“രാജിവെച്ചോ ഇല്ലയോ? എല്ലാം ഒക്ടോബർ 11ന് പറയും”; ബിജെപിയെ വീണ്ടും വെട്ടിലാക്കി ആർ. ശ്രീലേഖ

തിരുവനന്തപുരം: രാജിവെച്ചെന്ന വാർത്തകളിൽ വിശദീകരണവുമായി തിരുവനന്തപുരം കോർപറേഷനിലെ ബിജെപി കൗൺസിലർ ആർ. ശ്രീലേഖ. ഇക്കാര്യത്തിൽ തനിക്ക് പറയാനുള്ളത് ഒക്ടോബർ 11 ഞായറാഴ്ച വ്യക്തമാക്കുമെന്ന് ശ്രീലേഖ ഫെയ്‌സ്ബുക്ക് കുറിപ്പിലൂടെ അറിയിച്ചു.

“എന്തുകൊണ്ടാണ് മാധ്യമങ്ങൾ ശ്രീലേഖ രാജിവെച്ചു എന്ന് പറഞ്ഞ് മൂന്ന്, നാല് ദിവസം ആഘോഷിച്ചതെന്ന് ഞാൻ വിശദീകരിക്കാൻ ആഗ്രഹിക്കുന്നു. ഒക്ടോബർ 11 വരെ ദയവായി കാത്തിരിക്കൂ. എനിക്ക് പറയാനുള്ളതുകൂടി കേൾക്കൂ,” എന്നാണ് കുറിപ്പിലെ സന്ദേശം.

സെപ്റ്റംബർ 30ന് ശ്രീലേഖ രാജിക്കത്ത് മേയർ വി.വി. രാജേഷിന് കൈമാറിയെന്നായിരുന്നു നേരത്തെ പുറത്തുവന്ന വിവരം. രാജിക്കത്ത് ലഭിച്ചതായി മേയറും സ്ഥിരീകരിച്ചിരുന്നു. വ്യക്തിപരമായ കാരണങ്ങളാണ് രാജിക്ക് പിന്നിലെന്നായിരുന്നു അന്നത്തെ വിശദീകരണം.

വിവരം പുറത്തുവന്നതോടെ ബിജെപി നേതൃത്വം ഇടപെട്ടു. ശാരീരിക അസ്വാസ്ഥ്യത്തെ തുടർന്ന് ആശുപത്രിയിൽ കഴിയുന്ന ശ്രീലേഖയെ സംസ്ഥാന ജനറൽ സെക്രട്ടറി എസ്. സുരേഷ് ഉൾപ്പെടെയുള്ള നേതാക്കൾ സന്ദർശിച്ചു. തുടർന്ന് രാജിക്കാര്യത്തിൽ വ്യക്തതയില്ലാത്ത സാഹചര്യം തുടരുന്നതിനിടെയാണ് ശ്രീലേഖയുടെ പുതിയ ഫെയ്‌സ്ബുക്ക് കുറിപ്പ്.

രാജിക്കത്ത് കൈമാറിയെന്ന സന്ദേശം പിന്നീട് ശ്രീലേഖ വാട്‌സാപ്പ് ഗ്രൂപ്പിൽനിന്ന് പിൻവലിച്ചതും ശ്രദ്ധേയമായി. എസ്. സുരേഷ് ആശുപത്രിയിൽ ശ്രീലേഖയെ സന്ദർശിച്ച ചിത്രങ്ങൾ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ ഉൾപ്പെടെയുള്ളവർ സമൂഹമാധ്യമങ്ങളിൽ പങ്കുവെച്ചിരുന്നു.

തിരുവനന്തപുരം കോർപറേഷനിൽ ബിജെപി ഭരണത്തിന് നിർണായകമായ കൗൺസിലറാണ് ശ്രീലേഖ. ഒരു സ്വതന്ത്ര കൗൺസിലറുടെ പിന്തുണയോടെയാണ് ബിജെപി ഭരണം നടത്തുന്നത്. അതിനാൽ ശ്രീലേഖയുടെ രാജി ഭരണസമിതിയുടെ ഭൂരിപക്ഷത്തെ ബാധിക്കുമെന്ന സാഹചര്യമുണ്ട്.

അതേസമയം, മേയർ സ്ഥാനം ലഭിക്കാത്തതിലുള്ള അതൃപ്തിയാണ് രാജിനീക്കത്തിന് പിന്നിലെന്ന തരത്തിലുള്ള റിപ്പോർട്ടുകളും നേരത്തെ പുറത്തുവന്നിരുന്നു. ശാസ്‌തമംഗലം വാർഡിൽ നിന്നുള്ള കൗൺസിലറായ ശ്രീലേഖ ഇക്കാര്യത്തിൽ നേരത്തെയും അതൃപ്തി പ്രകടിപ്പിച്ചിരുന്നതായി റിപ്പോർട്ടുകളുണ്ടായിരുന്നു.

ഒക്ടോബർ 11ന് ശ്രീലേഖ നടത്തുന്ന വിശദീകരണത്തോടെയാണ് രാജിക്കാര്യത്തിൽ നിലനിൽക്കുന്ന അനിശ്ചിതത്വത്തിന് വിരാമമാകുക.