‘നിങ്ങളുടെ ദേഷ്യമാണ് അവരുടെ കണ്ടന്റ്’; സോഷ്യൽ മീഡിയ ട്രാപ്പിൽ വീഴരുത്, ഡൽഹി പൊലീസിന് മാർഗ്ഗനിർദ്ദേശം!

ന്യൂഡൽഹി: സമരം ചെയ്യുന്ന പുതിയ തലമുറയെയും അവരുടെ സോഷ്യൽ മീഡിയ തന്ത്രങ്ങളെയും നേരിടാൻ പൊലീസുകാർക്ക് കർശന പെരുമാറ്റച്ചട്ടങ്ങൾ പുറപ്പെടുവിച്ച് ഡൽഹി പൊലീസ്. ജന്തർ മന്തറിലെ വിദ്യാർത്ഥി സമരത്തിനിടെയുണ്ടായ സംഘർഷങ്ങളിലും കടുത്ത ബലപ്രയോഗത്തിലും വലിയ വിമർശനം ഉയർന്ന സാഹചര്യത്തിലാണ് കേന്ദ്ര ഏജൻസികളുടെ സഹായത്തോടെ പുതിയ മാർഗ്ഗനിർദ്ദേശങ്ങൾ തയ്യാറാക്കിയത്.

പൊലീസിനെ പ്രകോപിപ്പിച്ച് ദേഷ്യപ്പെടുന്ന ദൃശ്യങ്ങൾ പകർത്തി സോഷ്യൽ മീഡിയയിൽ വൈറലാക്കുന്നതാണ് പുതിയ രീതി. പൊലീസിനെ വില്ലന്മാരാക്കി ചിത്രീകരിക്കാനുള്ള ശ്രമങ്ങളിൽ വീഴരുതെന്നും, പ്രകോപനങ്ങൾക്കു മുന്നിൽ പൂർണ്ണ സമചിത്തത പാലിക്കണമെന്നുമാണ് 15 പൊലീസ് ജില്ലകളിലേക്കും കൈമാറിയ നിർദ്ദേശത്തിൽ പ്രധാനമായും വ്യക്തമാക്കുന്നത്.

ചെയ്യരുതാത്ത കാര്യങ്ങൾ:

• പ്രകോപനങ്ങളിൽ വീഴരുത്: മൊബൈൽ ക്യാമറകൾ മുഖത്തോടടുപ്പിച്ച് വ്യക്തിപരമായോ കുടുംബത്തെക്കുറിച്ചോ ചോദിച്ച് പ്രകോപിപ്പിച്ചാൽ തർക്കിക്കുകയോ ദേഷ്യപ്പെടുകയോ ചെയ്യരുത്. 'ദയവായി സഹകരിക്കൂ, ഞങ്ങൾ ഡ്യൂട്ടി ചെയ്യുകയാണ്' എന്ന് മാത്രം പറയുക.

• ബഹളവും ബലപ്രയോഗവും ഒഴിവാക്കുക: ഫോൺ തട്ടിപ്പറിയ്ക്കുക, സാധനങ്ങൾ വലിച്ചെറിയുക, പ്രതിഷേധക്കാരുടെ പാട്ടിനോ നൃത്തത്തിനോ പ്രതികരിക്കുക എന്നിവ അരുത്.

• വനിതാ പ്രതിഷേധക്കാർ: വനിതാ പ്രതിഷേധക്കാരെ കൈകാര്യം ചെയ്യാൻ വനിതാ പൊലീസുകാരെ മാത്രം നിയോഗിക്കുക.

• ഓഫറുകൾ നിരസിക്കുക: പൂക്കളോ മധുരപലഹാരങ്ങളോ വാഗ്ദാനം ചെയ്ത് ക്യാമറയിൽ പെടുത്താൻ ശ്രമിച്ചാൽ സൗമ്യമായി നിരസിക്കുക.

ചെയ്യേണ്ട കാര്യങ്ങൾ:

• ജനപക്ഷ മുഖം: പ്രതിഷേധത്തിനിടയിൽ ആർക്കെങ്കിലും പരിക്കേൽക്കുകയോ വീഴുകയോ ചെയ്താൽ ഉടൻ സഹായിക്കുകയും ആംബുലൻസ് വിളിക്കുകയും ചെയ്യുക.

• വഴി സൗകര്യം: ആംബുലൻസുകൾ, സ്കൂൾ കുട്ടികൾ, ഭിന്നശേഷിക്കാർ എന്നിവർക്ക് കടന്നുപോകാൻ ബാരിക്കേഡുകൾ മാറ്റി സഹായം നൽകുക.

• ബഹുമാനപൂർവ്വമായ പെരുമാറ്റം: ലത്തി ഉയർത്തുന്നതിന് പകരം കൈകൂപ്പി അഭ്യർത്ഥിക്കുക. 'അങ്കിൾ', 'ആന്റി', 'സർ' എന്നിങ്ങനെയുള്ള വിളിപ്പേരുകൾ ഉപയോഗിച്ച് സംസാരിക്കുക.

കഴിഞ്ഞ ജൂലൈ 20-ലെ പാർലമെന്റ് മാർച്ചിനിടെയുണ്ടായ ഏറ്റുമുട്ടലിൽ 118-ലേറെ പൊലീസുകാർക്കും 60-ഓളം പ്രതിഷേധക്കാർക്കും പരിക്കേറ്റിരുന്നു. സോഷ്യൽ മീഡിയ മീം ട്രാപ്പുകളിൽ വീഴാതെ, ശാന്തമായ മുഖവും സഹായിക്കാൻ നീട്ടുന്ന കൈകളും മാത്രം ക്യാമറയിൽ പതിയട്ടെ എന്ന സന്ദേശമാണ് ഡൽഹി പൊലീസ് ഉദ്യോഗസ്ഥർക്ക് നൽകുന്നത്.