ബിജെപി നേതൃത്വം അനുനയിപ്പിച്ചു; ആർ. ശ്രീലേഖ രാജി പിൻവലിച്ചു

തിരുവനന്തപുരം: ബിജെപി നേതൃത്വത്തിന് ആശ്വാസം പകരുന്ന നിർണായക നീക്കവുമായി കോർപ്പറേഷൻ കൗൺസിലർ ആർ. ശ്രീലേഖ. നേരത്തെ പ്രഖ്യാപിച്ച രാജി തീരുമാനം പിൻവലിച്ചതായി ശ്രീലേഖ അറിയിച്ചു. പാർട്ടി നേതൃത്വം നടത്തിയ ഇടപെടലുകളും അനുനയ ശ്രമങ്ങളുമാണ് നിലപാട് മാറ്റുന്നതിലേക്ക് നയിച്ചതെന്നാണ് അറിയുന്നത്. ഉയർന്നുവന്ന വിഷയങ്ങൾ വിശദമായി ചർച്ച ചെയ്ത് പരിഹരിക്കാമെന്ന് പാർട്ടി അധ്യക്ഷൻ ഉറപ്പ് നൽകിയതായാണ് വിവരം. ഇതോടെയാണ് രാജിയിൽ നിന്ന് പിന്നോട്ടുപോകാൻ ശ്രീലേഖ തയ്യാറായത്.

അതേസമയം, രാജി പ്രഖ്യാപിച്ച് വാട്സ്ആപ്പ് വഴി പങ്കുവെച്ച സന്ദേശവും ശ്രീലേഖ പിന്നീട് നീക്കം ചെയ്തു. രാജി പിൻവലിച്ചതോടെ ബിജെപിക്കുള്ളിലെ തർക്കം തൽക്കാലത്തേക്ക് പരിഹരിക്കപ്പെട്ടതിന്റെ സൂചനയാണ് പുറത്തുവരുന്നത്. കഴിഞ്ഞ ദിവസമാണ് ആർ. ശ്രീലേഖ കൗൺസിലർ സ്ഥാനം രാജിവെച്ചതായി വാർത്തകൾ പുറത്തുവന്നത്. ശാസ്തമംഗലം വാർഡിനെ പ്രതിനിധീകരിക്കുന്ന ശ്രീലേഖ, തന്റെ തീരുമാനം വ്യക്തിപരമായ കാരണങ്ങളെ തുടർന്നാണെന്ന് വ്യക്തമാക്കിയിരുന്നു.

സെപ്റ്റംബർ 30ന് കൗൺസിലർ സ്ഥാനത്ത് തുടരാനാകില്ലെന്ന് അറിയിച്ച് മേയർ വി.വി. രാജേഷിന് രാജിക്കത്ത് കൈമാറിയതായും ശ്രീലേഖ വ്യക്തമാക്കിയിരുന്നു. സ്വകാര്യ കാരണങ്ങളാണ് രാജിക്ക് പിന്നിലെന്നായിരുന്നു അവരുടെ വിശദീകരണം. രാജി വിവരം ശാസ്തമംഗലം മേഖലയിലെ ‘കൗൺസിലർ അറിയിപ്പ്’ എന്ന വാട്സ്ആപ്പ് ഗ്രൂപ്പിലൂടെയും ശ്രീലേഖ അറിയിച്ചിരുന്നു. ഇതോടെയാണ് ബിജെപി നേതൃത്വത്തിനുള്ളിലും തിരുവനന്തപുരം കോർപ്പറേഷൻ രാഷ്ട്രീയത്തിലും വിഷയം ചർച്ചയായത്.ഇതിനെ തുടർന്ന്, ശ്രീലേഖ ഉന്നയിച്ച പ്രശ്നങ്ങൾ ചർച്ച ചെയ്ത് പരിഹരിക്കാമെന്ന നേതൃത്വത്തിന്റെ ഉറപ്പാണ് നിലവിൽ നിർണായകമായത്. ഇതോടെ തിരുവനന്തപുരം കോർപ്പറേഷനിലെ ബിജെപി നേതൃത്വത്തിനുള്ളിലെ അസ്വാരസ്യങ്ങൾ തൽക്കാലത്തേക്ക് ശമിച്ചെങ്കിലും, തുടർചർച്ചകൾക്ക് ശേഷമേ വിഷയത്തിൽ പൂർണമായ വ്യക്തത ലഭിക്കൂ.