ഐഎസ്ഐ പിന്തുണയുള്ള ഷെഹ്‌സാദ് ഭട്ടി നെറ്റ്‌വർക്ക് തകർത്തു; 253 പേർ അറസ്റ്റിൽ

ന്യൂഡൽഹി: പാക്കിസ്ഥാന്റെ രഹസ്യാന്വേഷണ സംഘടനയായ ഐഎസ്ഐയുടെ പിന്തുണയോടെ പ്രവർത്തിച്ച ഭീകര ശൃംഖലയായ ‘ഷെഹ്‌സാദ് ഭട്ടി നെറ്റ്‌വർക്ക്’ സുരക്ഷാ സേനകൾ തകർത്തതായി കേന്ദ്ര ആഭ്യന്തരമന്ത്രി അമിത് ഷാ. ഇന്ത്യയുടെ വിവിധ ഭാഗങ്ങളിൽ ഗ്രനേഡ്, ഐഇഡി, പെട്രോൾ ബോംബ് ആക്രമണങ്ങൾക്കും കൊലപാതകങ്ങൾക്കും പിന്നിൽ പ്രവർത്തിച്ച പാക്കിസ്ഥാൻ പിന്തുണയുള്ള ശൃംഖലയാണ് ഇതെന്നാണ് സുരക്ഷാ ഏജൻസികളുടെ വിലയിരുത്തൽ.

14 സംസ്ഥാനങ്ങളിലായി നടത്തിയ പരിശോധനകളിൽ നെറ്റ്‌വർക്കുമായി ബന്ധമുള്ള 253 പേരെ അറസ്റ്റ് ചെയ്തതായി അമിത് ഷാ അറിയിച്ചു. പരിശോധനകളിൽ ഐഇഡികൾ, പാക്കിസ്ഥാൻ ഓർഡിനൻസ് ഫാക്ടറിയുടെ മുദ്രയുള്ള ഗ്രനേഡുകൾ, പിസ്റ്റളുകൾ, വെടിയുണ്ടകൾ, ചാരപ്പണിക്ക് ഉപയോഗിച്ചതായി കരുതുന്ന സിസിടിവി ക്യാമറകൾ എന്നിവ പിടിച്ചെടുത്തതായും അദ്ദേഹം പറഞ്ഞു.

ഷെഹ്‌സാദ് ഭട്ടി നെറ്റ്‌വർക്കുമായി ബന്ധപ്പെട്ട് 80-ലധികം എഫ്ഐആറുകളും 200-ലധികം അറസ്റ്റുകളും ഇതിനകം രേഖപ്പെടുത്തിയിട്ടുണ്ടെന്ന് ആഭ്യന്തര മന്ത്രാലയം വ്യക്തമാക്കി. പൊലീസ്, പ്രതിരോധ സേനകൾ എന്നിവയുമായി ബന്ധപ്പെട്ട കേന്ദ്രങ്ങളിൽ നിരീക്ഷണം നടത്തുന്നതിനും ചാരപ്രവർത്തനത്തിനായി സിസിടിവി ക്യാമറകൾ സ്ഥാപിക്കുന്നതിനും പ്രാദേശിക ഏജന്റുമാർക്ക് സംഘം പണം നൽകിയിരുന്നതായും അധികൃതർ ആരോപിച്ചു.

അറസ്റ്റിലായവരിൽ ഏറ്റവും കൂടുതൽ പേർ ഉത്തർപ്രദേശിൽ നിന്നാണ്—62 പേർ. ഹരിയാനയിൽ 52 പേരും ഡൽഹിയിൽ 51 പേരും അറസ്റ്റിലായി. മഹാരാഷ്ട്രയിൽ എട്ട്, ഉത്തരാഖണ്ഡിൽ അഞ്ച്, കർണാടക, ഗുജറാത്ത്, ബിഹാർ എന്നിവിടങ്ങളിൽ മൂന്ന് വീതം പേരെയും തെലങ്കാന, ഹിമാചൽ പ്രദേശ്, ജമ്മു കശ്മീർ, കേരളം എന്നിവിടങ്ങളിൽ രണ്ട് വീതം പേരെയും അറസ്റ്റ് ചെയ്തതായി അധികൃതർ അറിയിച്ചു.

പാക്കിസ്ഥാൻ സ്വദേശിയെന്ന് സംശയിക്കുന്ന ഒരാളും പാക്ക് ഭീകരരുമായി ബന്ധമുള്ള ഉത്തർപ്രദേശ് സ്വദേശിയും അറസ്റ്റിലായവരിൽ ഉൾപ്പെടുന്നു. പാക്കിസ്ഥാനും ഗൾഫ് മേഖലയുമാണ് ഷെഹ്‌സാദ് ഭട്ടി നെറ്റ്‌വർക്കിന്റെ പ്രവർത്തന കേന്ദ്രങ്ങളെന്നാണ് സുരക്ഷാ ഏജൻസികളുടെ വിലയിരുത്തൽ.

സമൂഹമാധ്യമങ്ങളിലൂടെയാണ് സംഘം പുതിയ ആളുകളെ റിക്രൂട്ട് ചെയ്തിരുന്നതെന്നും അധികൃതർ പറയുന്നു. ഉത്തരേന്ത്യയിൽ നടന്ന നിരവധി ആക്രമണങ്ങളുടെ സൂത്രധാരനായി ഷെഹ്‌സാദ് ഭട്ടിയെ അന്വേഷണ ഏജൻസികൾ വിലയിരുത്തുന്നതായും ആഭ്യന്തര മന്ത്രാലയവുമായി ബന്ധപ്പെട്ട വൃത്തങ്ങൾ അറിയിച്ചു.