കാസർഗോഡ്–വയനാട് 400 കെ.വി. ലൈൻ: നഷ്ടപരിഹാരം കുത്തനെ വർധിപ്പിച്ചു; സർക്കാർ ഉത്തരവിറക്കി

തിരുവനന്തപുരം: വർഷങ്ങളായി മുടങ്ങിക്കിടക്കുന്ന കാസർഗോഡ്–വയനാട് 400 കെ.വി. വൈദ്യുതി പ്രസരണ ലൈൻ പദ്ധതി പൂർത്തിയാക്കുന്നതിനായി നഷ്ടപരിഹാര പാക്കേജ് വർധിപ്പിച്ച് സർക്കാർ ഉത്തരവിറക്കി. ഭൂവുടമകൾക്കുള്ള നഷ്ടപരിഹാര നിരക്കുകളിൽ ഗണ്യമായ വർധന വരുത്തിയാണ് പുതിയ തീരുമാനം. വൈദ്യുതി മന്ത്രി സണ്ണി ജോസഫിന്റെ ഇടപെടലിനെത്തുടർന്ന് മന്ത്രിസഭ അംഗീകരിച്ച നിർദേശത്തിന്റെ അടിസ്ഥാനത്തിലാണ് ഉത്തരവ്.

2026 നവംബർ 12-ലെ G.O.(Ms) No.13/2026/POWER ഉത്തരവ് പ്രകാരം ടവർ സ്ഥാപിക്കുന്ന ഭൂമിക്ക് ന്യായവിലയുടെ 400 ശതമാനവും പ്രസരണ ലൈൻ കടന്നുപോകുന്ന ഭൂമിക്ക് 100 ശതമാനവും നഷ്ടപരിഹാരം നൽകും. നേരത്തെ ഇത് യഥാക്രമം 340 ശതമാനവും 60 ശതമാനവുമായിരുന്നു.

പദ്ധതിയുമായി ബന്ധപ്പെട്ട് ഭൂവുടമകൾ ഉന്നയിച്ച ആശങ്കകളും നഷ്ടപരിഹാരം വർധിപ്പിക്കണമെന്ന ആവശ്യവും പരിഗണിച്ചാണ് സർക്കാർ നടപടി. യുഡിഎഫ് സർക്കാർ അധികാരത്തിലെത്തിയതിനു പിന്നാലെ ജനപ്രതിനിധികൾ, ഉദ്യോഗസ്ഥർ, ഭൂവുടമകളുടെ പ്രതിനിധികൾ എന്നിവരുമായി മന്ത്രി സണ്ണി ജോസഫ് നടത്തിയ ചർച്ചകളാണ് പുതുക്കിയ പാക്കേജിലേക്ക് വഴിതുറന്നത്. വൈദ്യുതി വകുപ്പ് സമർപ്പിച്ച നിർദേശം മന്ത്രിസഭ അംഗീകരിച്ചതോടെയാണ് ഉത്തരവിറങ്ങിയത്.

പുതിയ പാക്കേജ് പ്രകാരം പ്രസരണ ലൈനിന് താഴെയുള്ള വീടുകൾക്ക് പൊതുമരാമത്ത് വകുപ്പിന്റെ മൂല്യനിർണയത്തിന്റെ അടിസ്ഥാനത്തിൽ പരമാവധി 10 ലക്ഷം രൂപ നഷ്ടപരിഹാരം ലഭിക്കും. മൂല്യനിർണയം 10 ലക്ഷം രൂപയിൽ താഴെയാണെങ്കിൽ അത്രയും തുക നൽകും. മാർച്ചിലെ ഉത്തരവിൽ വീടുകൾക്കുള്ള നഷ്ടപരിഹാര പരിധി രണ്ടു ലക്ഷം രൂപയായിരുന്നു.

ഒരു സെന്റിന്റെ ന്യായവില 10,000 രൂപയിൽ താഴെയുള്ള പ്രദേശങ്ങളിൽ 10,000 രൂപ അടിസ്ഥാന ന്യായവിലയായി കണക്കാക്കും. നേരത്തെ ഇത് 7,000 രൂപയായിരുന്നു. മുറിച്ചുമാറ്റേണ്ട മരങ്ങൾക്കുള്ള നഷ്ടപരിഹാരം നിലവിലുള്ള ചട്ടങ്ങൾ പ്രകാരം ജില്ലാ കളക്ടർമാർ നിശ്ചയിക്കും. സമതല പ്രദേശങ്ങളിൽ 46 മീറ്ററും മലനിരകൾ, താഴ്‌വരകൾ എന്നിവിടങ്ങളിൽ 30 മീറ്ററും വീതിയുള്ള പരിധി കണക്കിലെടുത്തായിരിക്കും നടപടി.

പുതുക്കിയ മാർഗനിർദേശങ്ങൾ അനുസരിച്ച് ഓരോ ഭൂവുടമയ്ക്കും ലഭിക്കേണ്ട തുക ജില്ലാ കളക്ടർമാർ കണക്കാക്കും. തുക ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് നേരിട്ട് കൈമാറും. നഷ്ടപരിഹാര പാക്കേജ് നടപ്പാക്കുന്നതിനുള്ള മുഴുവൻ സാമ്പത്തിക ബാധ്യതയും കെ.എസ്.ഇ.ബി വഹിക്കും.

പ്രസരണ ശേഷി വർധിപ്പിക്കാൻ നിർണായക പദ്ധതി

കാസർഗോഡ്–വയനാട് 400 കെ.വി. ലൈൻ യാഥാർഥ്യമാകുന്നതോടെ സംസ്ഥാനത്തിന്റെ വൈദ്യുതി പ്രസരണ ശേഷിയിൽ ഗണ്യമായ വർധനയുണ്ടാകും. പുറത്തുനിന്ന് കൂടുതൽ വൈദ്യുതി കേരളത്തിലെത്തിക്കാനും സംസ്ഥാനത്ത് അധികമായി ലഭിക്കുന്ന വൈദ്യുതി ആവശ്യാനുസരണം പുറത്തേക്ക് കൈമാറാനും ഇതുവഴി സാധിക്കും.

വൈദ്യുതി ആവശ്യകത വർധിച്ചുവരുന്ന സാഹചര്യത്തിൽ സംസ്ഥാനത്തിന്റെ പ്രസരണ ശൃംഖല ശക്തിപ്പെടുത്തുന്നതിനും ഭാവിയിലെ ഊർജാവശ്യങ്ങൾ നിറവേറ്റുന്നതിനും പദ്ധതി പ്രധാനമാണ്. നഷ്ടപരിഹാരവുമായി ബന്ധപ്പെട്ട തർക്കങ്ങൾ പരിഹരിച്ച് നിർമ്മാണം വേഗത്തിലാക്കുകയാണ് പുതുക്കിയ ഉത്തരവിലൂടെ സർക്കാർ ലക്ഷ്യമിടുന്നത്.