‘കോൺഗ്രസിനെതിരെ യുദ്ധം ചെയ്യുന്നത് ഞങ്ങളാണെന്ന് ബിജെപിയെ ബോധ്യപ്പെടുത്താനാണോ?’; സിപിഎമ്മിനെതിരെ എം. ലിജു

തിരുവനന്തപുരം: ഗ്യാനേഷ് കുമാറിനെതിരെയും കേന്ദ്ര തിരഞ്ഞെടുപ്പ് സംവിധാനത്തിനെതിരെയും യൂത്ത് കോൺഗ്രസ് നടത്തുന്ന പ്രതിഷേധങ്ങളോട് സിപിഎം സ്വീകരിക്കുന്ന നിലപാടിനെ ചോദ്യം ചെയ്ത് മന്ത്രി എം. ലിജു. തിരുവനന്തപുരത്തെ ഡിസിസി ഓഫീസ് ആക്രമണത്തിനെതിരെയും ഗ്യാനേഷ് കുമാറിനെതിരെയും നടത്തിയ പ്രതിഷേധ പ്രകടനത്തിന് നേരെ സിപിഎമ്മിന്റെ വിദ്യാർത്ഥി സംഘടന ആക്രമണം നടത്തിയതിന്റെ യുക്തി മനസ്സിലാകുന്നില്ലെന്ന് മന്ത്രി പറഞ്ഞു.

ഗ്യാനേഷ് കുമാറിനെതിരെ പ്രതിഷേധിക്കുമ്പോൾ സിപിഎമ്മിന് എന്തിനാണ് അസ്വസ്ഥതയെന്നും മന്ത്രി ചോദിച്ചു. രാജ്യത്തെ തിരഞ്ഞെടുപ്പ് സംവിധാനത്തെ അട്ടിമറിക്കുന്നുവെന്ന് ആരോപിച്ച് തിരഞ്ഞെടുപ്പ് കമ്മീഷനെതിരെ നടക്കുന്ന പ്രതിഷേധത്തെയാണ് നേരിടുന്നതെന്നും അദ്ദേഹം പറഞ്ഞു.

അമിത് ഷായുടെ കേരള സന്ദർശനവുമായി ബന്ധപ്പെട്ട് മന്ത്രിമാർക്കെതിരെ ആക്രമണശ്രമങ്ങളും കരിങ്കൊടി പ്രതിഷേധങ്ങളും തടസ്സപ്പെടുത്തലുകളും നടക്കുന്നതിനിടെയാണ് തിരുവനന്തപുരം ഡിസിസി ഓഫീസ് ആക്രമിക്കപ്പെട്ടതെന്നും ലിജു ചൂണ്ടിക്കാട്ടി. ഇതിനെതിരെ യൂത്ത് കോൺഗ്രസ് പ്രതിഷേധിക്കുമ്പോൾ സിപിഎം നേരിട്ട് അതിൽ ഇടപെടുന്നതിന്റെ ലക്ഷ്യം എന്താണെന്നും അദ്ദേഹം ചോദിച്ചു.

ഇഡി അന്വേഷണം ഉൾപ്പെടെയുള്ള കേന്ദ്ര അന്വേഷണങ്ങൾ നടക്കുന്ന സാഹചര്യത്തിൽ കോൺഗ്രസിനെതിരെ പോരാടുന്നത് തങ്ങളാണെന്ന സന്ദേശം ബിജെപി നേതൃത്വത്തിന് നൽകാനുള്ള ശ്രമമാണോ ഇതിന് പിന്നിലെന്നും മന്ത്രി സംശയം പ്രകടിപ്പിച്ചു.

കേന്ദ്ര അന്വേഷണങ്ങളെ നേരിടുന്നതിനേക്കാൾ, ബിജെപിക്കെതിരെ പ്രതിഷേധിക്കുന്നവരെ നേരിടുന്നതിലാണ് സിപിഎം നേതൃത്വം കൂടുതൽ താൽപര്യം കാണിക്കുന്നതെന്ന സന്ദേശമാണോ നൽകുന്നതെന്ന് വ്യക്തമാക്കണമെന്നും ലിജു ആവശ്യപ്പെട്ടു.

“ഇഡി അന്വേഷണം മന്ദീഭവിപ്പിക്കണം, പുതിയ തെളിവുകൾ കൊണ്ടുവരരുത്, പുതിയ അറസ്റ്റ് ഉണ്ടാകരുത് എന്ന സന്ദേശമാണോ ഇത്തരം അക്രമങ്ങളിലൂടെ നൽകുന്നത് എന്ന സംശയമുണ്ട്,” എന്നും മന്ത്രി പറഞ്ഞു.

കേരളത്തിൽ ബിജെപിയും സിപിഎമ്മും ഒരുമിച്ച് നീങ്ങുന്നുവെന്ന തരത്തിലുള്ള രാഷ്ട്രീയ ചർച്ചകൾ ശക്തമാകുന്നതിനിടെയാണ് മന്ത്രിയുടെ വിമർശനം. അമിത് ഷായെയും പ്രധാനമന്ത്രിയെയും ബിജെപി നേതൃത്വത്തെയും തങ്ങളാണ് ഏറ്റവും അടുത്ത രാഷ്ട്രീയ പങ്കാളികളെന്ന് ബോധ്യപ്പെടുത്താനുള്ള ശ്രമമാണോ സിപിഎം നടത്തുന്നതെന്നും അദ്ദേഹം ചോദിച്ചു.

അതേസമയം, മന്ത്രിമാരെ ഉൾപ്പെടെ വഴിയിൽ പൂർണമായി തടയുമെന്നും കേരളത്തിൽ വഴി നടക്കാൻ പോലും അനുവദിക്കില്ലെന്നും ഡിവൈഎഫ്ഐ നേതാക്കൾ പ്രഖ്യാപിച്ചതിനെക്കുറിച്ചുള്ള ചോദ്യത്തിന്, “അവർ പാവങ്ങൾ, അവർക്ക് വേറെ മാർഗമില്ലല്ലോ” എന്നായിരുന്നു മന്ത്രിയുടെ പ്രതികരണം.