കേരളത്തിൽ കല്ലും ബിയർ കുപ്പിയും, ഡൽഹിയിൽ സമരം; ഗ്യാനേഷ് കുമാർ വിഷയത്തിൽ ഇടതിന്റെ ഇരട്ടത്താപ്പെന്ന് വിമർശനം

ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പ്രതിഷേധത്തിൽ ഇടത് സംഘടനകൾ ഡൽഹിയിൽ തെരുവിലിറങ്ങിയതോടെ കേരളത്തിലെ സമരരംഗത്തെ സംഭവങ്ങൾ ചൂണ്ടിക്കാട്ടി വിമർശനം ശക്തമാകുന്നു. കേരളത്തിൽ ഗ്യാനേഷ് കുമാറിനെതിരെ പ്രതിഷേധിച്ച കോൺഗ്രസ് പ്രവർത്തകർക്ക് നേരെ ഇടത് സംഘടനകളുടെ പ്രവർത്തകർ നടത്തിയ ആക്രമണം ആണ് വിമർശനത്തിന് കാരണം . അതേസമയം, സമാന വിഷയത്തിൽ ഡൽഹിയിലെത്തി ഇടത് സംഘടനകൾ പ്രതിഷേധം സംഘടിപ്പിക്കുന്നതാണ് ഇപ്പോൾ രാഷ്ട്രീയ ചർച്ചയായിരിക്കുന്നത്.

എസ്.ഐ.ആർ നടപടികളും വോട്ടർപട്ടികയുമായി ബന്ധപ്പെട്ട വിഷയങ്ങളും ഉയർത്തിയാണ് ഡൽഹിയിൽ ഇടത് യുവജന-വിദ്യാർഥി സംഘടനകൾ പ്രതിഷേധിക്കുന്നത്. പ്രതിഷേധത്തിനിടെ സി.പി.ഐ എം.പി പി. സന്തോഷ് കുമാറിനെ ഡൽഹി പൊലീസ് ബലംപ്രയോഗിച്ച് നീക്കാൻ ശ്രമിച്ചു.

കേരളത്തിൽ ഗ്യാനേഷ് കുമാറിനെതിരെ പ്രതിഷേധിച്ച കോൺഗ്രസ് പ്രവർത്തകർക്ക് നേരെ ബിയർ കുപ്പിയും കല്ലും ഉപയോഗിച്ച് ആക്രമണം നടത്തിയെന്ന ആരോപണങ്ങളും ഇതോടൊപ്പം ഉയർത്തിക്കാട്ടപ്പെടുകയാണ്. പ്രതിഷേധിക്കാനുള്ള അവകാശം ഡൽഹിയിൽ ഉയർത്തിപ്പിടിക്കുന്ന ഇടത് സംഘടനകൾ കേരളത്തിൽ അതേ അവകാശം വിനിയോഗിച്ച കോൺഗ്രസ് പ്രവർത്തകരോട് സ്വീകരിച്ച സമീപനം എന്തായിരുന്നുവെന്ന ചോദ്യമാണ് കോൺഗ്രസ് കേന്ദ്രങ്ങൾ ഉന്നയിക്കുന്നത്.

ഡൽഹിയിൽ സമരം ചെയ്യാനുള്ള അവകാശം അംഗീകരിക്കുമ്പോൾ കേരളത്തിൽ കോൺഗ്രസ് പ്രവർത്തകർക്ക് നേരെയുള്ള അക്രമത്തെ എങ്ങനെ ന്യായീകരിക്കാനാകുമെന്ന ചോദ്യവും ഇതോടെ ഉയരുന്നു. രാഷ്ട്രീയ പ്രതിഷേധം ജനാധിപത്യത്തിന്റെ ഭാഗമാണെങ്കിൽ, അത് കേരളത്തിലും ഡൽഹിയിലും ഒരേ മാനദണ്ഡത്തിൽ കാണേണ്ടതല്ലേയെന്ന വിമർശനമാണ് ശക്തമാകുന്നത്.

ഗ്യാനേഷ് കുമാറിനെതിരായ പ്രതിഷേധത്തിന്റെ രാഷ്ട്രീയ ഉള്ളടക്കത്തെക്കാൾ, സമരങ്ങളോടുള്ള ഇടത് സംഘടനകളുടെ സമീപനത്തിലെ വൈരുധ്യമാണ് ഇപ്പോൾ ചർച്ചയാകുന്നത്. കേരളത്തിൽ എതിർ രാഷ്ട്രീയ പ്രവർത്തകർ പ്രതിഷേധിക്കുമ്പോൾ സംഘർഷത്തിലേക്ക് നീങ്ങുകയും ഡൽഹിയിൽ അതേ വിഷയത്തിൽ ജനാധിപത്യ പ്രതിഷേധത്തിന്റെ അവകാശം ഉയർത്തിപ്പിടിക്കുകയും ചെയ്യുന്നത് ഇരട്ടത്താപ്പാണെന്ന വിമർശനമാണ് ഉയരുന്നത്.

തെരഞ്ഞെടുപ്പ് കമ്മീഷന്റെ പ്രവർത്തനത്തെയും വോട്ടർപട്ടികയുടെ പ്രത്യേക തീവ്ര പുനഃപരിശോധനയായ എസ്.ഐ.ആറിനെയും ചൊല്ലിയുള്ള പ്രതിഷേധമാണ് ദില്ലിയിൽ ശക്തമായത്. ഗ്യാനേഷ് കുമാറിന്റെ രാജി ആവശ്യപ്പെട്ടാണ് പ്രതിഷേധം സംഘടിപ്പിച്ചത്. എസ്.എഫ്.ഐ, ഡി.വൈ.എഫ്.ഐ ഉൾപ്പെടെയുള്ള സംഘടനകൾ ജന്തർ മന്തറിലേക്ക് പ്രതിഷേധവുമായി എത്താൻ തീരുമാനിച്ചിരുന്നെങ്കിലും ദില്ലി പൊലീസ് പരിപാടിക്ക് അനുമതി നൽകിയിരുന്നില്ല.