിച്ചമച്ചതോ അല്ലെങ്കിൽ അതിശയോക്തി നിറഞ്ഞതോ ആണെന്നും, തന്റെ യഥാർത്ഥ ജീവിതകഥയും വസ്തുതകളും സ്വന്തം വാക്കുകളിൽ തുറന്നുപറയാനുള്ള ഏറ്റവും മികച്ച അവസരമാണ് ഈ പുസ്തകം എന്നും അവർ പറയുന്നുണ്ട്. ഈ കൃതി പുറത്തുവരുന്നതോടെ ചിലരുടെയൊക്കെ കാഴ്ചപ്പാടുകൾ മാറിയേക്കാമെന്നും, എന്നാൽ മറ്റു ചിലർക്ക് തന്നോട് കൂടുതൽ വിദ്വേഷം തോന്നിയേക്കാം എന്നും വ്യക്തമാക്കുന്ന സോണിയ, പൊതുജീവിതത്തിലും പുസ്തക രചനയിലും ഇതൊക്കെ സ്വാഭാവികമാണെന്നും കൂട്ടിച്ചേർക്കുന്നു....

ഇറ്റലിയിലെ ഒരു ചെറിയ ഗ്രാമത്തിൽനിന്ന് ഇന്ത്യൻ രാഷ്ട്രീയത്തിന്റെ പരമോന്നത പദവികളിലേക്ക് എത്തിച്ചേർന്ന ഒരു ജീവിതയാത്രയാണ് ഈ ഓർമ്മക്കുറിപ്പുകളുടെ ഉള്ളടക്കം. കേംബ്രിജിലെ വാർസിറ്റി റെസ്റ്റോറന്റിൽ വെച്ച്, ഇറ്റാലിയൻ ഭക്ഷണത്തോട് സാമ്യമുള്ള വിഭവങ്ങൾ തേടിയുള്ള യാത്രക്കിടയിലാണ് രാജീവ് ഗാന്ധിയെ ആദ്യമായി കണ്ടുമുട്ടുന്നതും ആ വലിയ പ്രണയത്തിന് തുടക്കമാകുന്നതും. ആ മനോഹരമായ ഓർമ്മകളും, തുടർന്ന് ഇന്ത്യയിലേക്കുള്ള വരവും, ഇന്ദിരാഗാന്ധിയുടെയും രാജീവ് ഗാന്ധിയുടെയും വധം വരുത്തിവെച്ച ദാരുണമായ വ്യക്തിപരമായ നഷ്ടങ്ങളും, തന്റെ ജീവിതത്തെ മാറ്റിമറിച്ച സംഭവങ്ങളും പുസ്തകം വിശദമായി പ്രതിപാദിക്കുന്നുണ്ട്. ഭർത്താവിന്റെയും അമ്മായിയമ്മയുടെയും വിയോഗത്തിനുശേഷമുള്ള കടുത്ത പ്രതിസന്ധികളെ അതിജീവിച്ച്, മടിയോടെയാണെങ്കിലും ഇന്ത്യൻ രാഷ്ട്രീയത്തിന്റെ മുൻനിരയിലേക്ക് ഇറങ്ങിവരേണ്ടി വന്ന സാഹചര്യങ്ങളും, കോൺഗ്രസ് പാർട്ടിയുടെ അധ്യക്ഷയായി ദീർഘകാലം പ്രവർത്തിച്ച അനുഭവങ്ങളും, പത്തുവർഷക്കാലം രാജ്യഭരണം നിയന്ത്രിച്ച യുപിഎ സർക്കാരിന്റെ അധ്യക്ഷ പദവി അലങ്കരിച്ചതും എല്ലാം ഈ ഓർമ്മക്കുറിപ്പുകളിൽ അങ്ങേയറ്റം പ്രാധാന്യമർഹിക്കുന്നു. രാഷ്ട്രീയ എതിരാളികളുടെ കടുത്ത വിമർശനങ്ങളെയും വേട്ടയാടലുകളെയും നേരിടേണ്ടി വന്നിട്ടുള്ള തന്റെ പൊതുജീവിതത്തിന്റെ ഏടുകൾ ഈ പുസ്തകത്തിലൂടെ പുറത്തുവരുമ്പോൾ അത് ഭരണപക്ഷ കേന്ദ്രങ്ങളിലും രാഷ്ട്രീയ നിരീക്ഷകരിലും വലിയ ആശങ്കയാണ് സൃഷ്ടിച്ചിരിക്കുന്നത്...

എന്നാൽ ഈ പുസ്തകത്തിന്റെ പ്രസാധനവുമായി ബന്ധപ്പെട്ട് തുടക്കത്തിൽ വലിയ പ്രതിസന്ധികളാണ് ഉണ്ടായത്. സോണിയ ഗാന്ധിയുടെ കൈയെഴുത്തുപ്രതിയിൽ ചില മാറ്റങ്ങളും ഒഴിവാക്കലുകളും വരുത്തണമെന്ന് ആവശ്യപ്പെട്ടുകൊണ്ട് പ്രശസ്ത പ്രസാധകരായ പെൻഗ്വിൻ ബുക്സ് ഇന്ത്യ രംഗത്തെത്തിയിരുന്നുവെങ്കിലും, ആ ആവശ്യങ്ങൾ അംഗീകരിക്കാൻ സോണിയ ഗാന്ധി തയ്യാറായിരുന്നില്ല. എഴുത്തിൽ യാതൊരുവിധ വിട്ടുവീഴ്ചയ്ക്കും തയ്യാറാകാതെ അവർ ആ ആവശ്യം നിരസിച്ചതിനെ തുടർന്ന് പെൻഗ്വിൻ ബുക്സ് പ്രസാധന രംഗത്തുനിന്ന് പിന്മാറുകയായിരുന്നു. തുടർന്ന് ഹാർപ്പർ കോളിൻസ് അടക്കമുള്ള പ്രമുഖ ഇന്ത്യൻ പ്രസാധകർ പുസ്തകം ഏറ്റെടുക്കുന്നതിനായി രംഗത്തുവരികയും ആദ്യ ഘട്ടത്തിൽ തന്നെ ലക്ഷക്കണക്കിന് കോപ്പികൾ പുറത്തിറക്കാൻ തീരുമാനിക്കുകയും ചെയ്തു. പുസ്തകത്തിന്റെ പുറംചട്ട പോലും വലിയ രീതിയിലുള്ള ചർച്ചകൾക്കാണ് വഴിതെളിച്ചത്. യാതൊരുവിധ രാഷ്ട്രീയ അടയാളങ്ങളുമില്ലാതെ, മുഖത്തിന്റെ വെളിച്ചവും നിഴലും ഇടകലർന്ന കറുപ്പും വെളുപ്പുമുള്ള ഛായാചിത്രവും, കൈയിലെ മോതിരവും നൽകുന്ന പ്രതീകാത്മകത പുസ്തകത്തിന്റെ ഗൗരവമേറിയ ഉള്ളടക്കത്തിലേക്കാണ് വിരൽ ചൂണ്ടുന്നത്. മൻമോഹൻ സിംഗിന്റെ സത്യസന്ധതയെ തകർക്കാൻ ബോധപൂർവം ശ്രമിച്ചവർക്കെതിരെയുള്ള വിമർശനങ്ങളും, സമകാലിക രാഷ്ട്രീയ സംഭവവികാസങ്ങളിലെ ശക്തമായ നിലപാടുകളും നിരന്തരം പങ്കുവെച്ചിട്ടുള്ള സോണിയ ഗാന്ധിയുടെ ഈ ആത്മകഥ, വരാനിരിക്കുന്ന ദിവസങ്ങളിൽ ഇന്ത്യൻ രാഷ്ട്രീയത്തിൽ വലിയ ഭൂകമ്പങ്ങൾ സൃഷ്ടിക്കുമെന്ന് തന്നെയാണ് നിലവിലെ സൂചനകൾ നൽകുന്നത്.