ഇ.എം.ഐ കുടിശ്ശിക വന്നാൽ ഡിജിറ്റൽ ഗാഡ്‌ജറ്റുകൾ പൂട്ടാം: വായ്പക്കാർക്ക് ആശ്വാസവും നിയന്ത്രണവുമായി ആർ.ബി.ഐയുടെ പുതിയ ചട്ടക്കൂട്

സ്മാർട്ട്ഫോൺ, ലാപ്ടോപ്പ്, ടാബ്ലെറ്റ് തുടങ്ങിയ ഡിജിറ്റൽ ഉപകരണങ്ങൾ ഇ.എം.ഐ  അടിസ്ഥാനത്തിൽ വാങ്ങി തിരിച്ചടവ് മുടങ്ങിയാൽ അവയുടെ പ്രവർത്തനം ഭാഗികമായോ പൂർണ്ണമായോ തടയാൻ വായ്പാ ദാതാക്കൾക്ക് അനുമതി നൽകി റിസർവ് ബാങ്ക് ഓഫ് ഇന്ത്യ പുതിയ സുരക്ഷാ മാർഗ്ഗനിർദ്ദേശങ്ങൾ പുറപ്പെടുവിച്ചു. 2027 ജനുവരി 1 മുതൽ നിലവിൽ വരുന്ന ഈ നിയമം, വായ്പയെടുക്കുന്ന ഉപഭോക്താക്കളുടെ വ്യക്തിഗത അവകാശങ്ങൾക്ക് പൂർണ്ണ സംരക്ഷണം നൽകിക്കൊണ്ടാണ് രൂപകൽപ്പന ചെയ്തിരിക്കുന്നത്.

വായ്പ തിരിച്ചടയ്ക്കാത്തതിന്റെ പേരിൽ ധനകാര്യ സ്ഥാപനങ്ങളോ റിക്കവറി ഏജന്റുമാരോ നടത്തുന്ന ഭീഷണിപ്പെടുത്തലുകൾ, സോഷ്യൽ മീഡിയയിലൂടെയുള്ള അധിക്ഷേപങ്ങൾ, വ്യക്തിവിവരങ്ങൾ കൈക്കലാക്കൽ തുടങ്ങിയ ക്രമക്കേടുകൾ തടയാനാണ് ആർ.ബി.ഐ ഈ ഘടനാപരമായ രീതി കൊണ്ടുവന്നിരിക്കുന്നത്.

ഘട്ടംഘട്ടമായ നിയന്ത്രണ മാനദണ്ഡങ്ങൾ

ഡിഫോൾട്ട് വരുത്തുന്ന ഘട്ടത്തിൽ ഉടനടി ഉപകരണം ലോക്ക് ചെയ്യാൻ സ്ഥാപനങ്ങൾക്കാവില്ല. ഇതിനായി കൃത്യമായ സമയപരിധി നിർദ്ദേശിച്ചിട്ടുണ്ട്:

30 ദിവസം വരെ കുടിശ്ശിക: ഈ കാലയളവിൽ യാതൊരുവിധ നിയന്ത്രണങ്ങളും പാടില്ല. ഉപഭോക്താവിന് കുടിശ്ശികയെക്കുറിച്ച് ഔദ്യോഗികമായി അറിയിപ്പുകൾ മാത്രമേ നൽകാവൂ.

30 മുതൽ 60 ദിവസം വരെ: തിരിച്ചടവ് വൈകുകയാണെങ്കിൽ ഫോണിന്റെയോ ഗാഡ്‌ജറ്റിന്റെയോ നിശ്ചിത ആപ്പുകളിലും ഫീച്ചറുകളിലും ഭാഗികമായ നിയന്ത്രണങ്ങൾ ഏർപ്പെടുത്താം.

60 ദിവസത്തിന് മുകളിൽ: ഈ ഘട്ടത്തിൽ മാത്രമേ ഉപകരണം പൂർണ്ണമായി ലോക്ക് ചെയ്യുന്നതിലേക്ക് കടക്കാവൂ.

സോഫ്റ്റ്‌വെയർ മാനദണ്ഡം: ഉപകരണങ്ങൾ ലോക്ക് ചെയ്യുന്നതിനായി ഉപയോഗിക്കുന്ന ആപ്ലിക്കേഷനുകൾ അല്ലെങ്കിൽ സോഫ്റ്റ്‌വെയറുകൾ ഫോൺ നിർമ്മാതാക്കളോ ഒഫീഷ്യൽ ഓപ്പറേറ്റിങ് സിസ്റ്റം ദാതാക്കളോ അംഗീകരിച്ചതായിരിക്കണം.

ഉപഭോക്തൃ സുരക്ഷയും സ്വകാര്യതയും

ഫോൺ ലോക്ക് ചെയ്താലും ഉപഭോക്താവിന്റെ അടിസ്ഥാന ആശയവിനിമയ സ്വാതന്ത്ര്യവും സ്വകാര്യതയും തടയാൻ വായ്പാ ദാതാക്കൾക്ക് അധികാരമില്ല:

അടിസ്ഥാന സേവനങ്ങൾ തടയാനാവില്ല: ഇൻകമിങ്/ഔട്ട്ഗോയിങ് കോളുകൾ, എസ്.എം.എസ്, എമർജൻസി SOS ഫീച്ചറുകൾ എന്നിവ എപ്പോഴും പ്രവർത്തനക്ഷമമായിരിക്കണം.

തൊഴിൽ തടസ്സപ്പെടുത്തരുത്: ഉപഭോക്താവിന്റെ ജോലി ചെയ്യുന്നതിനെയോ ഉപജീവനത്തെയോ ബാധിക്കുന്ന തരത്തിൽ ആപ്പുകൾ ബ്ലോക്ക് ചെയ്യാൻ പാടില്ല.

വ്യക്തിഗത വിവരങ്ങൾ സുരക്ഷിതം: ഉപഭോക്താവിന്റെ ഗാലറി, ഫോൺ ബുക്ക്, ലൊക്കേഷൻ ഹിസ്റ്ററി, വ്യക്തിഗത സന്ദേശങ്ങൾ എന്നിവ വായ്പാ ഏജൻസികൾക്ക് പരിശോധിക്കാനോ ചോർത്താനോ സാധിക്കില്ല.

അംഗീകൃത ഏജന്റുമാർ മാത്രം: ബാങ്കിങ് സംവിധാനം അംഗീകരിക്കാത്ത റിക്കവറി ഏജന്റുമാർക്ക് ഉപഭോക്താക്കളുമായി ബന്ധപ്പെടാൻ അനുമതിയില്ല.

വേഗത്തിലുള്ള അൺലോക്കിങും നഷ്ടപരിഹാരവും

കുടിശ്ശിക വന്ന തുക ഉപഭോക്താവ് തിരിച്ചടച്ചു കഴിഞ്ഞാൽ ഒരു മണിക്കൂറിനുള്ളിൽ ഉപകരണം പൂർണ്ണമായി അൺലോക്ക് ചെയ്തു നൽകണം. വായ്പാ ദാതാവിന്റെ വീഴ്ച മൂലം ഇതിൽ കാലതാമസം നേരിട്ടാൽ, ഓരോ മണിക്കൂറിനും 250 രൂപ വീതം ഉപഭോക്താവിന് നഷ്ടപരിഹാരം നൽകാൻ ബാങ്ക് ബാധ്യസ്ഥരാണ് (എന്നാൽ ഈ തുക ആകെ വായ്പാ തുകയേക്കാൾ കൂടരുത്).

ഏതൊക്കെ വായ്പകൾക്ക് ഇത് ബാധകമാണ്?

ഈ ഉപകരണം വാങ്ങാൻ എടുത്ത അതേ വായ്പയുടെ  ഇ.എം.ഐ മുടങ്ങിയാൽ മാത്രമേ പ്രസ്തുത ഫോൺ ലോക്ക് ചെയ്യാൻ പാടുള്ളൂ. കരാറിൽ ഇതിനെക്കുറിച്ച് വ്യക്തമായി പ്രസ്താവിച്ചിരിക്കുകയും വേണം. അല്ലാതെ വ്യക്തിഗത വായ്പ, വാഹന വായ്പ, ക്രെഡിറ്റ് കാർഡ് കുടിശ്ശിക തുടങ്ങിയ മറ്റ് വായ്പകൾ മുടങ്ങിയതിന്റെ പേരിൽ ഒരാളുടെ മൊബൈൽ ഫോണോ ഗാഡ്‌ജറ്റുകളോ ബ്ലോക്ക് ചെയ്യാൻ ധനകാര്യ സ്ഥാപനങ്ങൾക്കാവില്ല.