‘മന്ത്രിക്ക് അറിയില്ലെങ്കിൽ പിന്നെ ആർക്കറിയാം?’; പാലക്കാട് റെയിൽവേ വിഭജനത്തിൽ അശ്വിനി വൈഷ്ണവിനെതിരെ ഉണ്ണിത്താൻ

കാസർകോട്: പാലക്കാട് റെയിൽവേ ഡിവിഷനിൽ നിന്ന് മംഗളൂരു ഉൾപ്പെടെയുള്ള പ്രദേശങ്ങൾ വേർപ്പെടുത്തി മൈസൂരു ഡിവിഷനിലേക്ക് മാറ്റാനുള്ള റെയിൽവേ തീരുമാനത്തിനെതിരെ പ്രതിഷേധവുമായി രാജ്മോഹൻ ഉണ്ണിത്താൻ എംപി. തീരുമാനം പിൻവലിക്കണമെന്ന് ആവശ്യപ്പെട്ട് കേരളത്തിൽ നിന്നുള്ള എംപിമാർ ശക്തമായ എതിർപ്പ് രേഖപ്പെടുത്തി.

റെയിൽവേ ബോർഡിന്റെ ഉത്തരവ് പ്രകാരം മംഗളൂരു മുതൽ ഉള്ളാൾ വരെയുള്ള പ്രദേശം പാലക്കാട് ഡിവിഷനിൽ നിന്ന് മാറ്റി ദക്ഷിണ പശ്ചിമ റെയിൽവേയുടെ മൈസൂരു ഡിവിഷനിൽ ഉൾപ്പെടുത്താനാണ് തീരുമാനം. ഒക്ടോബർ ഒന്നുമുതൽ മാറ്റം പ്രാബല്യത്തിൽ വരും.

മംഗളൂരു മേഖലയെ നഷ്ടപ്പെടുന്നതോടെ പാലക്കാട് ഡിവിഷന്റെ വരുമാനത്തിലും പ്രവർത്തന ശേഷിയിലും വലിയ കുറവുണ്ടാകുമെന്നാണ് ആശങ്ക. പുതിയ ട്രെയിനുകൾ അനുവദിക്കുന്നതിലും ഭാവിയിലെ റെയിൽവേ വികസന പദ്ധതികളിലും ഇത് പ്രതികൂലമായി ബാധിക്കുമെന്ന് കേരളത്തിൽ നിന്നുള്ള ജനപ്രതിനിധികൾ ചൂണ്ടിക്കാട്ടുന്നു.

രാജ്മോഹൻ ഉണ്ണിത്താനെ കൂടാതെ എം.കെ. രാഘവൻ, കെ. രാധാകൃഷ്ണൻ, വി.കെ. ശ്രീകണ്ഠൻ തുടങ്ങിയ എംപിമാരും തീരുമാനത്തിനെതിരെ രംഗത്തെത്തിയിട്ടുണ്ട്. തീരുമാനം പിൻവലിക്കണമെന്നാണ് എംപിമാരുടെ ആവശ്യം.