തൈറോയ്ഡ് ലക്ഷണങ്ങൾ അവഗണിക്കരുത്: മുൻകൂട്ടിയുള്ള പരിശോധന ആരോഗ്യം സംരക്ഷിക്കും

ഇന്നത്തെ കാലത്ത് സ്ത്രീകളിലും പുരുഷന്മാരിലും ഒരുപോലെ കണ്ടുവരുന്ന ഒന്നാണ് തൈറോയ്ഡ് രോഗങ്ങൾ. എന്നാൽ ഇതിന്റെ ലക്ഷണങ്ങളെ സാധാരണ ക്ഷീണമോ അമിതഭാരമോ ആയി തെറ്റിദ്ധരിച്ച് പലരും കാര്യമാക്കാറില്ല. കൃത്യസമയത്ത് തിരിച്ചറിഞ്ഞ് ചികിത്സിച്ചാൽ പൂർണ്ണമായും നിയന്ത്രണവിധേയമാക്കാൻ കഴിയുന്ന ഒന്നാണ് തൈറോയ്ഡ് പ്രശ്നങ്ങൾ.

തൈറോയ്ഡ് എന്നാൽ എന്ത്?

നമ്മുടെ കഴുത്തിന്റെ മുൻഭാഗത്ത് ചിത്രശലഭത്തിന്റെ ആകൃതിയിലുള്ള ഒരു ചെറിയ ഗ്രന്ഥിയാണ് തൈറോയ്ഡ്. ശരീരത്തിലെ ഊർജ്ജസ്വലത, മെറ്റാബോളിസം (ആഹാരം ദഹിപ്പിച്ച് ഊർജ്ജമാക്കുന്ന പ്രക്രിയ), ശരീര താപനില, ഹൃദയമിടിപ്പ് എന്നിവയെല്ലാം നിയന്ത്രിക്കുന്ന ഹോർമോണുകൾ ഉത്പാദിപ്പിക്കുന്നത് ഈ ഗ്രന്ഥിയാണ്. പിറ്റ്യൂറ്ററി ഗ്രന്ഥി പുറപ്പെടുവിക്കുന്ന TSH (Thyroid Stimulated Hormone) എന്ന ഹോർമോണാണ് തൈറോയ്ഡിന്റെ പ്രവർത്തനത്തെ നിയന്ത്രിക്കുന്നത്.

രണ്ടു തരം തൈറോയ്ഡ് അവസ്ഥകൾ

തൈറോയ്ഡ് ഹോർമോണിന്റെ ഉത്പാദനത്തിൽ വ്യതിയാനം വരുമ്പോൾ പ്രധാനമായും രണ്ട് തരം രോഗാവസ്ഥകളാണ് ഉണ്ടാകുന്നത്:

1. ഹൈപ്പോ തൈറോയ്ഡിസം (ഹോർമോൺ കുറയുന്ന അവസ്ഥ): തൈറോയ്ഡ് ഗ്രന്ഥിയുടെ പ്രവർത്തനം മന്ദഗതിയിലാകുന്ന അവസ്ഥയാണിത്.

• പ്രധാന ലക്ഷണങ്ങൾ: അമിത ക്ഷീണവും തളർച്ചയും, ആഹാരം കുറച്ചു കഴിച്ചാലും ശരീരഭാരം കൂടുക, മാസമുറയിലെ ക്രമക്കേടുകൾ, ശബ്ദത്തിൽ മാറ്റം (കനത്ത ശബ്ദം), മലബന്ധം, വിഷാദം, ഉന്മേഷക്കുറവ്, കുട്ടികളുണ്ടാകാൻ കാലതാമസം നേരിടുക.

2. ഹൈപ്പർ തൈറോയ്ഡിസം (ഹോർമോൺ കൂടുന്ന അവസ്ഥ): തൈറോയ്ഡ് ഗ്രന്ഥി അമിതമായി ഹോർമോൺ ഉത്പാദിപ്പിക്കുന്ന അവസ്ഥ.

• പ്രധാന ലക്ഷണങ്ങൾ: എത്ര ആഹാരം കഴിച്ചാലും ശരീരഭാരം കുത്തനെ കുറയുക, കൈകാലുകളിൽ വിറയൽ, അമിതമായി നെഞ്ചിടിപ്പ് വരിക, പെട്ടെന്ന് ചൂടുടുക്കുക, ക്രമരഹിതമായ ആർത്തവം.

• തൈറോയ്ഡ് രോഗങ്ങൾ വരാനുള്ള പ്രധാന കാരണങ്ങൾ

  1. പ്രതിരോധ സംവിധാനത്തിലെ തകരാറുകൾ (Autoimmune Diseases): നമ്മുടെ ശരീരത്തിലെ പ്രതിരോധ സംവിധാനം തെറ്റായി തൈറോയ്ഡ് ഗ്രന്ഥിയെ ആക്രമിക്കുന്നതാണ് ഇതിന്റെ പ്രധാന കാരണം. ഇതിൽ തൈറോയ്ഡ് പ്രവർത്തനം കുറയുന്ന അവസ്ഥയെ 'ഹാഷിമോട്ടോസ് തൈറോയ്ഡൈറ്റിസ്' എന്നും, പ്രവർത്തനം അമിതമാകുന്ന അവസ്ഥയെ 'ഗ്രേവ്സ് ഡിസീസ്' എന്നും വിളിക്കുന്നു.

  2. പാരമ്പര്യം: കുടുംബത്തിൽ മാതാപിതാക്കൾക്കോ അടുത്ത ബന്ധുക്കൾക്കോ തൈറോയ്ഡ് രോഗങ്ങളുണ്ടെങ്കിൽ അടുത്ത തലമുറയിലുള്ളവർക്കും, പ്രത്യേകിച്ച് സ്ത്രീകൾക്ക്, ഇത് വരാനുള്ള സാധ്യത കൂടുതലാണ്.

  3. അയഡിന്റെ അളവിലെ വ്യതിയാനം: തൈറോയ്ഡ് ഹോർമോൺ ഉത്പാദനത്തിന് അയഡിൻ വളരെ അത്യാവശ്യമാണ്. കഴിക്കുന്ന ആഹാരത്തിൽ അയഡിന്റെ അളവ് വളരെ കുറയുന്നതും അമിതമാകുന്നതും തൈറോയ്ഡ് തകരാറുകൾക്ക് വഴിവെക്കും.

  4. സ്ത്രീകളിലെ ഹോർമോൺ മാറ്റങ്ങൾ: ഗർഭധാരണം, പ്രസവം, ആർത്തവവിരാമം എന്നീ ഘട്ടങ്ങളിൽ സ്ത്രീകളുടെ ശരീരത്തിലുണ്ടാകുന്ന കടുത്ത ഹോർമോൺ വ്യതിയാനങ്ങൾ തൈറോയ്ഡ് ഗ്രന്ഥിയുടെ പ്രവർത്തനത്തെ ബാധിക്കാറുണ്ട്.

  5. മാനസിക സമ്മർദ്ദവും ജീവിതശൈലിയും: തുടർച്ചയായ മാനസിക സമ്മർദ്ദവും (സ്ട്രെസ്സ്) ഉറക്കമില്ലായ്മയും ശരീരത്തിലെ ഹോർമോൺ സന്തുലിതാവസ്ഥ തെറ്റിക്കുകയും തൈറോയ്ഡ് പ്രശ്നങ്ങളിലേക്ക് നയിക്കുകയും ചെയ്യും.

  6. തൈറോയ്ഡ് ഗ്രന്ഥിയിലെ വീക്കം: വൈറസ് അണുബാധ മൂലമോ അല്ലാതെയോ തൈറോയ്ഡ് ഗ്രന്ഥിയിൽ ഉണ്ടാകുന്ന വീക്കം ഹോർമോൺ ഉത്പാദനത്തെ ദോഷകരമായി ബാധിക്കും.

  7. ചില മരുന്നുകളുടെ പാർശ്വഫലങ്ങൾ: ഹൃദ്രോഗങ്ങൾക്കോ മാനസികാരോഗ്യ പ്രശ്നങ്ങൾക്കോ സ്ഥിരമായി ഉപയോഗിക്കുന്ന ചില പ്രത്യേക മരുന്നുകളുടെ പാർശ്വഫലമായി തൈറോയ്ഡ് പ്രവർത്തനം മന്ദഗതിയിലാകാറുണ്ട്.

രോഗനിർണ്ണയവും മുൻകരുതലുകളും

തുടക്കത്തിൽ പ്രത്യക്ഷമായ ലക്ഷണങ്ങൾ കാണിച്ചില്ലെങ്കിലും വർഷത്തിലൊരിക്കൽ ലളിതമായ ഒരു രക്തപരിശോധനയിലൂടെ തൈറോയ്ഡ് അളവുകൾ അറിയാൻ സാധിക്കും.

• TSH, T3, T4 ടെസ്റ്റുകൾ: രക്തത്തിലെ TSH അളവ് നോർമൽ ലെവലിനേക്കാൾ കൂടുതലാണെങ്കിൽ തൈറോയ്ഡ് പ്രവർത്തനക്കുറവിനെയും (Hypothyroidism), കുറവാണെങ്കിൽ അമിത പ്രവർത്തനത്തെയും (Hyperthyroidism) സൂചിപ്പിക്കുന്നു.

• പ്രതിരോധ മാർഗ്ഗങ്ങൾ: ഡോക്ടറുടെ നിർദ്ദേശപ്രകാരം കൃത്യമായി മരുന്നുകൾ കഴിക്കുക. അയഡിൻ അടങ്ങിയ ഭക്ഷണങ്ങൾ, സമീകൃതാഹാരം, ദിനചര്യയിലെ വ്യായാമം എന്നിവ തൈറോയ്ഡ് നിയന്ത്രണത്തിന് സഹായിക്കും. സ്ട്രെസ് (മാനസിക സമ്മർദ്ദം) കുറയ്ക്കുന്നതും വളരെ പ്രധാനമാണ്.