ജിയോ ബിപിയും ഇന്ധനവില കൂട്ടി; പെട്രോളിന് ₹5, ഡീസലിന് ₹3 വർധന

സ്വകാര്യ ഇന്ധനവിതരണ കമ്പനിയായ ജിയോ ബിപി പെട്രോൾ, ഡീസൽ വില വർധിപ്പിച്ചു. പെട്രോൾ ലിറ്ററിന് അഞ്ച് രൂപയും ഡീസൽ ലിറ്ററിന് മൂന്ന് രൂപയുമാണ് കൂട്ടിയത്. ഒക്ടോബർ 11 ഞായറാഴ്ച രാവിലെ ആറു മണി മുതൽ പുതുക്കിയ വില പ്രാബല്യത്തിൽ വന്നു.

അന്താരാഷ്ട്ര വിപണിയിൽ ക്രൂഡ് ഓയിൽ, ശുദ്ധീകരിച്ച പെട്രോളിയം ഉൽപ്പന്നങ്ങൾ എന്നിവയുടെ വില ഉയർന്നതിനെത്തുടർന്നാണ് വിലവർധനയെന്നാണ് റിപ്പോർട്ടുകൾ. കഴിഞ്ഞ പത്ത് ദിവസത്തിനിടെ ഇന്ധനവില വർധിപ്പിക്കുന്ന രണ്ടാമത്തെ സ്വകാര്യ കമ്പനിയാണ് ജിയോ ബിപി. നേരത്തേ നയാര എനർജിയും പെട്രോളിന് അഞ്ച് രൂപയും ഡീസലിന് മൂന്ന് രൂപയും വർധിപ്പിച്ചിരുന്നു.

ഹോർമുസ് കടലിടുക്കിലെ പ്രതിസന്ധിയുൾപ്പെടെയുള്ള ആഗോള സംഭവവികാസങ്ങൾ ഇന്ധനവിപണിയെ ബാധിക്കുന്ന സാഹചര്യത്തിലാണ് സ്വകാര്യ കമ്പനികളുടെ വിലവർധന.

ഇന്ധനവില ഉയരുന്നത് വാഹന ഉടമകളുടെ ചെലവ് വർധിപ്പിക്കുന്നതിനൊപ്പം ചരക്കുനീക്കച്ചെലവിലും പ്രതിഫലിക്കാനുള്ള സാധ്യതയുണ്ട്. 

വിവിധ സംസ്ഥാനങ്ങളിലെ നികുതികളും മറ്റ് ഘടകങ്ങളും കാരണം പമ്പുകളിലെ അന്തിമ വിലയിൽ വ്യത്യാസമുണ്ടാകും.