സിന്ധു സൂപ്പറാണ്; വീണ്ടും ഇന്ത്യയ്ക്കായി കിരീടം
സിംഗപ്പൂര്‍: വീണ്ടും ഇന്ത്യയ്ക്കായി നേട്ടം കൊയ്ത് സൂപ്പര്‍താരം പി വി സിന്ധു. സിംഗപ്പൂര്‍ ഓപ്പണ്‍ ബാഡ്മിന്റനില്‍ വിജയിച്ച സിന്ധു രാജ്യത്തിനായി വീണ്ടും കിരീടം നേടി. ഫൈനലില്‍ ചൈനയുടെ വാങ് ഷിയെയാണ് സിന്ധു പരാജയപ്പെടുത്തിയത്. സ്‌കോര്‍ : 21-9, 11-21, 21-15. ആദ്യ സെറ്റ് സ്വന്തമാക്കിയ സിന്ധുവിന് രണ്ടാമത്തെ സെറ്റ് നഷ്ടപ്പെട്ടു. എന്നാല്‍ മൂന്നാം സെറ്റിലെ മികച്ച പ്രകടനത്തിലൂടെ സിന്ധു വിജയം കണ്ടെത്തുകയായിരുന്നു. മികച്ച പ്രകടനം കാഴ്ച്ചവെച്ചെങ്കിലും സിന്ധുവിന്റെ മുന്നില്‍ വാങ് കീഴടങ്ങുകയായിരുന്നു. ലോക 11-ാം നമ്പര്‍ താരമാണ് വാങ്. സിന്ധു റാങ്കിങ്ങില്‍ ഏഴാം സ്ഥാനത്താണ്.രണ്ടു തവണ ഒളിമ്പിക് മെഡല്‍ ജേതാവായ ഈ ഹൈദരാബാദുകാരി സെമി ഫൈനലില്‍ ജപ്പാന്റെ സയിന കവാക്കാമിയെയായിരുന്നു പരാജയപ്പെടുത്തിയത്. 2022 സൂപ്പര്‍ 500 ബാഡ്മിന്റനിലെ സിന്ധുവിന്റെ ആദ്യ കിരീടമാണിത്. സെയിദ് മോദി ഇന്റര്‍നാഷണല്‍ കപ്പും, സ്വിസ് ഓപ്പണ്‍ സൂപ്പര്‍ 300 ടൂര്‍ണമെന്റും സിന്ധു നേരത്തെ വിജയിച്ചിരുന്നു.
