വനിതകൾക്കു പിന്നാലെ പുരുഷ ടീമും പുറത്ത്; ലോകകപ്പ് ഹോക്കിയിൽ ഇന്ത്യൻ പ്രതീക്ഷകൾ അസ്തമിച്ചു

ആംസ്റ്റൽവീൻ: ലോകകപ്പ് ഹോക്കിയിൽ ഇന്ത്യയുടെ പുരുഷ ടീമിന്റെയും സെമി ഫൈനൽ പ്രതീക്ഷകൾ അസ്തമിച്ചു. നിർണായകമായ രണ്ടാം റൗണ്ട് പൂൾ ഇ മത്സരത്തിൽ അർജന്റീനയോട് ഇന്ത്യ 3-5ന് പരാജയപ്പെട്ടു. ആംസ്റ്റൽവീനിലെ വാഗനർ ഹോക്കി സ്റ്റേഡിയത്തിൽ നടന്ന മത്സരത്തിൽ തുടക്കം മുതൽ ആക്രമണാത്മകമായ പ്രകടനം പുറത്തെടുത്ത അർജന്റീനയാണ് ഇന്ത്യയെ മറികടന്നത്. 

സെമി ഫൈനലിലെത്താൻ ഇന്ത്യക്ക് അർജന്റീനക്കെതിരെ വലിയ മാർജിനിലുള്ള വിജയം അനിവാര്യമായിരുന്നു. അതോടൊപ്പം മറ്റ് മത്സരഫലങ്ങളും അനുകൂലമാകേണ്ട സാഹചര്യമുണ്ടായിരുന്നു. നെതർലൻഡ്സിനെതിരായ 1-3 തോൽവിക്ക് പിന്നാലെ അർജന്റീനക്കെതിരായ മത്സരം ഇന്ത്യക്ക് നിർണായകമായിരുന്നു. എന്നാൽ പ്രതീക്ഷകൾക്ക് വിപരീതമായി തോൽവി വഴങ്ങിയതോടെ ടീമിന്‍റെ ലോകകപ്പ് യാത്ര അവസാനിച്ചു.

ആദ്യ മിനിറ്റിൽ തന്നെ അർജന്റീനയുടെ മുന്നേറ്റം

മത്സരം ആരംഭിച്ച് അധികം വൈകാതെ തന്നെ അർജന്റീന ലീഡ് നേടി. ഒന്നാം മിനിറ്റിൽ ജോക്വിൻ ടോസ്കാനിയാണ് ഇന്ത്യയുടെ പ്രതിരോധത്തെ ഞെട്ടിച്ച് ആദ്യ ഗോൾ നേടിയത്. ആറാം മിനിറ്റിൽ നിക്കോളാസ് ഡെല്ല ടോറെ കൂടി ഗോൾ നേടിയതോടെ അർജന്റീന 2-0ന് മുന്നിലെത്തി.

രണ്ട് ഗോളിന് പിന്നിലായതോടെ ഇന്ത്യ തിരിച്ചുവരവിന് ശ്രമിച്ചെങ്കിലും അർജന്റീനയുടെ പ്രതിരോധവും മധ്യനിരയും തുടർച്ചയായി സമ്മർദം സൃഷ്ടിച്ചു. ആദ്യ പകുതിയിൽ ഇന്ത്യക്ക് ലഭിച്ച അവസരങ്ങൾ ഫലപ്രദമായി ഉപയോഗിക്കാനായില്ല.

രണ്ടാം പകുതിയിൽ ഗോൾമഴ

രണ്ടാം പകുതിയിലാണ് മത്സരം കൂടുതൽ ആവേശകരമായത്. 33-ാം മിനിറ്റിൽ തോമസ് ഡൊമെനെ അർജന്റീനയുടെ മൂന്നാം ഗോൾ നേടി. അതിന് പിന്നാലെ 34-ാം മിനിറ്റിൽ സുഖ്ജീത് സിംഗ് ഇന്ത്യക്കായി ഒരു ഗോൾ തിരിച്ചടിച്ചു.

36-ാം മിനിറ്റിൽ ഹാർദിക് സിംഗ് കൂടി ലക്ഷ്യം കണ്ടതോടെ ഇന്ത്യ 2-3 എന്ന നിലയിൽ അർജന്റീനയുടെ തൊട്ടുപിന്നിലെത്തി. ഇതോടെ മത്സരം ഇന്ത്യയുടെ നിയന്ത്രണത്തിലേക്ക് തിരിച്ചുവരുമെന്ന പ്രതീക്ഷ ഉയർന്നു.

എന്നാൽ അർജന്റീന സമ്മർദം കൈവിട്ടില്ല. 45-ാം മിനിറ്റിൽ തോമസ് ഡൊമെനെ തന്റെ രണ്ടാം ഗോളിലൂടെ അർജന്റീനയുടെ ലീഡ് വീണ്ടും ഉയർത്തി. 53-ാം മിനിറ്റിൽ ജോക്വിൻ ടോസ്കാനി തന്റെ രണ്ടാം ഗോൾ കൂടി നേടിയതോടെ സ്കോർ 5-2 ആയി.58-ാം മിനിറ്റിൽ സുഖ്ജീത് സിംഗ് ഇന്ത്യക്കായി തന്റെ രണ്ടാം ഗോൾ നേടിയെങ്കിലും അപ്പോഴേക്കും മത്സരത്തിന്റെ നിയന്ത്രണം അർജന്റീനയുടെ കൈകളിലായിരുന്നു. ഒടുവിൽ 5-3ന് അർജന്റീന വിജയം സ്വന്തമാക്കി.

രണ്ടാം റൗണ്ട് പൂൾ ഇയിൽ ഇന്ത്യക്ക് നെതർലൻഡ്സിനോടും അർജന്റീനയോടും തോൽവി നേരിടേണ്ടിവന്നു. നെതർലൻഡ്സ് ഇന്ത്യയെ 3-1ന് തോൽപ്പിച്ചതിന് പിന്നാലെയാണ് അർജന്റീനയും 5-3ന് ഇന്ത്യയെ കീഴടക്കിയത്. 

ലോകകപ്പിന്റെ ആദ്യ റൗണ്ടിൽ പാകിസ്ഥാനെ 5-3നും വെയിൽസിനെ 3-1നും തോൽപ്പിച്ച് ഇന്ത്യ രണ്ടാം ഘട്ടത്തിലേക്ക് പ്രതീക്ഷകളോടെയാണ്​  മുന്നേറിയത്​. എന്നാൽ രണ്ടാം റൗണ്ടിൽ നിർണായക മത്സരങ്ങളിൽ വിജയം നേടാനാകാതെ പോയതാണ് തിരിച്ചടിയായത്. 1975ലാണ്​ ഇന്ത്യ ആദ്യമായും അവസാനമായും ലോക ഹോക്കി കിരീടത്തിൽ മുത്തമിട്ടത്​. അന്ന്​ മലേഷ്യയിലെ ക്വാലാലംപൂരിൽ നടന്ന ഫൈനലിൽ പാകിസ്ഥാനെ 2-1ന് തോൽപ്പിച്ചാണ് ഇന്ത്യ കിരീടം സ്വന്തമാക്കിയത്. അതിനുശേഷം ലോകകപ്പിൽ ഇന്ത്യക്ക് കിരീടത്തിലേക്ക് തിരിച്ചെത്താനായിട്ടില്ല.

വനിതകൾക്കും തിരിച്ചടി

ലോകകപ്പിൽ ഇന്ത്യൻ വനിതാ ടീമിന്റെ സെമി ഫൈനൽ പ്രതീക്ഷകൾ നേരത്തെ തന്നെ അവസാനിച്ചിരുന്നു. ഓസ്ട്രേലിയക്കെതിരായ ഗോൾരഹിത സമനിലയ്ക്ക് പിന്നാലെയാണ് വനിതാ ടീമിന് സെമി ഫൈനൽ ബെർത്ത് നഷ്ടമായത്.